Jayakwadi Dam : मराठवाड्यासाठी आनंदाची बातमी! नाशिक जिल्ह्यातून जायकवाडीला आतापर्यंत 10 टीएमसी पाणी रवाना, पाणीचिंता मिटणार

Nashik Rain Update : मुसळधार पावसामुळे नाशिकमधील सुमारे आठ धरणांमधून विसर्ग सुरु होता. जायकवाडीला आतापर्यंत 10 टीएसी पाणी रवाना झाले आहे. यामुळे मराठवाड्याची तहान भागणार आहे. 

Jayakwadi Dam

Source : ABP Majha

नाशिक : जिल्ह्यातील धरणे साधारणतः तीन आठवड्यांपूर्वी तळ गाठण्याच्या मार्गावर होती. मात्र दोन दिवसांतील मुसळधार पावसाने (Heavy rain) जिल्ह्यातील धरणसाठ्यात कमालीची वाढ झाली आहे. जिल्ह्यातील धरणांमध्ये सुमारे 37 हजार 585 दशलक्ष घनफूट म्हणजेच 57 टक्के जलसाठा झाला झाला आहे. नाशिक शहराला पाणी पुरवठा करणारे गंगापूर धरण (Gangapur Dam) देखील तुडूंब होण्याच्या मार्गावर आहे. मुसळधार पावसामुळे गेल्या काही दिवसांपासून नाशिकमधील सुमारे आठ धरणांमधून विसर्ग सुरु होता. यामुळे नाशिक जिल्ह्यातून जायकवाडीला (Jayakwadi Dam) आतापर्यंत 10 टीएसी पाणी रवाना झाले असल्याने मराठवाड्याची (Marathwada) तहान भागणार आहे. 

जिल्ह्यात रविवारी मुसळधार पाऊस कोसळला. आठ धरणांमधून विसर्ग वाढल्याने गोदावरीसह अनेक नद्या- नाले दुथडी भरून वाहू लागले. यामुळे जनजीवन विस्कळीत झाल्याचे चित्र होते. गंगापूर धरणातून विसर्ग करण्यात आल्याने यंदा प्रथमच गोदावरीचे पाणी पात्राबाहेर गेले होते. गोदावरीच्या पाणी पातळीतील वाढीचे निदर्शक मानल्या जाणाऱ्या दुतोंड्या मारुतीच्या छातीपर्यंत पाणी आले होते. मात्र आता पावसाने उघडीप घेतली असून पूर ओसरला आहे. 

जायकवाडीला आतापर्यंत 10 टीएमसी पाणी रवाना

नाशिक जिल्ह्यातील विविध धरणांमधून जायकवाडीसाठी जवळपास 10 हजार 464 म्हणजेच साडेदहा टीएमसी पाणी सोडण्यात आले आहे. नाशिक जिल्ह्यातील गंगापूर, दारणा आणि पालखेड धरण समुहातील पाणी नांदूरमध्यमेश्वरमार्गे पुढे मराठवाड्यातील जायकवाडी धरणाकडे मार्गस्थ होते. मुसळधार पावसाने मागील 24 तासात जायकवाडीला चार हजार तीन दशलक्ष घनफूट म्हणजे चार टीएमसीचा विसर्ग झाला आहे. एक जून ते रविवारी सकाळपर्यंत जायकवाडीला सहा हजार 464 दशलक्ष घनफूट म्हणजे 6.4 टीएमसी पाण्याचा विसर्ग झाला होता. सोमवारी सकाळी हंगामातील आतापर्यंतची आकडेवारी 10 हजार 464 दशक्ष घनफूट म्हणजे साडेदहा टीएमसीवर पोहोचल्याचे पाटबंधारे विभागाच्या अहवालात म्हटले आहे. सोमवारी नांदूरमध्यमेश्वरमधून 54 हजार 233 क्युसेकचा विसर्ग सुरू होता. त्यामुळे मंगळवारीही जायकवाडीसाठी चांगला विसर्ग होण्याची शक्यता आहे.

नाशिकमधील कोणत्या धरणात किती पाणीसाठा?  

गंगापूर – 85.86 टक्के, कश्यपी – 51.03 टक्के, गौतमी गोदावरी 87.26 टक्के, आळंदी 74.63 टक्के, पालखेड – 63.86 टक्के, करंजवण – 55.93 टक्के, वाघाड 72.81 टक्के, ओझरखेड 33.10 टक्के, पुणेगाव 76.08 टक्के, तिसगाव 6.37 टक्के, दारणा – 84.26 टक्के, भावली - 100 टक्के, मुकणे - 52.84 टक्के, वालदेवी - 100 टक्के, कडवा 81.58 टक्के, नांदुरमध्यमेश्वर- 00 टक्के, भोजापूर - 96.68 टक्के, चणकापूर - 74.82 टक्के, हरणबारी 100 टक्के, केळझर 100 टक्के, नागासाक्या 00 टक्के, गिरणा 26.01 टक्के, पुनद 50.08 टक्के, माणिकपुंज 00 टक्के.

आणखी वाचा