नागपूरमध्ये मुलाच्या जन्माने चिडलेल्या मद्यपी बापाकडून मुलाची हत्या

मला मुलगी हवी होती, तू मुलगा जन्माला घातला असे म्हणत मद्यपी नवऱ्याने एक वर्षीय मुलाची दगडावर आपटून हत्या केल्याची घटना नागपूरमध्ये घडली आहे.

संग्रहित छायाचित्र

नागपूर : मुलीच्या जन्माने नाराज होऊन नवऱ्याकडून हिंसा झाल्याच्या अनेक घटना आपण ऐकत असतो. मात्र, नागपूर जिल्ह्यातील खापामध्ये मुलाच्या जन्माने चिडलेल्या मद्यपी बापाने मुलाची हत्या केली आहे. पत्नीच्या तक्रारीवरून खापा पोलिसांनी गुन्हा नोंद केला असून आरोपीला अटक करण्यात आली आहे.

मला मुलगी हवी होती, तू मुलगा जन्माला घातला असे म्हणत मद्यपी बापाने एक वर्षीय मुलाची हत्या केली. नागपूर जिल्ह्यातील सावनेर तालुक्यात खापा पोलीस स्टेशनच्या हद्दीत एका मद्यपी बापाने स्वतःच्याच एक वर्षीय मुलाची  हत्या केल्याची धक्कादायक घटना घडली आहे. सत्यम भजन कौरती (1 वर्ष) असे मृत्यू झालेल्या चिमुकल्याचे नाव आहे तर भजन कौरती असे आरोपी बापाचे नाव असून खापरखेडा पोलिसांनी आरोपीला अटक केली आहे.

पोलिसांच्या माहितीनुसार आरोपी भजन कौरती हा काल संध्याकाळी दारूच्या नशेत घरी आला. येताच त्याने पत्नीसोबत वाद सुरू केले. पुन्हा दारू पिण्यासाठी त्याने पत्नीकडे पैसे मागितले, तेव्हा त्याच्या पत्नीने पैसे देण्यास नकार देताच भजन याने मला मुलगी हवी होती, तू मुलाला जन्म दिल्याचं म्हणत त्याचा एक वर्षीय चिमुकला सत्यमला उचलून अंगणातील दगडावर फेकले. लहानग्या सत्यमच्या डोक्याला ईजा झाल्याने सत्यमचा घटनास्थळीच मृत्यू झाला. ही घटना क्षणात घडल्याने सत्यमला वाचवण्याची कुणालाही संधी मिळाली नाही. आरोपी भजन याची पत्नी मथुराच्या तक्रारीवरून खापा पोलिसांनी गुन्हा नोंद केला असून आरोपीला अटक करण्यात आली आहे.