Tata Vs Ambani : रिलायन्सला मागे टाकत टाटा ग्रुप पुन्हा नंबर वन

मिठापासून सॉफ्टवेअरपर्यंत प्रत्येक वस्तूची निर्मिती करणारा टाटा ग्रुप आपल्या फ्लॅगशिप कंपनी TCS च्या बळावर मार्केट कॅपच्या बाबतीत पुन्हा एकदा देशातील सर्वात मोठा ग्रुप बनला आहे.

मुंबई : टाटा ग्रुप आणि रिलायन्स इंडस्ट्रीज या देशातील दोन मोठ्या व्यावसायिक घरांमधील स्पर्धा जुनी आहे. कधी मुकेश अंबानींची कंपनी RIL ची मार्केट कॅप (बाजारपेठ) टाटा समूहापेक्षा जास्त असते तर कधी टाटा ग्रुपची मार्केट कॅप जास्त असते. गेल्या वर्षी जुलैमध्ये रिलायन्सने टाटा ग्रुपला मागे टाकत देशातील अव्वल व्यावसायिक म्हणून स्थान मिळवलं होतं. परंतु अवघ्या महिन्यांत टाटा ग्रुपने आपलं स्थान पुन्हा मिळवलं.

मिठापासून सॉफ्टवेअरपर्यंत प्रत्येक वस्तूची निर्मिती करणारा टाटा ग्रुप आपल्या फ्लॅगशिप कंपनी TCS च्या बळावर मार्केट कॅपच्या बाबतीत पुन्हा एकदा देशातील सर्वात मोठा ग्रुप बनला आहे. तर मुकेश अंबानी यांच्या नेतृत्वात रिलायन्स समूहाचं बाजार मूल्य घसरलं आहे. आता रिलायन्स बाजार मुल्याच्या बाबती तिसऱ्या क्रमांकावर आहे. तर HDFC ग्रुप दुसऱ्या क्रमांकावर आहे.

टाटा समूहाच्या कंपन्यांची एकूण मार्केट कॅप आज 17 लाख कोटी रुपयांवर पोहोचली आहे. एचडीएफसी ग्रुपच्या तुलनेत सुमारे टाटा ग्रुप दोन लाख कोटींनी पुढे आहे. एचडीएफसी समूहाची मार्केट कॅप 15.25 लाख कोटी रुपये आहे. गेल्या एका वर्षात टाटा समूहाच्या कंपन्यांची कामगिरी उत्कृष्ट राहिली, एका वर्षात या समूहाची मार्केट कॅप 42 टक्क्यांहून अधिक वाढली आहे. विशेष म्हणजे टाटा समूहाची मार्केट कॅप गेल्या एका महिन्यात 13 टक्क्यांनी वाढली आहे. म्हणजेच एका महिन्यात या टाटा ग्रुपने आपल्या बाजार भांडवलात 1.9 लाख कोटींची भर घातली आहे.

मुकेश अंबानी यांची रिलायन्स समूहाची मार्केट कॅप 27 टक्क्यांनी वाढली आहे. तर एचडीएफसी समूहामध्ये केवळ 11 वाढ झाली आहे. टाटा ग्रुपच्या मार्केट कॅपमध्ये तेजीचे सर्वात मोठे कारण म्हणजे मागील महिन्यात आपल्या 28 लिस्टेड कंपन्यांपैकी 18 कंपन्यांनी चांगली कामगिरी केली आहे. जुलै 2020 मध्ये टाटा ग्रुपच्या 17 लिस्टेड कंपन्यांची एकूण मार्केट कॅप 11.32 लाख कोटी रुपये होती. तर रिलायन्स इंडस्ट्रीजची मार्केट कॅप 13 लाख कोटींच्या पुढे गेली होती. त्यानंतर रिलायन्स समूहाने टाटा समूहाला मार्केट कॅपच्या बाबतीत मागे टाकलं होतं. त्यानंतर 16 सप्टेंबरला रिलायन्सची मार्केट कॅप 16 लाख कोटींच्या विक्रमी पातळीवर गेली. त्यावेळी रिलायन्सने 16 लाख कोटी रुपयांची मार्केट कॅप ओलांडणारी देशातील पहिली कंपनी होती. त्यावेळी रिलायन्स इंडस्ट्रीजच्या शेअर्सनेही 2,368 रुपये विक्रमी उच्चांक गाठला होता.

मात्र त्यानंतर रिलायन्सच्या शेअर्समध्ये सातत्याने घसरण सुरू झाली आणि मार्केट कॅप 12.22 लाख कोटी रुपये राहिला. तर दुसरीकडे टीसीएस, टाटा मोटर्स आणि टाटा स्टीलसह टाटा समूहाच्या कंपन्यांमध्ये प्रचंड वाढ झाली आणि त्यामुळे टाटा समूहाची एकूण मार्केट कॅप 16.69 ला कोटींच्या पुढे गेली. जी रिलायन्स समूहापेक्षा सुमारे 36 ट्क्के अधिक आहे. टीसीएस शेअर्समधील या तेजीचे कारण म्हणजे कोरोना संकटाच्या काळातही कंपनीने बरेच मोठे करार केले. स्टीलच्या वाढत्या किंमतींचाही टाटा स्टीलला मोठा फायदा झाला. जुलैपासून टाटा मोटर्सच्या शेअर्समध्येही 100 टक्के पेक्षा जास्त वाढ झाली आहे.