Sheena Bora Murder Case: शीना बोरा हत्याकांड प्रकरण, भायखळा जेलमध्ये इंद्राणी मुखर्जीला इतर कैद्यांप्रमाणेच जेलचा गणवेश घालावा लागणार
जेल अधिकारी हिरवी साडी नेसण्यास सक्ती करत असल्याविरोधात इंद्राणीनं विशेष सीबीआय कोर्टात केलेली याचिका फेटाळली.
मुंबई : शीना बोरा हत्याकांडातील मुख्य आरोपी इंद्राणी मुखर्जीला यापुढे जेलमध्ये दिले जाणारे कपडेच घालावे लागणार आहेत. यासंदर्भात तक्रार करत इंद्राणीनं मुंबई सत्र न्यायालयात दाखल केलेली याचिका कोर्टानं फेटाळून लावली आहे. सर्वसामान्य कैद्यांसाठीचे कपडे घालण्यास इंद्राणी मुखर्जीनं नकार दिला होता. इंद्राणी सध्या कैद असलेल्या भायखळा जेलचे अधिकारी तिला कैद्यासाठी असलेली हिरवी साडी नेसण्यास सक्ती करत असल्याचा विरोधात करत इंद्राणी मुखर्जीनं मुंबई सत्र न्यायालयातील विशेष सीबीआय कोर्टात याचिका दाखल केली होती.
शीना बोरा हत्याकांड खटल्याचा निकाल लागणं अद्याप बाकी असल्यानं आपण सध्या प्रलंबित खटल्यातील 'कच्चे' कैदी आहोत. आपल्यावरील आरोप सिद्ध झालेले नाहीत, तसेच कोर्टाचा अंतिम निकालही लागलेला नाही. त्यामुळे शिक्षा झालेल्या एखाद्या 'पक्या' कैद्यांप्रमाणे जेल अधिकारी आपल्याला जेलचे कपडे घालायला सक्ती कशी करू शकतात?, इतर कैद्यांप्रमाणे आपल्याला वागणूक मिळत असल्याला इंद्राणीनं या याचिकेतून विरोध केला आहे. मात्र, जेल प्रशासनानं यासंदर्भात कोर्टात सादर केलेल्या प्रतिज्ञापत्रात आपली बाजू स्पष्ट करताना जेल नियमावलीचा आधार घेतला. या नियमावलीनुसार कोणताही कैदी त्याला विशिष्ट कपडे परिधान करण्यासाठीचा हट्ट करू शकत नाही, असं स्पष्ट केलं आहे. याची नोंद घेत विशेष सीबीआय कोर्टानं इंद्राणीचा अर्ज फेटाळून लावला.
24 एप्रिल 2012 रोजी शीना बोराची हत्या करण्यात आली होती. इंद्राणीचा चालक शामवर राय याला बेकायदेशीर हत्यार बाळगल्याप्रकरणी अटक करण्यात आली होती. रायची चौकशी केल्यानंतर या भयानक हत्याकांडाचा साल 2015 मध्ये उलगडा झाला. इंद्राणीने आपला पूर्वाश्रमीचा पती संजीव खन्ना आणि ड्रायव्हर शामवर राय यांच्यासोबत मिळून आपल्या पहिल्या पतीपासूनची मुलगी शीनाची हत्या केली आणि 25 एप्रिल 2012 रोजी तिच्या मृतदेहाची विल्हेवाट लावली असल्याचे समोर आले होते. याप्रकरणी इंद्राणीची पती पीटर मुखर्जीलाही या कटात सहभागी असल्याच्या आरोपावरून अटक झाली होती.
महत्त्वाच्या बातम्या
