Sachin Ahir : राज्यसभेसाठी ठाकरेसेनेचा दावा, जागा शरद पवारांना सुटली, फॉर्म भरायला आदित्य ठाकरेंची दांडी का? सचिन अहिर म्हणाले...

Sachin Ahir On Rajya Sabha Election : आदित्य ठाकरे हे राज्यसभेची जागा शिवसेनेला मिळावी म्हणून आग्रही होते. मात्र अखेर शरद पवारांच्या नावावर शिक्कामोर्तब करण्यात आलं. 

Sachin Ahir On Rajya Sabha Election

Source : abp majha

मुंबई : राज्यसभेच्या एका जागेवरून महाविकास आघाडीचं अखेर ठरलं आणि शरद पवारांच्या नावावर शिक्कामोर्तब झालं. शरद पवारांनी त्यांचा उमेदवारी अर्जदेखील भरला. यावेळी ठाकरेंच्या शिवसेनेचे भास्कर जाधव, काँग्रेसचे सतेज पाटील, राष्ट्रवादीच्या सुप्रिया सुळे यांच्यासह महाविकास आघाडीचे प्रमुख नेते उपस्थित होते. मात्र, यावेळी आदित्य ठाकरे उपस्थित नसल्याने त्याची चर्चा सुरू झाली. त्यावर ठाकरेंचे नेते सचिन अहिर यांनी त्यावर स्पष्टीकरण दिलं आहे. 

महाविकास आघाडीच्या वाट्याला येणाऱ्या एकमेव जागेवर आदित्य ठाकरे आग्रही होते. ही जागा कोणत्याही परिस्थितीत शिवसेनेला मिळावी यासाठी त्यांनी आग्रही भूमिका घेतली होती. त्याचवेळी राष्ट्रवादीने शरद पवारांचं नाव पुढे केलं. अशाही परिस्थितीत ही जागा आपल्यालाच मिळवी यासाठी आदित्य ठाकरे आग्रही होते. नंतर काँग्रेसच्या नेत्यांनी शरद पवारांना पाठिंबा दिला आणि महाविकास आघाडीकडून शरद पवारांचं नाव अंतिम झालं.

या सर्व घडामोडी घडत असताना आदित्य ठाकरे मात्र नाराज असल्याच्या चर्चा सुरू झाल्या. त्यामुळेच आदित्य ठाकरे हे शरद पवारांचा फॉर्म भरण्यासाठी आले नाहीत अशी कुजबूजही सुरू झाली. मात्र आता सचिन अहिर यांनी त्यावर स्पष्टीकरण दिलं आहे. 

काय म्हणाले सचिन अहिर?

सचिन अहिर म्हणाले की, आदित्य ठाकरे हे या जागेबद्दल बोलले होते हे नाकारता येत नाही. मात्र निर्णय उद्धव ठाकरे यांनी घेतला. जंयंत पाटील, सुप्रिया सुळे हे उद्धव ठाकरेंना भेटले आणि चर्चा केली. त्यानंतर हा निर्णय घेतला असेल. आदित्य ठाकरे हे आले नसले तरी शरद पवार यांचा अर्ज भरताना आमचे नेते भास्कर जाधव, अनिल परब आणि आपण स्वतः उपस्थित होतो. काल पत्रकार परिषद झाली तेव्हा आम्ही उपस्थित राहायचं असा काही ठरलं नव्हतं. त्यामुळे त्या दोन पक्षांनी पत्रकार परिषद घेतली. पण आमचा पाठिंबा त्यांना आहे.  

आदित्य ठाकरे आणि उद्धव ठाकरे हे अर्जुन तेंडुलकर यांच्या विवाह सोहळ्याला उपस्थित राहिले. त्यामुळेच ते पवारांचा अर्ज भरताना उपस्थित राहू शकले नाहीत असं सचिन अहिर यांनी स्पष्ट केलं. 

Maharashtra Candidate List Rajya Sabha Election : राज्यसभेसाठी महाराष्ट्रातून कोणाला उमेदवारी? 

भाजपचे उमेदवार- (BJP Rajya Sabha Election Candidate List)

• रामदास आठवले (Ramdas Athawale) 
• विनोद तावडे (Vinod Tawde) 
• माया चिंतामण ईवनाते (Maya Ivnate) 
• रामराव वडकुते (Ramrao Wadkute) 

शिवसेना शिंदे गट- ज्योती वाघमारे

राष्ट्रवादी काँग्रेस अजित पवार गट- पार्थ पवार (Parth Pawar)

महाविकास आघाडी - शरद पवार (Sharad Pawar)

ही बातमी वाचा: