Ganesh Naik : गणेश नाईक यांच्यावर अटकेची टांगती तलवार, अटकपूर्व जामीन न्यायालयाने नाकारला
रिव्हॉल्वर दाखवून धमकावणे या प्रकरणात भाजप नेते गणेश नाईक यांच्यावर गुन्हा दाखल असून त्यामध्ये त्यांना जामीन नाकारला आहे.
मुंबई: भाजपचे नेते आणि आमदार गणेश नाईक यांना न्यायालयाने कोणताही दिलासा देण्यास नकार दिला आहे. गणेश नाईक यांचा अटकपूर्व जामीन नाकारला असून त्यांच्यावर आता अटकेची टांगती तलवार आहे. गणेश नाईक यांच्या अंतरिम जामीनावर येत्या 27 तारखेला सुनावणी होणार आहे.
गणेश नाईक यांच्या विरोधात रिव्हॉल्वर दाखवून धमकावणे आणि बलात्काराचा आरोप या दोन केसेस ठाणे जिल्हा सत्र न्यायालयात सुरू आहेत. त्यामध्ये रिव्हॉल्वर दाखवून धमकावणे यावर आज सुनावणी सुरू असून त्यावर गणेश नाईकांना कोणताही दिलासा देण्यास न्यायालयाने नकार दिला आहे. या संबंधी पोलिसांना काय वाटतं हे महत्वाचं असून ते समोर आल्याशिवाय जामीन देता येणार नाही असं न्यायालयाने म्हटलं आहे. त्यामुळे आता या दोन्ही केसवरील अंतरिम जामीनासंबंधी सुनावणी ही 27 तारखेला होणार आहे.
जीवाला धोका असल्याचा महिलेचा आरोप
गणेश नाईक यांच्या विरोधात तक्रार करणाऱ्या पीडित महिलेने आपल्या जीवाला धोका असल्याचा एक व्हिडीओ सध्या सोशल मीडियावर व्हायरल होत आहे.पीडित महिला आपल्या व्हायरल व्हिडीमध्ये म्हणाल्या की, माझ्यासह माझ्या मुलाच्या जीवाला धोका आहे. माझ्या जीवाचे कधीही बरे वाईट होऊ शकते. माझ्या अपहरणाची शक्यता आहे किंवा कधीही माझ्या हत्येचा कट रचण्याची शक्यता आहे. मला सर्वांनी सहकार्य करावे अशी विनंती मी करत आहे. मला सरकाराकडून जे सहकार्य मिळाले त्यासाठी मी सरकारची आभारी आहे. मला आणि माझ्या मुलाला न्याय मिळेपर्यंत सर्वांनी मला असेच सहकार्य करा.
काय आहे प्रकरण?
भाजप नेते गणेश नाईक यांच्यावर बलात्काराचा गुन्हा दाखल झाला आहे. दीपा चौहान यांनी त्यांच्यावर बलात्काराचा आरोप केला आहे. याबाबत बोलताना दीपा चौहान म्हणाल्या की, गणेश नाईक यांच्यासोबत गेल्या 27 वर्षापासून आपण लिव्ह-इन रिलेशनशिप'मध्ये राहत असून त्यांच्यासोबतच्या संबंधातून 15 वर्षाचा मुलगा झाला आहे. गणेश नाईक यांनी आपल्या मुलाला वडिलांचे नाव द्यावे.
गणेश नाईक यांनी यासाठी नकार दिल्याने दीपा चौहान यांनी थेट पोलीस ठाणे गाठत त्यांच्यावर बलात्कार केल्याचा गुन्हा दाखल केला आहे. आपल्याला न्याय मिळावा यासाठी दीपा चौहान यांनी महाराष्ट्र महिला आयोगाकडे तक्रार केली असून वेळ पडल्यास कोर्टात जाणार असल्याचे त्यांनी सांगितले आहे. दरम्यान, गेल्या सहा महिन्यांपासून आपली गणेश नाईक यांच्या बरोबर भेट झाली नसल्याचे त्यांनी सांगितले आहे. पोलीस ठाण्यात तक्रार दाखल केल्यानंतर मुलाबरोबर सुरू असलेले बोलणे गणेश नाईक यांनी बंद केल्याचेही दीपा चौहान यांनी सांगितलं आहे.
महत्त्वाच्या बातम्या:
महत्त्वाच्या बातम्या
