कल्याण डोंबिवली महापालिकेचा 1773 कोटी 56 लाखाचा अर्थसंकल्प सादर, कोणतीही कर दरवाढ नाही

KDMC Budget :  कल्याण डोंबिवली महापालिकेचा 1773 कोटी 56 लाखाचा अर्थसंकल्प सादर केला आहे. यंदाच्या बजेटमध्ये नागरिकांवर कोणतीही कर दरवाढ लादलेली नसल्यामुळे नागरिकांना दिलासा मिळाला आहे.

Kalyan Dombivali Corporation

कल्याण - डोंबिवली : कल्याण डोंबिवली महापालिकेचा 2022-23 या वर्षाचा अर्थसंकल्प आयुक्त डॉ. विजय सूर्यवंशी यांनी सादर केला. ते प्रशासक असल्याने त्यांनी सादर केलेल्या अर्थसंकल्पाला तात्काळ मंजूरीही दिली. यंदाचे बजेट हे 1773 कोटी 56 लाख जमेच्या बाजूचे असून विविध कामाकरता खर्चाची तरतूद 1774 कोटी रुपये ठवली आहे. येत्या वर्षातही आरोग्य सेवा बळकट करण्यावर भर दिला जाणार असल्याचे आयुक्तांनी सांगितले.  यंदाच्या बजेटमध्ये नागरिकांवर कोणतीही कर दरवाढ लादलेली नसल्यामुळे नागरिकांना दिलासा मिळाला आहे.

यंदाच्या अर्थसंकल्पात उद्याने विकसीत केली जाणार आहे. खेळाडूंकरता मैदाने विकसित करत अद्यावत सुविधा दिल्या जाणार आहे. महापालिका क्षेत्रातील पाच तलावांचा विकास करण्यात येणार आहे. त्याचबरोबर महापालिकेच्या शाळेत शिकणाऱ्या शिक्षणाचा दर्जा उंचाविण्यासाठी महापालिकेच्या शाळा सीबीएससी बोर्डाचा अभ्यासक्रम लागू करण्याची योजना महापालिकेच्या आयुक्तांनी आखली आहे. कचऱ्याचे निर्मूलन करण्यासाठी वेस्ट टू एनर्जी महापालिकेसह आसपासच्या महापालिकांना समावून घेणारी घनकचरा व्यवस्थापनाचे क्लस्टर योजना राबविण्याचा मानस आयुक्तांनी व्यक्त केला आहे. दरम्यान महापालिका हद्दीत 13 मार्च रोजी पहिला कोरोना रुग्ण आढळून आला होता. मात्र आज महापालिका हद्दीत कोरोना रुग्णांची संख्या शून्य आहे. याविषयी आयुक्तांनी आनंद व्यक्त केला.

अर्थसंकल्पातील ठळक तरतुदी

• माय सिटी – फिट सिटीअतंर्गत नागरिकांच्या क्रीडा गुणाचा व आरोग्याचा विकास करण्यासाठी राखीव भूखंडावरील अतिक्रमण निष्कासित करून सदर भूखंड मैदाने खेळासाठी वापरणे, किमान 50 कबड्डी स्टेडियम, 3 फुटबॉल, 5 क्रिकेट, 25 होलीबोल, 10 खोखो मैदाने विकसित करणार. खेळाच्या मैदानावर राजकीय समारंभ, लग्न समारंभ आयोजित करण्यास परवानगी न देण्याचा धोरणात्मक निर्णय घेणार
• उड्डाणपूल – डोंबिवली पश्चिम येथे मोठागाव ठाकुर्ली, व टिटवाळा लेव्हल क्रॉसिंग येथे उड्डाणपूल, कोपर उड्डाण पुलाला समांतर पूल उभारणार. भटक्या आणि पाळीव प्राण्यांकरता स्वतंत्र स्मशानभूमी उभारणार
• अग्निशमन बळकटीकरणासाठी 702 मीटर उंच हायड्रोलिक प्लॅटफॉर्म अग्निशमन वाहन खरेदी करणार, 10 हजार लिटर क्षमतेचे 3 वाटर ब्राउजर अग्निशमन वाहन खरेदी करणार फायरमन, चालक - यंत्रचालक वर्गातील कर्मचारी ठोकपगारी व कंत्राटी पद्धतीने घेणार
• शहराचे सौंदर्यीकरण करण्यासाठी आणि नागरिकांच्या विरंगुळ्यासाठी उंबर्डे, गौरीपाडा व निळजेसह किमान पाच तलावाचे सुशोभीकरण करणार
• बायो डायव्हर्सिटी पार्क, दिव्यांगासाठी उद्यान, वाहतूक उद्यान अशा प्रकारची 10 उद्याने विकसित करणार
• पक्षी निरीक्षण मनोरे, नेहरू तारांगणच्या धर्तीवर तारांगण
• आरोग्य व्यवस्थेसाठी – नवीन प्रसूतीगृहे, 150 खाटाचे पीपीपी तत्वावर मल्टीस्पेशालिटी हॉस्पिटल, टिटवाळा येथे 50 खाताचे सामान्य रुग्णालय, रुक्मिणीबाई शास्त्रीनगर मधील आयसीयू खाटा उपलब्ध करून देणार, या दोन्ही रुग्णालयात लहान मुलासाठीचे आयसीयु, प्रसूतीगृहात 10 खाटाचे एनआयसीयू सुरु कणार
• केंद्र सरकारच्या मदतीने 68 ठिकाणी हेल्थ वेलनेस सेंटर उभारणार
• 10 ठिकाणी केंद्र सरकारच्या मदतीने पॉलिक्लिनिक उभारणार

प्राथमिक शिक्षण

1. येत्या शैक्षणिक वर्षापासून सीबीएससी बोर्डाच्या तीन शाळा सुरु करणार
2. आठवी पर्यंतच्या माध्यमिक शाळा दहावीपर्यंत वाढविणार
3. विद्यार्थ्यांसाठी इंग्रजी भाषा सुधारण्यासाठी तज्ञ संस्थेच्या मदतीने विशेष इंग्लिश  स्पिकिंग प्रशिक्षण देणार 
4. पाण्याची गरज भागविण्यासाठी कोंढाणे किंवा पोशीर धरणातून वाढीव पाणीसाठा मिळविण्यासाठी प्रयत्न करणार तसेच बारावे जलशुद्धीकरण केंद्रातून वाया जाणारे 40 टक्के पाणी वाचवण्यासाठी यंत्रणा उभारणार 

इतर महत्त्वाच्या बातम्या :

अर्थसंकल्पीय अधिवेशनाचा दुसरा दिवस; ओबीसी आरक्षण, मलिकांच्या राजीनाम्यावरुन विरोधक आक्रमक होणार

'प्रत्येक राज्यात राज्यपाल, महाराष्ट्रात मात्र भाजपाल'; नाना पटोलेंची राज्यपालांवर टीका