Maharashtra Assembly Session: शिंदे गटाकडून आदित्य ठाकरे लक्ष्य; व्यंगचित्राच्या बॅनरसह विधीमंडळाच्या पायऱ्यांवर घोषणाबाजी

Maharashtra Assembly Session Aaditya Thackeray: शिंदे गटाच्या आमदारांनी आता थेट शिवसेना नेते आदित्य ठाकरे यांनाच लक्ष्य केले. विधीमंडळाच्या पायऱ्यांवर शिंदे गटाच्या आमदारांनी आदित्य ठाकरेंविरोधात घोषणाबाजी केली.

Maharashtra Assembly Session: शिंदे गटाकडून आदित्य ठाकरे लक्ष्य; व्यंगचित्राच्या बॅनरसह विधीमंडळाच्या पायऱ्यांवर घोषणाबाजी

Maharashtra Assembly Session Aaditya Thackeray:  विधीमंडळ अधिवेशनाच्या शेवटच्या दिवशी शिंदे गटाच्या (Shivsena rebel mla) आमदारांनी थेट शिवसेना नेते आणि युवासेना प्रमुख आदित्य ठाकरे (Aaditya Thackeray) यांनाच लक्ष्य केले आहे. शिंदे गटाच्या आमदारांनी विधीमंडळांच्या पायऱ्यावर आदित्य ठाकरे यांचे घोड्यावर उलट्या दिशेने बसलेल्या व्यंगचित्राचे बॅनर झळकावत घोषणाबाजी केली. आम्ही मातोश्री आणि ठाकरे कुटुंबावर टीका करणार नसल्याचे वारंवारपणे शिंदे गटाकडून सांगण्यात येत होते. मात्र, मागील दोन दिवसांपासून शिंदे गटाने मातोश्री आणि ठाकरे कुटुंबाला लक्ष्य केले आहे. 

विधीमंडळ अधिवेशनात शिवसेना आणि महाविकास आघाडीत संघर्षाची ठिणगी पडणार असल्याचा अंदाज वर्तवण्यात येत होता. विधीमंडळ अधिवेशन सुरू झाल्यानंतर महाविकास आघाडीकडून शिंदे गटाविरोधात जोरदार घोषणाबाजी करण्यात आली होती. त्यानंतर बुधवारपासून शिंदे गटानेही महाविकास आघाडी आणि विशेषत: शिवसेनेविरोधात घोषणाबाजी सुरू केली. बुधवारी शिंदे गटातील आमदार महेश शिंदे आणि राष्ट्रवादी काँग्रेसचे आमदार अमोल मिटकरी यांच्यात बाचाबाचीदेखील झाली होती. 

>> आदित्य यांच्याविरोधात कोणत्या घोषणा?

आदित्य ठाकरे यांच्याविरोधात शिंदे गटाने बॅनर, घोषणांचे बॅनर झळकावत घोषणाबाजी केली. बॅनरवर शिंदे गटाने 'महाराष्ट्राचे परम पूज्य (प पु) युवराज' असा बॅनर झळकावला. या बॅनरवर आदित्य ठाकरे यांचे घोड्यावर उलट दिशेने बसलेले व्यंगचित्र आहे. घोड्याचे तोंड हिंदुत्वाच्या दिशेने असून आदित्य यांचे तोंड महाविकास आघाडीकडे असल्याचे दाखवण्यात आले. वर्ष 2014 मध्ये 151 चा हट्ट करत युती बुडवली, 2019 मध्ये खुर्चीसाठी हिंदुत्वाची विचारधारा पायदळी तुडवली अशी घोषणा होती. 
आदित्य ठाकरे यांच्यावर आज शिंदे गटाने वैयक्तिक हल्ला चढवला. 
> पर्यटन खाते घेऊन घरातच बसून केला कहर, सत्ता गेल्यावर पर्यटनाची आली कहर
> पुन्हा निवडणूक लढवण्याची देतात ठसन, स्वत: आमदार व्हायला महापौर आणि दोन MLC चे लागते कुशन
> खुर्चीवर बसल्यावर शिवसैनिकाला केले तडीपार, सत्ता गेल्यावर फिरतात दारोदार
> युवराजांची 'दिशा' नेहमीच चुकली

या घोषणादेखील शिंदेगटाच्या आमदारांनी झळकाल्या. शिंदे गटाच्या या घोषणाबाजीमुळे शिवसेना आणि शिंदे गटातील संघर्ष आणखी तीव्र होण्याचा अंदाज व्यक्त केला जात आहे. 

पाहा व्हिडिओ: विधानभवनाच्या पाऱ्यांवर शिंदे गटाकडून आदित्य ठाकरेंविरोधात घोषणाबाजी

इतर महत्त्वाच्या बातम्या: