आमदार रमेश लटके यांच्यावर अंत्यसंस्कार; मुख्यमंत्र्यांकडून कुटुंबियांचं सांत्वन, शिवसेना नेत्यांची हजेरी

शिवसेनेचे आमदार रमेश लटके यांच्यावर आज (13 मे) मुंबईत अंत्यसंस्कार करण्यात आले. मुख्यमंत्री उद्धव ठाकरे यांनी कुटुंबियांसह रमेश लटके यांच्या पार्थिवाचं दर्शन घेऊन त्यांच्या कुटुंबियांचं सांत्वन केलं.

Ramesh Latke Funeral

मुंबई : शिवसेनेचे आमदार रमेश लटके यांच्यावर आज (13 मे) मुंबईत अंत्यसंस्कार करण्यात आले. यावेळी राज्याचे मुख्यमंत्री आणि शिवसेना पक्षप्रमुख उद्धव ठाकरे यांनी कुटुंबियांसह रमेश लटके यांच्या पार्थिवाचं दर्शन घेतलं आणि त्यांच्या कुटुंबियांचं सांत्वन केलं. आज सकाळी अकरा वाजता मुख्यमंत्र्यांनी रमेश लटके यांच्या पार्थिवाचं दर्शन घेतलं. यावेळी त्यांच्यासोबत त्यांच्या पत्नी रश्मी ठाकरे, पर्यटन मंत्री आदित्य ठाकरे, परिवहन मंत्री अनिल परब उपस्थित होते.

मुंबईतील अंधेरी पूर्व विधानसभा मतदारसंघाचे आमदार रमेश लटके बुधवारी (11 मे) संध्याकाळी दुबईत हृदयविकाराने निधन झालं. ते दुबईला आपल्या कुटुंबासह फिरायला गेले होते. परंतु तिथेच हृदयविकाराचा झटका आल्याने त्यांचं निधन झालं. वयाच्या 52 व्या वर्षी त्यांनी अखेरचा श्वास घेतला. गेल्या महिन्यात 21 एप्रिल रोजी त्यांनी आपला वाढदिवस साजरा केला होता. ते मूळचे ​कोल्हापुरातील शाहूवाडीचे होते. 

निधनानंतर रमेश लटके यांचं पार्थिव दुबईहून मुंबईत आणण्यात आलं. त्यानंतर आमदार भवन इथे त्यांचे पार्थिव अंतिम दर्शनासाठी ठेवण्यात आलं होतं. मुख्यमंत्र्यांनी आमदार रमेश लटके यांना श्रद्धांजलीही वाहिली. यावेळी त्यांच्या पत्नी रश्मी ठाकरे, उपमुख्यमंत्री अजित पवार, शिवसेना नेते आणि नगरविकास मंत्री एकनाथ शिंदे, पर्यावरण मंत्री आदित्य ठाकरे, परिवहन मंत्री अनिल परब यांचीही उपस्थिती होती. एक कडवट शिवसैनिक गमावल्याच्या भावना यावेळी उपस्थित शिवसेना नेत्यांनी व्यक्त केली.

रमेश लटके यांच्या निधनाने शिवसेनेला मोठा धक्का बसला आहे. दांडगा जनसंपर्क असलेल्या आमदाराच्या निधनाने मतदारसंघात देखील शोककळा पसरली आहे. 52 वर्षात त्यांचा राजकीय प्रवास मात्र भन्नाट होता. शिवसेनेचा अंधेरी भागातला एक विश्वासू चेहरा अशी त्यांची ओळख होती. एक नजर टाकूया रमेश लटके यांच्या राजकीय कारकिर्दीवर

सार्वजनिक गणेश मंडळाचे अध्यक्ष ते आमदार
- रमेश लटके यांनी सार्वजनिक गणेश मंडळाच्या अध्यक्षपदापासून आपल्या कारकिर्दीची सुरुवात केली. 
- गटप्रमुख ते आमदार असा त्यांचा अफलातून राजकीय प्रवास होता. 
- या प्रवासादरम्यान त्यांनी शाखाप्रमुख, नगरसेवक ही आणि अशी विविध पदं यशस्वीरित्या भूषवली. 
- रमेश लटके यांनी 1997 ते 2012 अशा सलग 3 वेळा नगरसवेक पद भूषवलं. 
- त्यानंतर 2014 मध्ये लटके यांनी पहिल्यांदा अंधेरी पूर्व विधानसभा मतदारसंघातून निवडणूक लढवली होती.

तीन वेळा नगरसेवक, सलग दोन वेळा आमदार
- 1997 साली मुंबई महानगरपालिकेत शिवसेनेचे नगरसेवक म्हणून लटके हे निवडून आले. 
- त्यानंतर 2002 आणि 2009 च्या महापालिका निवडणुकीत विजयी होत ते महापालिकेत नगरसेवक म्हणून निवडून गेले. 
- तर 2014 च्या विधानसभा निवडणुकीत ते विधानसभेचे आमदार म्हणून निवडून आले. 
- त्यानंतर 2019 च्या विधानसभेच्या निवडणुकीत अंधेरी पूर्वच्या मतदारांनी त्यांच्यावर विश्वास दाखवत त्यांना पुन्हा निवडून दिले.