Sanjay Raut: छगन भुजबळ अजितदादांची साथ सोडणार, ठाकरे गटात प्रवेश करणार का? संजय राऊत म्हणाले....

Maharashtra Politics: संजय राऊत यांनी छगन भुजबळ शिवसेनेत प्रवेश करणार का, याविषयी भाष्य केले. छगन भुजबळ हे अजितदादा गटात नाराज असल्याचे सांगितले जाते. त्यांना राज्यसभेवर जायचे होते. पण अजित पवार गटाने सुनेत्रा पवार यांना संधी दिली.

Chhagan Bhujbal & Sanjay Raut

Source : Chhagan Bhujbal & Sanjay Raut \ ABP Majha

मुंबई: आधी लोकसभा आणि नंतर राज्यसभा निवडणूक लढवण्याची इच्छा असूनही संधी न मिळाल्यामुळे नाराज असलेले अजित पवार गटाचे नेते छगन भुजबळ हे उद्धव ठाकरे यांच्या नेतृत्त्वाखाली प्रवेश करणार असल्याची चर्चा राजकीय वर्तुळात सुरु होती. या पार्श्वभूमीवर ठाकरे गटाचे खासदार संजय राऊत यांनी महत्त्वाचे वक्तव्य केले आहे. छगन भुजबळ (Chhagan Bhujbal) आणि शिवसेनेचा आता कोणताही संबंध नाही. छगन भुजबळ आणि शिवसेनेत बोलणी सुरु आहेत, अशा अफवा राजकीय संभ्रम निर्माण करण्यासाठी पसरवल्या जात आहेत. मात्र, यामध्ये कोणतेही तथ्य नाही, असे संजय राऊत यांनी म्हटले. ते बुधवारी मुंबईत आयोजित करण्यात आलेल्या पत्रकार परिषदेत बोलत होते.   

यावेळी त्यांनी छगन भुजबळ यांच्या शिवसेनेत प्रवेश करण्याच्या वृत्ताचे खंडन केले. छगन भुजबळ एकेकाळी शिवसेनेत होते. त्याला बराच काळ उलटला. त्यानंतर छगन भुजबळ काँग्रेसमध्ये, त्यानंतर राष्ट्रवादी काँग्रेसमध्ये गेले आणि आता अजितदादा गटात आहेत. त्यांच्या राजकीय प्रवासात शिवसेनेचे वळण बरेच मागे पडले आहे. त्यामुळे आपण बोलताय त्या अफवेत तथ्य नाही. छगन भुजबळ यांच्याशी शिवसेनेचा कोणताही राजकीय संवाद झालेला नाही, तो होण्याची शक्यता नाही. कारण भुजबळांनी स्वत:चा मार्ग निवडला आहे. त्यांच्या आताच्या भूमिकांशी शिवसेनेच्या भूमिका मेळ खाणार नाहीत. ते शिवसेनेत येणार अशा बातम्या उडवून महाराष्ट्रात गोंधळ उडवला जात आहे. पण छगन भुजबळ यांना शिवसेनेचा कोणताही नेता भेटलेला नाही, भेटणारही नाही, असे संजय राऊत यांनी सांगितले. 

तेलुगू देसमचा प्रस्ताव आला तर नक्की विचार करु: संजय राऊत

भविष्यात तेलुगू देसम पक्षाकडून काही प्रस्ताव आला तर इंडिया आघाडीकडून त्याचा नक्कीच विचार केला जाईल. आम्ही गप्प बसणार नाही, जिथं जिथं संधी मिळेल आम्ही विरोध करणार, असे संजय राऊत यांनी म्हटले. आज आमचा 58 वा वर्धापन दिनय आहे. शिवसेना ही बेईमान लोकांना छातीवर घेऊन नाही तर निष्ठावंतांनी शिवसेना इथपर्यंत आणली आहे. डबल इंजिनवाली युती मग ट्रिपल झाली, मग मनसेला सोबत घेतलं... काय झालं? अजून काही छुपे इंजिनपण आहेतच. त्यांनी आता महाराष्ट्रात 400 पार करावेत, आमची काहीत हरकत नाही, असा टोला संजय राऊत यांनी भाजपला लगावला.

छगन भुजबळ यांचं म्हणणं काय?

छगन भुजबळ हे शिवसेनेत जाणार असल्याची जोरदार चर्चा राजकीय वर्तुळात रंगली आहे. याविषयी 'एबीपी माझा'च्या कार्यक्रमात त्यांना विचारणा केली असता त्यांनी म्हटले की, मी कोणत्याही पक्षात जाणार नाही, तसंच कोणत्याही नेत्याला भेटलो नाही. मी दादांसोबत नाही तर राष्ट्रवादी काँग्रेससोबत आहे, असे सूचक वक्तव्य त्यांनी केले. 

आणखी वाचा