धक्कादायक! पत्नीला रेल्वेखाली ढकलून मुलांसह पती फरार, पत्नीचा जागीच मृत्यू   

Crime News : आज पहाटे चार वाजण्याच्या दरम्यान पतीने आपल्या पत्नीला एक्सप्रेस ट्रेन येण्याच्या एक मिनिट आधी झोपेतून उठविले आणि पुढे खेचत आणून एक्स्प्रेस येताच प्लॅटफॉर्म वरून रुळावर ढकलून दिले.

File Photo

मुंबई  : वसई (Vasai) रेल्व स्थानकात पतीने पत्नीला झोपेतून उठवून तिला रेल्वेखाली ( Train) ढकलून दिले. यात पत्नीचा जागीच मृत्यू झालाय. पत्नीला ढकलून देऊन पती आपल्या दोन मुलांसह फरार झालाय. ही धक्कादायक घटना आज पहाटे  चार वाजण्याच्या सुमारास घडली आहे. हा सर्व प्रकार रेल्वे स्थानकातील सीसीटीव्ही कॅमेऱ्यात कैद झाला आहे. या प्रकरणी वसई लोहमार्ग पोलीस ठाण्यात अज्ञात आरोपी विरोधात गुन्हा दाखल झाला असून त्याच्या शोधासाठी पोलिसांची दोन पथके रवाना झाली आहेत.  

वसई रोड रेल्वे स्थानकातील प्लॅटफॉर्म क्रमांक पाचवर रात्री संशयित आपल्या पत्नी आणि दोन मुलांसह येऊन झोपला होता. आज पहाटे चार वाजण्याच्या दरम्यान पतीने आपल्या पत्नीला एक्सप्रेस ट्रेन येण्याच्या एक मिनिट आधी झोपेतून उठविले आणि पुढे खेचत आणून एक्स्प्रेस येताच प्लॅटफॉर्म वरून रुळावर ढकलून दिले. ही धक्कादायक घटना सीसीटीव्ही कॅमेऱ्यात कैद झाली आहे. यात अंगावरून ट्रेन गेल्याने पत्नीचा जागीच मृत्यू झालाय. 

पहाटे चार ते सव्वा चारच्या सुमारास एक्स्प्रेस वसई रोड रेल्वेस्थानाकातून जाते. याच ट्रेनखाली ती महिला आल्याने तिचा जागीच मृत्यू झाला आहे. ट्रेनखाली पत्नी चिरडली असल्याचे लक्षात येताच पतीने तत्काळ आपल्या पाठीवर बॅग लटकावून एका मुलाला काखेला तर एका मुलाला हाताला धरून फरार झाला. या संपूर्ण प्रकार प्लॅटफॉर्मवरील सीसीटीव्हीमध्ये कैद झाले आहे. 

वसई लोहमार्ग पोलिसांनी सीसीटीव्ही तपासाले असता त्यात घातपात असल्याचे समोर आल्यामुळे लोको पायलट यांच्या जवाबावरून हत्येचा गुन्हा दाखल केला आहे. गुन्ह्याचा तपास करताना हा आरोपी आपल्या मुलांना घेऊन वसईहून दादर मार्गे कल्याण पर्यंत गेला असल्याचे समोर आले आहे. पण पुढचा आणखी शोध लागला नाही.  वसई लोहमार्ग पोलीस, आरपीएफ, गुन्हे शाखा हे सर्वजण समांतर तपास करीत असल्याचेही पोलिसांनी सांगितले आहे. पण पतीने हे पाऊल का उचलले हे मात्र आरोपी अटक झाल्या नंतरच समोर येईल, अशी माहिती सहाय्यक पोलीस आयुक्त बाजीराव महाजन यांनी दिलीय.  

महत्वाच्या बातम्या