![ABP Premium](https://cdn.abplive.com/imagebank/Premium-ad-Icon.png)
Mumbai Water Cut: पाणीकपातीचा 'मेगाब्लॉक'; मुंबईत उद्या-परवा 24 तासांसाठी पाणीकपात, तुमच्या भागात काय असणार स्थिती?
Mumbai Water Cut: पाणीपुरवठा करणाऱ्या पाईपलाईनच्या दुरुस्तीच्या कामासाठी मुंबईत उद्या-परवा अर्थात 29-30 नोव्हेंबर रोजी पाणीपुरवठा बंद असणार आहे.
![Mumbai Water Cut: पाणीकपातीचा 'मेगाब्लॉक'; मुंबईत उद्या-परवा 24 तासांसाठी पाणीकपात, तुमच्या भागात काय असणार स्थिती? BMC announces water cut in various areas of Mumbai on 29 and 30 november Mumbai Water Cut: पाणीकपातीचा 'मेगाब्लॉक'; मुंबईत उद्या-परवा 24 तासांसाठी पाणीकपात, तुमच्या भागात काय असणार स्थिती?](https://feeds.abplive.com/onecms/images/uploaded-images/2022/11/28/3373b010546ed9814acd64283e28b6a21669606034283290_original.jpg?impolicy=abp_cdn&imwidth=1200&height=675)
Mumbai Water Cut: मुंबईतील विविध भागांमध्ये उद्या आणि परवा अर्थात 29-30 नोव्हेंबर रोजी पाणीपुरवठा (Mumbai Water Supply) विस्कळीत राहणार आहे. दुरुस्तीच्या कामासाठी मुंबईतील काही ठिकाणचा पाणी पुरवठा 24 तास बंद राहणार आहे. मुंबईतील अनेक प्रभागांमध्ये मंगळवारी, 29 नोव्हेंबर सकाळी 8.30 वाजल्यापासून ते 30 नोव्हेंबरपर्यंत सकाळी 8.30 वाजेपर्यंत पाणीपुरवठा बंद असणार आहे. पवई आणि वेरावली दरम्यान पाणीपुरवठा करणाऱ्या पाईपलाईनची दुरुस्ती करण्यात येणार आहे. यामध्ये पाणी गळती रोखण्यासह इतर कामांचाही समावेश आहे. पवईतील 300 मिमी पाइपलाइन तसेच पाण्याचा प्रचंड दाब असलेल्या 1800 मिमी पाईपलाईनची दुरुस्ती करण्यात येणार आहे.
या प्रभागात पाणीपुरवठा बंद असणार
मुंबईतील के-पश्चिम या प्रभागातील पाणीपुरवठा संपूर्णपणे बंद असणार आहे. तर, के-पूर्व, एच-पश्चिम, एच-पूर्व, पी-दक्षिण, एस, एल आणि एन या प्रभागातील काही ठिकाणी पाणीपुरवठा होणार नाही.
के पश्चिम वॉर्डात राहणार्या सुमारे 7.5 लाख लोकांना 24 तासांच्या पाणीकपातीचा फटका बसेल असा अंदाज आहे. ओशिवरा, लोखंडवाला, विलेपार्ले पश्चिम, अंधेरी पश्चिम आणि जुहू यासारख्या ठिकाणी 24 तास पाणी पुरवठा बंद असणार आहे. या या प्रभागात असणाऱ्या महापालिकेच्या कूपर रुग्णालयासाठी टँकरने पाणीपुरवठा करण्यात येणार आहे.
के-पूर्व भागात अंधेरी पूर्व, एमआयडीसी, सीप्झ, जोगेश्वरी पूर्व आदी ठिकाणांचा समावेश आहे. गुंदवली, नेहरू नगर आणि आझाद नगर या भागात 29 नोव्हेंबर रोजी पाणीकपात होणार आहे. तर आनंद नगर, समर्थ नगर आणि शेर-ए-पंजाब भागात 30 नोव्हेंबरला पाणीपुरवठा कपात होणार आहे. तर, उर्वरित भागात पाणीपुरवठा कमी दाबाने होणार आहे.
या ठिकाणी कमी दाबाने पाणी
तर, के-पूर्व, जी-उत्तर, पी-दक्षिण या प्रभागात पाणीपुरवठा होणार आहे. मात्र, हा पाणीपुरवठा कमी दाबाने होणार आहे. एच-पश्चिम प्रभागातील पाणीपुरवठ्याची वेळ कमी करण्यात येणार आहे. तर, 30 नोव्हेंबर रोजी कमी दाबाने पाणीपुरवठा होणार आहे.
मुंबई पूर्व आणि पश्चिम उपनगरात पाणीपुरवठा वाढवण्यासाठी आणि पाणीपुरवठ्याचे जाळे आणखी मजबूत करण्यासाठी मुंबई महापालिकेच्यावतीने वेरावली ते घाटकोपर दरम्यान, 6.6 किलोमीटरचा बोगदा बांधला जात आहे.
इतर महत्त्वाच्या बातम्या:
महत्त्वाच्या बातम्या
ट्रेंडिंग न्यूज
![ABP Premium](https://cdn.abplive.com/imagebank/metaverse-mid.png)