Mumbai Rain Update : मुंबईकरांनो सावधान! पावसाचा धोका वाढला, यलो अलर्ट बदलून ऑरेंज अलर्ट जारी 

MMRDA Rain Update : मुंबईसह आसपासच्या परिसरात अर्था एमएमआरडीए भागात मुसळधार पावसाने हजेरी लावल्यामुळे पुढील काही काळातच मुंबईसह आसपासच्या परिसरातील जनजीवन विस्कळीत होण्याची शक्यता निर्माण झाली असून यामुळेच मुंबई प्रादेशिक हवामान केंद्राने यलो अलर्ट बदलून ऑरेंज अलर्ट जारी केला आहे.

प्रातिनिधीक फोटो

Rain Update : मुंबई, नवी मुंबई, ठाणे, पालघर अशाप्रकारे जवळपास संपूर्ण एमएमआरडीए (MMRDA) परिसरात गेल्या काही तासांपासून तुफान पावसाने हजेरी लावली आहे. काही ठिकाणी तर अतिमुसळधार पाऊस सुरु असून हा पाऊस वाढण्याची शक्यताही हवामान विभागाने वर्तवली आहे. त्यामुळेच मुंबईसह परिसरातील यलो अलर्ट आता बदलून ऑरेंज अलर्ट झाला आहे. म्हणजेच याठिकाणी देण्यात आलेला  धोक्याचा ईशारा आता आणखी वाढला आहे. तसंच या सर्व ठिकाणी पुढील काही दिवस आणखी अतिवृष्टीची शक्यता वर्तविली आहे.

पुढील काही दिवस महाराष्ट्रात जोरदार पावसाची शक्यता देखील भारतीय हवामान विभागाने दिली आहे. अरबी समुद्रात कमी दाबाचा पट्टा असल्यानं तसेच बंगालच्या उपसागरात देखील कमी दाबाचे क्षेत्र तयार होत असल्यानं मुंबईसह परिसर आणि महाराष्ट्रातील अनेक ठिकाणी मुसळधार पावसाचा अंदाज व्यक्त केला जात आहे. मुंबईततर सायंकाळी पावसाचा जोर आणखी वाढू शकतो, असंही समोर आलं आहे. पुढील दिवसानंतर हाच मुंबईतील पावासाचा जोर आणखी वाढेल असंही यावेळी सांगण्यात आलं आहे. तर डोबिंवली परिसरात मागील 3 तासात 85 मिमी पावसाची आणि नवी मुंबईतील कोपरखैरणा येथे 3 तासात 87.8 मिमी पावसाची नोंद झाली आहे. तसंच भिवंडी शहरात देखील रविवारपासून उघडीप दिलेल्या पावसाने दुपारी तीन वाजल्यापासून दमदार पुनरागमन केलं आहे. या दोन तास सुरू राहिलेल्या पावसात भिवंडी शहरातील अनेक भागात रस्त्यावर पाणी साचले असून भिवंडी ग्रामीण भागात देखील पावसाचे पाणी सखलभागात साचत आहे. 

कोकणातही तुफान पाऊस सुरुच असून रायगड, रत्नागिरी, सिंधुदुर्ग याठिकाणी ऑरेंज अलर्ट कायम आहे. तसंच पुढील काही तासांत मुसळधार ते अतिमुसळधार पावसाचा इशारा देण्यात आला आहे. मुंबई-गोवा हायवेवर देखील मोठ्या प्रमाणात वाहतूक कोंडी झाली आहे. त्यात मंगळवारपासून मुंबईसह राज्यभरातील बऱ्याच भागात पाऊस पुन्हा जोमात सक्रिय होणार अशी माहिती भारतीय हवामान शास्त्र विभागाने नुकतीच दिली आहे.

राज्यातील विविध ठिकाणची पावसाची आकडेवारी (सकाळी 8.30 ते सायंकाळी 5.30 पर्यंत)

महाबळेश्वर - 94.6 मिमी 
मुंबई (कुलाबा) - 27 मिमी 
मुंबई (सांताक्रुज) - 19.2 मिमी 
कोल्हापूर - 21.8 मिमी 
रत्नागिरी - 51.3 मिमी 
अलिबाग - 24.3 मिमी 
ठाणे - 59 मिमी 
माथेरान - 70 मिमी 
डोंबिवली - 104 मिमी

हे ही वाचा :