Ashwini Bhide : अश्विनी भिडेंच्या नियुक्तीमागे राजकारण रंगलं, फडणवीसांचा पुन्हा एकदा शिंदेंना शह, महापालिकेवर वरचष्मा कायम
Ashwini Bhide BMC : अश्विनी भिडे यांच्या नियुक्तीला एकनाथ शिंदे यांचा विरोध असल्याची चर्चा होती. मात्र नंतर हा विरोध मावळल्याचं दिसून आलं.
मुंबई : सर्वाचंच लक्ष लागलेल्या मुंबई महापालिकेच्या आयुक्तपदी अखेर अश्विनी भिडे यांची वर्णी लागली आहे. अश्विनी भिडे या मुंबई पालिकेच्या पहिल्या महिला आयुक्त असणार आहेत. भिडे आयुक्तपदी विराजमान झाल्या असल्या तरी त्यावरुन पडद्यामागे मोठं राजकारण रंगल्याचं दिसलं. उपमुख्यमंत्री एकनाथ शिंदे यांच्याकडून अश्विनी भिडेंच्या नावाला विरोध असल्याची चर्चा होती. त्यामुळे भिडे यांनी सोमवारी रात्री उशिरा एकनाथ शिंदेंची भेट घेतली. त्यानंतर त्यांचा विरोध मावळल्याची चर्चा आहे. या सगळ्या राजकारणात मुख्यमंत्री देवेंद्र फडणवीस यांनी पुन्हा एकदा एकनाथ शिंदेंना शह दिल्याची चर्चा राजकीय वर्तुळात रंगू लागली आहे.
मुंबईचा विकास वेगवान व्हावा यासाठी प्रयत्न करणाऱ्या, मोठे प्रकल्प वेळेत पूर्ण करणाऱ्या आणि मेट्रो वूमन अशी ओळख असलेल्या अश्विनी भिडे आता पालिका आयुक्तपदी विराजमान झाल्या आहेत. मुख्यमंत्री देवेंद्र फडणवीस यांच्या अत्यंत विश्वासू सहकारी अशी ओळख असलेल्या अश्विनी भिडे यांच्या निवडीने मुख्यमंत्र्यांचाच पालिकेवर वरचष्मा आहे हे पुन्हा एकदा सिद्ध झालं आहे. पालिका आयुक्तपदासाठी उपमुख्यमंत्री एकनाथ शिंदे यांचे अप्पर मुख्य सचिव असीम गुप्ता, मिलिंद म्हैसकर यांची देखील नावे चर्चेत होती. मात्र, या सर्वांना मागे टाकत अश्विनी भिडे मुंबई पालिका आयुक्त झाल्या आहेत.
मुंबई पालिकेत महिलाराज!
अश्विनी भिडे 1995 बॅचच्या आयएएस अधिकारी
एमएमआरसीएलच्या प्रमुख म्हणून मुंबई
मेट्रो-3 प्रकल्पामुळे ‘मेट्रो वुमन’ म्हणून समोर
मुख्यमंत्री देवेंद्र फडणवीस यांच्या प्रधान सचिव आणि अत्यंत विश्वासू सहकारी म्हणून अश्विनी भिडे यांची ओळख
दरम्यान, मेट्रो कारशेडसाठी रात्रीतून झाडं तोडण्यात आल्यानं पर्यावरणवाद्यांकडून अश्विनी भिडेंना मोठा विरोध झाला होता. महाविकास आघाडीचं सरकार आल्यानंतर अश्विनी भिडेंची मुंबई महापालिकेच्या अतिरिक्त आयुक्त म्हणून बदली करण्यात आली होती. तर महायुतीचे सरकार आल्यानंतर एमएमआरसीएलची पुन्हा जबाबदारी पुन्हा एकदा अश्विनी भिडे यांच्याकडे देण्यात आली.
उपमुख्यमंत्री आणि मुंबईचे पालकमंत्री असलेल्या एकनाथ शिंदे यांच्याकडून असीम गुप्ता यांच्या नावाला पसंती असल्याची चर्चा होती. मात्र, मुख्यमंत्री हे अश्विनी भिडे यांच्या नावावरच ठाम असल्याने उपमुख्यमंत्री एकनाथ शिंदे यांना पालिका आयुक्तपदावरुन शह दिल्याची चर्चा राजकीय वर्तुळात आहे.
महापालिकेवर मुख्यमंत्र्यांचाच वरचष्मा कायम
एमपीसीबीचे तत्कालीन सदस्य सचिव देवेंद्र सिंह यांचे सभागृहात निलंबन झाले होते. त्यांची पुन्हा एकदा वर्णी राज्य प्रदूषण नियंत्रण मंडळावर लागेल अशी चर्चा होती. मात्र, त्या ऐवजी राहुल रेखावार यांची त्या पदावर नियुक्ती करण्यात आली. तर देवेंद्र सिंह यांना मुंबई पालिकेत सह पालिका आयुक्त म्हणून नियुक्ती देण्यात आली.
सातारा प्रकरणी उपसभापती गोऱ्हे यांचे निलंबनाचे आदेश बदलत चौकशी करण्याचे आदेश दिले गेले. दरम्यान, तुषार दोशींची चौकशी होईपर्यंत त्यांना बाजूला सारल्याचं मुख्यमंत्र्यांनी सांगितलं असलं तरी भाजपला जे अपेक्षित होतं तेच झाल्याची राजकीय वर्तुळात चर्चा झाली.
मुंबई महापालिका आयुक्तपदासाठी आपल्या मर्जीतला अधिकारी असावा यासाठी एकनाथ शिंदे आग्रही होते. मात्र, मुख्यमंत्री देवेंद्र फडणवीस यांनी अश्विनी भिडे यांची वर्णी लावली. दरम्यान, येत्या काळात मुंबईकरांच्या सेवेत अनेक मोठे प्रकल्प येणार आहे. ज्यात कोस्टल रोड, गारगाई धरण, पार्किंग आणि अंडरग्राऊंड प्रकल्पांचा समावेश आहे. अशात, अश्विनी भिडे यांच्या मागील कामाचा अनुभव बघता त्या या दृष्टीकोनातून उजव्या ठरतील. त्यामुळे, मुख्यमंत्र्यांनी शिंदेंना शह देताना पालिकेत आपला वरचष्मा देखील कायम ठेवल्याची चर्चा आहे.
महत्त्वाच्या बातम्या
