वादातून कॉलेजबाहेरच्या तरुणांनी डॉक्टर विद्यार्थ्याला भोसकलं; यवतमाळमधील धक्कादायक घटना

Yavatmal Doctor Murder Case : मुलींच्या हॉस्टेलसमोर लघुशंका करताना हटकल्याने बाहेरच्या तरुणांनी डॉ. अशोक पाल यांची हत्या केल्याचं समोर आलं आहे. 

यवतमाळ

यवतमाळ : वसंतराव नाईक शासकीय वैद्यकीय महाविद्यालयात शिकाऊ विद्यार्थी डॉक्टरची धारदार शस्त्राने हत्या करण्यात आली आहे. डॉ. अशोक पाल असे मृतक डॉक्टरचे नाव असून तो MBBS च्या फायनल इयरचा विद्यार्थी होता. ही हत्या वादातून झाली असून कॉलेजबाहेरच्या तरुणांनी धारदार शस्त्राने ही हत्या केल्याचं स्पष्ट झालं आहे. 

जन्माष्ठमी कार्यक्रमाच्या निमित्ताने काही बाहेरच्या तरुणांनी महाविद्यालयाच्या परिसरात प्रवेश केला आणि त्यांनी मुलींच्या हॉस्टेलसमोर लघुशंका केली होती. त्यावेळी डॉ.अशोक पाल आणि त्यांच्या मित्रांनी त्या तरुणांना हटकले. याच प्रकरणातून डॉ. अशोक यांची हत्या झाल्याचा संशय पोलिसांना आहे. या प्रकरणी आतापर्यंत दोघांना पोलिसांनी ताब्यात घेतलं आहे. 

शासकीय महाविद्यालयातील एका डॉक्टर विद्यार्थ्याची हत्या कशी झाली, बाहेरच्या लोकांना महाविद्यालयाच्या परिसरात प्रवेश कसा मिळतो असा प्रश्नही यावेळी उपस्थित करण्यात आला आहे. शिकावू डॉक्टरांनी महाविद्यालयाचे गेट बंद केलं असून आणि डॉ. अशोक पाल यांना न्याय मिळेपर्यंत आंदोलन सुरू राहणार अशी भूमिका घेत मुख्य प्रवेशद्वाराला कुलूप लावले आहे. त्यामुळे या ठिकाणची आरोग्य यंत्रणा कोलमडली असून कुणालाही मेडिकल परिसरात प्रवेश मिळाला नाही. या आंदोलनामुळे रुग्णांना रुग्णालयाच्या बाहेरच ताटकळत थांबावं लागल्याचं चित्र होतं.

 या हत्या प्रकरणांतील आरोपींना अटक करावी तसेच मेडिकल कॉलेजच्या डीन यांनी नैतिक जबाबदारी म्हणून त्यांच्या पदाचा राजीनामा द्यावा अशी मागणी शिकावू आंदोलक डॉक्टरांनी केली आहे. आंदोलक विद्यार्थ्यांनी जिल्हा पोलीस अधीक्षक आणि जिल्हाधिकारी यवतमाळ यांचा प्रतिनिधिक पुतळा मेडिकल परिसरात जाळून निषेध केला आहे. 

महत्त्वाच्या बातम्या :