LIVE UPDATES | तापी नदीच्या बॅकवॉटरमध्ये बोट उलटून 15 जण बुडाले

Background

आज दिवसभरात या लाईव्ह ब्लॉगमध्ये देश-विदेशातील घडामोडींचा संक्षिप्त आढावा घेतला जातो. दिवसभर घडणाऱ्या घडामोडी, ब्रेक्रिंग न्यूज एकाच ठिकाणी, एकाच क्लिकवर वाचता येतात. राजकारणापासून मनोरंजनापर्यंत आणि टेक्नॉलॉजीपासून लाईफस्टाईलपर्यंत सर्व बातम्यांचे सुपरफास्ट अपडेट्स वाचकांना इथे मिळतील. त्यामुळे सुपरफास्ट अपडेट्स आणि दिवसभरातील ब्रेकिंग न्यूजसाठी लॉगऑन करा  www.abpmajha.in

राज्यातील आणि देशभरातील बातम्यांचा संक्षिप्त आढावा

1. राज्यात कोरोनाची लागण झाल्याची पहिली केस समोर, पुण्यात दोघांना कोरोना झाल्याची पुष्टी, एबीपी माझाला आरोग्यमंत्री राजेश टोपेंची माहिती

2. मुख्यमंत्री कमलनाथ यांनी मध्य प्रदेशच्या 22 मंत्र्यांचे घेतले राजीनामे, भाजपचं ऑपरेशन कमळ हाणून पाडण्यासाठी काँग्रेसची रणनिती, सहा मंत्री बंगुळरूत

3. कोरोनामुळे पोल्ट्री उद्योगाचं 900 कोटींचं नुकसान, शेअर बाजारात गुंतवणूकदारांचे साडे सहा लाख कोटी बुडाले, औरंगाबादची निवडणूक पुढे ढकलण्याची एमआयएमची मागणी

4. येस बँकेचे कर्ज बुडवणारे भाजपचे देणगीदार, आपचा गंभीर आरोप तर राणा कपूरांच्या तिन्ही मुलींची कार्यालयं सीबीआयकडून सील

5. राज्यसभेचा चौथा उमेदवार महाविकास आघाडी ठरवेल, काँग्रेसकडून राष्ट्रवादीवर कुरघोडीचा प्रयत्न, तर उमेदवार निश्चितीसाठी आज भाजपची बैठक

6. ठाकरे सरकारवर वचक ठेवण्यासाठी मनसेकडून शॅडो कॅबिनेट जाहीर, नवी मुंबईतल्या मेळाव्यात राज ठाकरेंची घोषणा, आदित्य ठाकरेंच्या खात्यांवर अमित ठाकरेंची नजर

21:13 PM (IST)  •  10 Mar 2020

महाराष्ट्र गुजरात सीमावर्ती भागातील उच्छल येथील तापी नदीच्या बॅकवॉटरमध्ये बोट उलटून 15 जण बुडाले. त्यात स्थानिक ग्रामस्थ व मासेमारी करणारे लोकांनी 6 जणांचे प्राण वाचवले. 1 बालिकेच्या घटनास्थळी बूडून मृत्यू झाला. तर 8 जण बेपत्ता झाल्याची माहिती गुजरात पोलिसांनी दिली आहे.

21:09 PM (IST)  •  10 Mar 2020

वर्धा तालुक्यातील काही भागात अवकाळी पाऊस वादळान मोठं नुकसान झालय. वायगाव परिसरात जोरदार वाऱ्यासह अवकाळी पावसान हजेरी लावली. काही ठिकाणी बोराच्या आकाराची गारही झालीय. यामध्ये वायगाव, भिवापूर, आष्टा, मिरापूर आदी गावांत प्रचंड नुकसान झालंय. गहू जमिनीवर लोळला असून, चणा, भाजीपाला आदी पिकांचं मोठं नुकसान झालंय. वाऱ्यामुळ काही घरांवरील छत, पानटपऱ्याही उडल्यात, रस्त्यावर झाडं, विजेचे खांब, तारा तुटून पडल्यात. यामुळं काही गावांचा वीज पुरवठा खंडित झालाय. प्रशासनाच्या वतीनं नुकसानीची पाहणी सुरू करण्यात आलीय. दरम्यान, कारंजा तालुक्याच्या काही भागातही जोरदार पाऊस झाल्यान पिकांचं नुकसान झालंय.

21:08 PM (IST)  •  10 Mar 2020

उद्या ठाणे महानगरपालिकेत अर्थसंकल्प सादर केला जाणार. आयुक्तांनी स्वतःहून पद सोडल्याने अतिरिक्त आयुक्त अर्थसंकल्प मांडणार आहेत. यावर गोंधळ होऊ शकतो. ठाणे महानगरपालिकेवर तीन हजार कोटीचे कर्ज असल्याचा आरोप होत होता, उद्या त्याबद्दल खुलासा होईल. संजीव जयस्वाल यांनी पालिकेला कंगाल केले, असे आरोप होत आहेत. त्यात आयुक्तांच्या वादामुळे सर्वात शेवटी अर्थसंकल्प मांडणारी ठाणे महानगरपालिका असणार आहे.

19:19 PM (IST)  •  10 Mar 2020

होळीच्या दिवशी चंद्रपूर जिल्ह्यात दोन जणांचा वेगवेगळ्या घटनांमध्ये पाण्यात बुडून मृत्यू झालाय. पहिल्या घटनेत गोंडपीपरी तालुक्यात मुरुमाच्या खड्ड्यात बुडून 11 वर्षीय बालकाला आपला जीव गमवावा लागला. नांदगाव फुर्डी गावातील संस्कार मोगरे रंग खेळल्यावर आंघोळीसाठी आपल्या मित्रांसह गावाशेजारील खड्ड्यावर गेला होता. मात्र, खड्डा खोल असल्यामुळे त्याचा बुडून मृत्यू झाला. तर दुसऱ्या घटनेत वरोरा शहरातील युवक वर्धा नदीत बुडाला. अंकित पिंपळशेंडे हा सरदार पटेल वॉर्डातील युवक 4-5 मित्रांसह मारडा येथे वर्धा नदीवर रंगपंचमी साजरी करण्यासाठी व आंघोळी साठी गेला होता. दरम्यान आंघोळी करिता नदी पात्रात सर्व उतरले असता पाण्याचा अंदाज न आल्याने अंकित बुडाला. नातेवाईक व पोलीस घटनास्थळी दाखल झाले असून अंकितचा शोध सुरू आहे. होळीच्या दिवशी जिल्ह्यात दोन जणांचा पाण्यात बुडून मृत्यू झाल्याने या सणाला गाटबोल लागले आहे.

19:13 PM (IST)  •  10 Mar 2020

पालघर : डहाणू जवळील अस्वाली धरणात एक तरुण बुडल्याची माहिती मिळाली आहे. स्वान आर्यन (वय 29)असं बुडालेल्या तरुणाचं नाव असून तो डहाणूतील मसोली येथील राहणारा आहे. आज धुळवड खेळून झाल्यानंतर आपल्या तिघा मित्रांसह धरणावर अंघोळीसाठी गेला असताना बुडल्याची पोलिसांची माहिती. पोलीस घटनास्थळी असून बचावकार्य सुरू.