ST Workers Strike Live : एसटीच्या आंदोलनावर रात्री कर्मचाऱ्यांशी चर्चा करून उद्या अंतिम निर्णय होणार
ST Strike Workers : गेल्या काही दिवसांपासून सुरु असलेला एसटी कर्मचाऱ्यांचा संप मिटण्याची आशा निर्माण झाली आहे. पाहा यासंबंधीचे प्रत्येक अपडेट्स...
LIVE
Background
ST Strike Workers : गेल्या काही दिवसांपासून सुरु असलेला एसटी कर्मचाऱ्यांचा संप मिटण्याची आशा निर्माण झाली आहे. आंदोलन हे रबरासारखं असतं, जास्त ताणल्यास तुटतं अशी सूचक प्रतिक्रिया सदाभाऊ खोत (Sadabhau Khot) यांनी दिली आहे. एसटीच्या विलिनीकरणासाठी नेमलेल्या समितीचा अहवाल येईपर्यंत कर्मचाऱ्यांना वेतनात अंतरिम वाढ देण्याचा सरकारने प्रस्ताव दिला आहे. या प्रस्तावावर एसटी कर्मचारी संघटना सकारात्मक असल्याचं समजत आहे. भावनिक विचार न करता आर्थिकदृष्टीने देखील विचार व्हावा आणि यासंदर्भात सकाळी 10 वाजता काही अर्थतज्ज्ञांशी चर्चा करु असंही खोत यांनी म्हटलं आहे. तसंच शिष्टमंडळाशी चर्चा करुन सरकारसोबतच्या बैठकीतून तोडगा काढण्याचा प्रयत्न करण्याची ग्वाही खोत यांनी दिली आहे.
पगारवाढीचा 'गिअर', संपाला 'ब्रेक'? विलिनीकरणाचा निर्णय होईपर्यंत अंतरिम पगारवाढीचा प्रस्ताव
राज्यात गेल्या महिन्याभरापासून सुरु असलेला एसटी कर्मचाऱ्यांचा संप आता मिटण्याची शक्यता आहे. परिवहन मंत्री अनिल परब (Anil Parab) यांनी सह्याद्री अतिथीगृहावर बोलावलेल्या बैठकीत सकारात्मक चर्चा झाली. तिढा सोडवण्यासाठी कर्मचाऱ्यांच्या शिष्टमंडळानं पर्याय द्यावेत असही परबांनी म्हटलं आहे. सरकारकडून कर्मचाऱ्यांच्या अंतरिम वेतनवाढीचा प्रस्ताव शिष्टमंडळापुढे ठेवण्यात आला आहे. सरकारच्या प्रस्तावावर शिष्टमंडळ चर्चा करुन आज सकाळी 11 वाजता पुन्हा बैठक होणार आहे. या बैठकीत निर्णयाची शक्यता आहे. हा प्रस्ताव मान्य करावा आणि कर्मचाऱ्यांनी संप मागे घेऊन लगेच कामावर रुजू व्हावे, अशी विनंती मंत्री अनिल परब यांनी केली आहे.
बैठकीत सकारात्मक चर्चा झाल्याचं भाजप आमदार गोपीचंद पडळकर (Gopichand Padalkar) यांनीही सांगितलं आहे. विलिनीकरणाच्या मुद्द्यावर ठाम आहोत, असंही पडळकर यावेळी म्हणाले आहेत. एसटी कर्मचाऱ्यांशी चर्चा करुन निर्णय घेऊ, असंही पडळकर यांनी सांगितलं आहे. तसेच, आम्ही पोटतिडकीनं आमची बाजू मांडली. राज्यातील निलंबित झालेला कर्मचारी आहे, तो आझाद मैदान येथे येणार आहे. आज सरकारनं विलनिकरण करणाची भूमिका स्पष्ट केली आहे. आज पुन्हा सकाळी 11 वाजता बैठक होणार आहे, असं सदाभाऊ खोत (Sadabhau Khot) यांनी सांगितलं.
पाहा व्हिडीओ : आंदोलन रबरासारखं, जास्त ताणल्यास तुटतं : सदाभाऊ खोत
कालच्या बैठकीनंतर काय म्हणाले परिवहन मंत्री अनिल परब?
जो पर्यंत यामध्ये काही तोडगा निघत नाही तोपर्यंत दुसरे काही पर्याय असतील तर एसटी कर्मचाऱ्यांनी द्यावा असं आवाहन अनिल परब यांनी केलं आहे. चर्चा सकारात्मक झाली असून या प्रश्नी आज सकाळी 11 वाजता पुन्हा बैठक होणार आहे. एसटीचे राज्य शासनाच्या सेवेमध्ये विलिनीकरण करावं या मागणीसाठी गेल्या 15 दिवसांपासून एसटी कर्मचारी आंदोलन करत आहेत. एसटी विलिनीकरणाचा प्रश्न हा न्यायालयात प्रलंबित असून त्यावर एक समिती स्थापन केली आहे. या समितीने 12 आठवड्यात आपला अहवाल द्यायचा आहे. समितीचा जो काही अहवाल असेल, तो राज्य सरकारला मान्य असेल, असं अनिल परब यांनी म्हटलं आहे.
परिवहन मंत्री अनिल परब आणि एसटी कर्मचारी शिष्टमंडळ यांच्यामध्ये सह्याद्री अतिथीगृह संपाबाबत बैठक पार पडली. या बैठकीस सदाभाऊ खोत आणि गोपीचंद पडळकर हे उपस्थित होते. एसटी कर्मचाऱ्यांकडून वेतन वाढ आणि महामंडळाचे राज्य शासनात विलिनीकरण करण्यात यावे, या प्रमुख मागणीसाठी मागील काही दिवसांपासून आंदोलन, संप सुरु आहे. एसटी कर्मचाऱ्यांच्या आंदोलनामुळे राज्यातील लाखो नागरिकांची गैरसोय होत आहे.
एसटीच्या आंदोलनावर रात्री कर्मचाऱ्यांशी चर्चा करून उद्या अंतिम निर्णय होणार
एसटीच्या आंदोलनावर आज कुठलाही ठोस निर्णय होणार नाही. आज रात्री कर्मचाऱ्यांशी चर्चा करून उद्या अंतिम निर्णय होणार आहे. विरोधी पक्ष नेते प्रवीण दरेकर रात्री आझाद मैदानावर जाऊन कर्मचाऱ्यांशी चर्चा करणार असून आंदोलनाची पुढची दिशा ठरवणार आहे
एसटी कर्मचाऱ्यांच्या पगारात वाढ, परिवहन मंत्री अनिल परब
1 ते 20 वर्ष पूर्ण झालेल्यांच्या मूळ वेतनात 4 हजार रुपयांची वाढ होणार आहे. तर 1 ते 10 वर्ष पूर्ण झालेल्या कर्मचाऱ्यांना 5 हजार रुपयांची वेतनवाढ होणार आहे. 1 ते 10 वर्ष पूर्ण झालेल्यांचं मूळ वेतन 17 हजार 300 होणार आहे.
एसटी कर्मचाऱ्यांना इतर भत्ते सरकारी कर्मचाऱ्यांप्रमाणे मिळणार, परिवहन मंत्री अनिल परब
एसटी कर्मचाऱ्यांच्या मूळ पगारात वेतनवाढ करण्याचा निर्णय घेण्यात आला आहे. इतर भत्ते सरकारी कर्मचाऱ्यांप्रमाणे मिळणार आहेत.
समितीचा अहवाल आल्यावर विलिनीकरणाचा निर्णय घेऊ,परिवहन मंत्री अनिल परब
गेल्या चौदा दिवसांपासून एसटी कर्मचाऱ्यांचा संप चालू होता. हायकोर्टानं नेमलेल्या समितीचा निर्णय राज्य सरकारला मान्य आहे. समितीचा अहवाल आल्यावर विलिनीकरणाचा निर्णय घेऊ.
एसटी संपावर तोडगा काढण्यासाठी कर्मचाऱ्यांना पगार वाढीचा प्रस्ताव
राज्यात सुरु असलेल्या एसटी संपावर आज तोडगा निघण्याची शक्यता असून कर्मचाऱ्यांचा पगार वाढीचा प्रस्ताव ठेवण्यात आला आहे. या पगार वाढीनंतर एसटी महामंडळ आणि राज्य सरकारवर वर्षाला 600 कोटींचा भार येणार आहे. एसटी कर्मचाऱ्यांना समाधानकारक पगार वाढ देण्याचे सरकारचे पाऊल. अर्थमंत्री अजित पवार यांच्याकडे झालेल्या बैठकीत प्रस्तावाला मान्यता मिळाल्याची माहिती आहे.
महत्त्वाच्या बातम्या
ट्रेंडिंग न्यूज
