राज्यात अडकलेल्या लोकांसाठी 'या' अटींसह एसटीचा प्रवास शक्य

राज्यात अडकलेल्या लोकांना गावी परत जाण्यासाठी एसटीतर्फे मोफत बस सेवा सुरु होणार असल्याची माहिती परिवहन मंत्री अनिल परब यांनी दिली. येत्या 18 मेपर्यंतच ही सेवा असेल, असंही त्यांनी स्पष्ट केलं.

सांकेतिक छायाचित्र

मुंबई : लॉकडाऊनमुळे राज्यात विविध ठिकाणी अडकलेल्या लोकांना आणि विद्यार्थ्यांना गावी परतण्यासाठी एसटीतर्फे मोफत सेवा देण्याचा निर्णय सरकारने घेतला आहे. एसटीच्या माध्यमातून कोरोनाचा प्रार्दुभाव होऊ नये यासाठी काही अटी आणि शर्तींसह परवानगी देण्यात आली आहे. यासाठी 21 कोटी रुपयांची तरतूद करण्यात आली आहे, असंही स्पष्ट करण्यात आलं आहे.

महत्त्वाच्या बाबी :

1. फिजीकल डिस्टनसिंग नियमानुसार प्रत्येक सीटवर एक प्रवासी यामुळे एका बसमध्ये साधारणपणे 21 ते 22 लोक बसू शकतात. त्यामुळे जर 21-22 लोकांचा एक ग्रुप तयार झाला, तर त्या ग्रुपने आपल्या ग्रुप लिडरच्या नावासह, सर्वांची नावे, संपूर्ण पत्ता, जिथे जायचे आहे तेथील पत्ता, आधार कार्ड नंबर असा फॉर्म भरुन शहरी भागामध्ये पोलीस आयुक्त कार्यालय व ग्रामीण भागामध्ये जिल्हाधिकारी, तहसीलदारांकडे जमा करावीत. ज्या जिल्ह्यामध्ये ते जाणार आहेत, त्या जिल्हाधिकाऱ्यांची परवानगी आल्यानंतर त्यांना एस. टी. कधी व कोठून जाणार आहे याबद्दलची माहिती कळविण्यात येईल.

2 . जे नागरिक वैयक्तिक जाऊ इच्छितात त्यांनी एस. टी. महामंडळाने तयार केलेल्या ऑनलाईन पोर्टलद्वारे नाव नोंदणी करायची आहे. हे पोर्टल सोमवार पासून चालू होईल. ऑनलाईन अर्ज करतेवेळी, आपण सध्या ज्या जिल्ह्यात वास्तव्य करत आहात, त्या जिल्ह्यातील जिल्हाधिकारी यांची परवानगी जोडणे आवश्यक आहे.

3. या प्रवासादरम्यान प्रवाशांनी मास्क घालणे, बसमध्ये चढतेवेळी हात सॅनिटायझरने स्वच्छ करणारे बंधनकारक आहे. बस निघण्यापूर्वी व पोहचल्यानंतर सॅनिटाईज केली जाईल.

4. ज्या जिल्ह्यांमध्ये हे प्रवासी जाणार आहेत तिथे त्यांची तपासणी करून संस्थात्मक किंवा घरीच विलगीकरण करण्याचे अधिकारी त्या नोडल अधिकारी यांच्याकडे असतील.

5. ही पॉईंट टू पॉईंट सेवा आहे. प्रवासात मध्येच कुठे प्रवासी उतरणार नाही किंवा चढणार नाहीत. लांब पल्याच्या गाड्या कुठेही जेवणासाठी थांबणार नाहीत. त्यामुळे आपले अन्नपाणी घरूनच घेऊन यावे, तसेच फक्त सॅनिटाईज केलेली महामंडळाचीच प्रसाधनगृहे वापरली जातील.

6. कन्टेन्मेंट झोन मधील नागरिकांना कोणतीही सुविधा उपलब्ध नाही. ही सुविधा फक्त लॉकडाऊन संपेपर्यंतच असणार आहे. त्यामुळे पोलीस कार्यालयांमध्ये, जिल्हाधिकारी कार्यालयामध्ये, बस स्टॅन्ड किंवा रस्त्यावर गर्दी करू नये.

7.ज्या मार्गावरून एसटी धावणार त्या मार्गावर जर कोणी मजूर, विद्यार्थी ,विस्थापित चालत असतील तर त्यांना बसमध्ये जागा असल्यास आणि बस मध्ये जागा असल्यास आणि जिथे बस जाणार तिथेच त्यांना जायचं असेल तर त्यांना बसमध्ये घेऊन त्यामार्गावर सोडण्यात येईल.

Free ST Service | एसटीने मोफत प्रवास करण्यासाठीच्या फॉर्मबद्दल परिवहन मंत्री सतेज पाटील यांची माहिती