रिफायनरीबाबत शिवसेनेची अद्याप कोणतीही अधिकृत भूमिका नाही, रिफायनरी विरोधकांना विनायक राऊतांची माहिती
मुंबईमध्ये रिफायनरी विरोधकांनी खासदार विनायक राऊत यांची भेट घेत त्यांना रिफायनरीला विरोध असणारं जवळपास 5 हजार सह्याचं निवेदन दिलं.
रत्नागिरी : कोकणात अर्थात रत्नागिरी जिल्ह्यातील राजापूर तालुक्यात प्रस्तावित रिफायनरी प्रकल्पाची चर्चा मागील चार ते सहा महिन्यापासून पुन्हा एकदा सुरू झाली आहे. प्रकल्प होणार की हद्दपार होणार? प्रकल्पाला विरोध किती? समर्थन किती? याबाबत देखील चर्चा, शक्ती प्रदर्शन सुरू आहे. दोन्ही बाजूने संघटना स्थापन करत आपली भूमिका स्पष्ट केली जात आहे. दरम्यान, याच मुद्यावरून मुंबईतील आणि गावातील रिफायनरी विरोधकांनी शिवसेना खासदार आणि सचिव विनायक राऊत यांची मुंबईमध्ये भेट घेतली. यावेळी बोलताना खासदार विनायक राऊत यांनी 'रिफायनरीबाबत शिवसेनेची कोणतीही अधिकृत भूमिका नाही' असं भेटीदरम्यान म्हटलं आहे. कारण काहीच दिवसांपूर्वी प्रकल्प समर्थकांनी राजापूर येथे खासदार यांची भेट घेत प्रकल्प व्हावा यासाठी भेट घेतली होती. त्यावेळी खासदार राऊत यांनी तुमचं म्हणणं मी पक्षनेतृत्व अर्थात उद्धव ठाकरेंपर्यंत पोहोचवेन असं म्हटलं होतं. त्यानंतर आता पुन्हा रिफायनरी विरोधकांनी देखील भेट घेत विरोध स्पष्ट केला आहे. याच मुद्यावर खासदार विनायक राऊत उद्धव ठाकरे यांची भेट घेत घडामोडी आणि समर्थक, विरोधक यांनी दिलेली निवेदनं देणार आहेत.
भेटीदरम्यान काय झालं? शिवसेनेची भूमिका काय?
सध्या शिवसेना ना विरोधात आहे ना बाजूने अशी माहिती खासदार विनायक राऊत यांनी रिफायनरी विरोधकांना दिली आहे. मुंबईमध्ये रिफायनरी विरोधकांनी खासदार विनायक राऊत यांची भेट घेत त्यांना रिफायनरीला विरोध असणारं जवळपास 5 हजार सह्याचं निवेदन दिलं. यावेळी त्यांनी आपलं म्हणणं खासदार राऊत यांच्या कानावर देखील घातलं. यावेळी खासदार विनायक राऊत यांनी तुमचं म्हणणं मी वरिष्ठ नेतृत्व अर्थात पक्षप्रमुखांपर्यंत पोहोचवेन अशी ग्वाही भेटीदरम्यान विरोधकांना दिली आहे. या भेटीकरता मुंबई तसेच गावातील काही रिफायनरी प्रकल्प विरोधक राऊत यांच्या भेटीसाठी गेले होते. दरम्यान, सध्याची परिस्थिती पाहता आम्ही स्थानिकांसोबत आहोत. जर स्थानिकांना प्रकल्प हवा असेल तर आम्ही प्रकल्पाचा बाजूनं आणि जर स्थानिकांना प्रकल्प नको असेल तर आम्ही प्रकल्पाच्या विरोधात अशी सध्या शिवसेनेची भूमिका आहे. त्यामुळे एकंदरीत सारी परिस्थिती पाहता शिवसेनेनं कोणताही अधिकृत अर्थात हो किंवा नाही अशी कोणताही भूमिका घेतलेली नाही.
भेटीनंतर विनायक राऊत यांचं म्हणणं काय?
रिफायनरी प्रकल्प विरोधक आणि त्यांची भेट याबाबतची माहिती मिळाल्यानंतर 'एबीपी माझा'नं खासदार विनायक राऊत यांच्याशी देखील संपर्क साधला. पण, साहेब सध्या मीटिंगमध्ये आहेत. तुमचा निरोप त्यांच्यापर्यंत पोहोचवत कॉल करतो अशी प्रतिक्रिया त्यांच्या निकटवर्तीय किंवा पीए यांच्याकडून दिली गेली आहे.
सध्या रिफायनरीची काय स्थिती?
शिवसेनेनं नाणार येथील प्रकल्पाची अधिसुचना रद्द केली हे सर्वांना ठावूक आहे. पण, त्यानंतर देखील राजापूर तालुक्यातील बारसू - सोलगाव या एमआयडीसीच्या प्रस्तावित जागेवर रिफायनरी प्रकल्प व्हावा यासाठी चाचपणी सुरू आहे. त्याबाबत एमआयडीसी आणि उद्योग मंत्रालय देखील सकारात्मक असल्याची माहिती खात्रीलायल सुत्रांनी दिली आहे. पण, कंपनीला त्याबाबत कोणतंही अधिकृत पत्र दिलेलं नाही. सध्या केवळ चर्चा आणि चाचपणी यापलिकडे कोणत्याही घडामोडी दिसत नाही.
नारायण राणेंचं समर्थन
जनआशीर्वाद यात्रेकरता केंद्रीय मंत्री नारायण राणे कोकणात आहेत. यावेळी त्यांनी रिफायनरी झाली पाहिजे असं विधान केलं आहे. त्यामुळे राणेंच्या विधानामुळे तर्कवितर्क आणि चर्चांना उधाण आलं आहे. पण, आमचा विरोध ठाम आहे. जिल्ह्यात, तालुक्यातील लोकांना काय वाटतं? यापेक्षा स्थानिकांचं म्हणणं महत्त्वाचं आहे. जवळपास 95 टक्के लोक अद्यापही विरोधात आहेत असा दावा रिफायनरी प्रकल्प विरोधकांचा आहे. तर, रिफानरी समर्थकांचा आमच्याकडे 8500 एकर जमिनीची परवानगी असल्याचा दावा आहे.
महत्त्वाच्या बातम्या
