Rupali Chakankar : खरातसोबत अनेकांचे फोटो, फक्त महिला म्हणून आपल्यावर आरोप; राजीनामा दिल्यानंतर चाकणकरांची पहिली प्रतिक्रिया
Rupali Chakankar On Ashok Kharat : एखादा व्यक्ती पुढे जाऊन कसा वागेल याची माहिती आपल्याला नव्हती. खरात दाम्पत्याला गुरू मानल्याने त्याची पाद्यपूजा केली असल्याचं रुपाली चाकणकरांनी स्पष्ट केलं.
मुंबई : आपले जे व्हिडीओ आणि फोटो व्हायरल होत आहेत ते पाच वर्षांपूर्वीचे आहेत, एखादा व्यक्ती पुढे जाऊन कसा वागेल याची माहिती आपल्याला कशी असेल. आपलं कुटुंब वारकरी संप्रदायाचं असल्याने अशोक खरातच्या (Ashok Kharat) ट्रस्टशी आपण जोडलो गेलो, परंतु त्याच्या वैयक्तिक आयुष्याबद्दल इतर माहिती नव्हती असं रुपाली चाकणकर (Rupali Chakankar) म्हणाल्या. खरातच्या कोणत्याही कृत्याचं समर्थन करण्याचा प्रश्न नाही, त्याच्यावर योग्य ती कारवाई होईल असंही त्या म्हणाल्या. रुपाली चाकणकरांनी राज्य महिला आयोगाच्या अध्यक्षपदाचा राजीनामा दिल्यानंतर त्या माध्यमांशी बोलत होत्या.
या प्रकरणात जो दोषी आहे त्याच्यावर कारवाई होणारच आहे. या प्रकरणाचा निष्पक्ष तपास व्हावा यासाठी मी राज्य महिला आयोगाच्या अध्यक्षपदाचा राजीनामा देत आहे. यानंतर सविस्तरपणे पुराव्यासह लवकरच पत्रकार परिषद घेणार आहोत, असं रुपाली चाकणकर म्हणाल्या.
Rupali Chakankar Ashok Kharat Case : पुढे जाऊन कसा वागेल याची माहिती नव्हती
अशोक खरातच्या ट्रस्टवरील संचालकपदाचा आपला कार्यकाळ 8 ऑगस्ट 2025 रोजी संपला आहे. आता जो पाद्यपूजेचा व्हिडीओ व्हायरल होत आहे तो पाच वर्षांपूर्वीचा आहे असा दावा रुपाली चाकणकरांनी केला. त्या म्हणाल्या की, खरात पती पत्नीला गुरू मानलं. त्यामुळे ट्रस्टच्या ठिकाणी काही कार्यक्रमाला उपस्थिती लावली. यामध्ये एखाद्या व्यक्तीला आपण गुरू मानल्याने आम्ही संपूर्ण कुटुंबासह हजेरी लावायचो. पाच सहा वर्षांपूर्वीचे व्हिडीओ समोर येत आहेत. त्यावेळी एखाद्याचं वैयक्तिक कृत्य किंवा इतर गोष्टी माहिती नव्हत्या, पुढे जाऊन तो व्यक्ती कसा वागेल याची माहिती नव्हती. त्यामुळे अशोक खरातच्या कृत्याबद्दल काही माहिती असायचं कारण नव्हतं.
या प्रकरणी मी राज्याचे मुख्यमंत्री देवेंद्र फडणवीस आणि राज्याचे पोलीस महासंचालक यांना पत्र लिहिलं आहे. सुनेत्रा पवार यांचीही भेट घेऊन या प्रकरणाचा तपास पारदर्शक व्हावी अशी मागणी केली, असं रुपाली चाकणकरांनी सांगितलं.
Rupali Chakankar On Resignation : महिला म्हणून आरोप
रुपाली चाकणकर म्हणाल्या की, "माझं संपूर्ण कुटुंब हे वारकरी संप्रदायातील आहे. त्यामुळे खरातच्या ट्रस्टसोबत जोडले गेले. परंतु, खरातची दुसरी बाजू मला माहिती नव्हती. एखादी व्यक्ती पुढे जाऊन कशी वागते, काय करते याची माहिती कशी असेल? माझ्यासारख्या अनेक लोकांचे फोटो खरातसोबत आहेत. परंतु एक महिला म्हणून माझ्यावर आरोप करण्यात आले याचं वाईट वाटतंय."
Rupali Chakankar News : त्या बातमीवर कार्यवाही केली
रुपाली चाकणकर म्हणाल्या की, "19 मार्च 2025 रोजी एका पत्रकाची बातमी आमच्याकडे आली होती. त्यावर आमच्या समुपदेशन खात्याने त्यांना पत्र लिहिलं होतं. तसंच आम्ही पोलीस अधीक्षकांनाही पत्र लिहून त्याची माहिती मागवली. परंतु, नंतर त्या पत्रकाने खुलासा केला की त्यांच्याकडे काहीही माहिती नाही. आता त्याचाच आधार घेऊन आपल्यावर खोटे आरोप केले जात आहेत."
काही दिवसांपूर्वी मला एका मुलीचा मेल आला. खरातच्या कार्यालयात काम करणाऱ्या एका व्यक्तीच्या विरोधात तक्रार केली होती. तोपर्यत खरातचं कुठेही नाव नव्हतं, परंतु त्याच्या कार्यालयात काम करणाऱ्या व्यक्तीचं नाव होतं. त्यावर आम्ही कारवाई केली अशी माहिती रुपाली चाकणकरांनी दिली.
Rupali Chakankar On Sushma Andhare : कायदेशीर नोटीस पाठवणार
वशीकरण विद्या शिकण्यासाठी चाकणकरांनी हाताची अनामिका कापून घेतल्याचा दावा काहीजणांनी केला होता. त्यावरही चाकणकरांनी स्पष्टीकरण दिलं. त्या म्हणाल्या की, 2 सप्टेंबर रोजीचा एक फोटो व्हायरल केला जात आहे. त्यावेळी माझ्या हाताला कोणतीही जखम नव्हती. परंतु सातत्याने खोटी माहिती दिली गेली. ही खोटी माहिती देणाऱ्यांना कायदेशीर नोटीस पाठवणार."
ही बातमी वाचा:
महत्त्वाच्या बातम्या
