Pune Bypoll election : ''बोलघेवडे पोपट ED च्या तालावर नाचू लागलेत'; मनसेने भाजपला पाठिंबा देताच राष्ट्रवादीचे टीकास्त्र

Pune : कसबा आणि चिंचवड मतदार संघासाठी मनसेने भाजपला पाठिंबा देण्याचा निर्णय घेतल्यानंतर पुण्यातील राष्ट्रवादीने टीका करायला सुरुवात केली आहे.

Pune Bypoll election : ''बोलघेवडे पोपट ED च्या तालावर नाचू लागलेत'; मनसेने भाजपला पाठिंबा देताच राष्ट्रवादीचे टीकास्त्र

Pune Bypoll election : पुण्यात कसबा आणि चिंचवड मतदार (Pune Bypoll Election) संघात पोटनिवडणुकीची रणधुमाळी सुरु झाली आहे. महाविकास आघाडी आणि भाजपकडून  प्रचाराची जोरदार तयारी सुरु झाली आहे. दोन्ही मतदार संघासाठी मनसेने भाजपला पाठिंबा देण्याचा निर्णय घेतल्यानंतर पुण्यातील राष्ट्रवादीने टीका करायला सुरुवात केली आहे. ज्या भाजपच्या विरोधात आतापर्यंत पुण्यात मनसे लढत होती. तोच पक्ष आता भाजपला पाठिंबा देणार आहे, अशी टीका राष्ट्रवादीचे पुणे शहराध्यक्ष प्रशांत जगताप यांनी केली आहे.

प्रशांत जगताप म्हणाले की, कोथरुडच्या निवडणुकीच्या वेळी मनसेने भाजपविरोधात भूमिका घेतली होती. त्यावेळी त्यांनी राष्ट्रवादी आणि कांग्रेसची मतं मिळवली होती. कोथरूडमध्ये राष्ट्रवादी आणि काँग्रेसच्या जोरावर उमेदवारी अर्ज भरणारे आता कसब्यात भाजपला पाठिंबा देताय...बोलघेवडे पोपट ED च्या तालावर नाचू लागलेत, अशा शब्दांत त्यांनी भाजपवर आणि मनसेवर टीका केली आहे. 

 

कोथरूड मध्ये राष्ट्रवादी आणि काँग्रेसच्या जोरावर उमेदवारी अर्ज भरणारे आता कसब्यात भाजपला पाठिंबा देताय...
बोलघेवडे पोपट ED च्या तालावर नाचू लागलेत.#नवनिर्माणम्हणे

— Prashant Sudamrao Jagtap (@JagtapSpeaks) February 14, 2023

यावेळी त्यांनी कोथरुडच्या निवडणुकीची आठवण करुन दिली आहे. या निवडणुकीत मनसेने भाजपच्या विरोधात अर्ज दाखल केला होता. 2019 मध्ये कोथरुड विधानसभा मतदारसंघात राष्ट्रवादी आणि काँग्रेसनं मनसेच्या उमेदवाराला पाठिंबा दिला होता. कोथरुड मतदारसंघात भाजपनं चंद्रकांत पाटील यांना उमेदवारी दिली होती. त्यांच्या विरोधात काँग्रेस आणि राष्ट्रवादीनं मनसे उमेदवार अॅड. किशोर शिंदे यांना उमेदवारी दिली होती. मात्र यावेळी मनसेच्या राज ठाकरेंनी भाजपच्या दबावाखाली येऊन त्यांनी पाठिंबा देण्याचा निर्णय घेतला आहे. भाजपला सगळ्यांना आपलं करुन घ्यायचं आहे. त्यांना पोटनिवडणुकीत काही प्रमाणात भीती वाटत असेल त्यामुळे त्यांनी मनसेला पाठिंबा मागितला असावा, असं ते म्हणाले.

मनसेचा भाजपला पाठिंबा

कसबा आणि चिंचवडची पोटनिवडणूक जाहीर झाल्यापासून ही निवडणूक बिनविरोध करण्यासाठी भाजपने फार प्रयत्न केले होते. मात्र, त्यांचे प्रयत्न अपयशी ठरले. त्यानंतर ही निवडणूक बिनविरोध करावी यासाठी मनसे पक्ष प्रमुख राज ठाकरे यांनीदेखील पत्राद्वारे आवाहन केलं होतं. मात्र महाविकास आघाडीच्या नेत्यांनी ही निवडणूक बिनविरोध होऊ देणार नाही अशी ठाम भूमिका घेतली होती. त्यानंतर मनसे नेमकं कोणाला पाठिंबा देणार याकडे सर्वांचं लक्ष लागलं होतं. मंगळवारी, मनसेने आपली भूमिका स्पष्ट केली. भाजपला पाठिंबा देणार असल्याचं मनसे नेते बाबू वागस्कर यांनी स्पष्ट केलं. त्यानंतर राष्ट्रवादीच्या नेत्यांनी मनसेवर टीका करायला सुरुवात केली. कसब्यात भाजपचे हेमंत रासने आणि कॉंग्रेसच्या रविंद्र धंगेकर यांच्यात तगडी लढत होण्याची शक्यता वर्तवली जात आहे.