मेनी मेनी हॅप्पी रिटर्न्स ऑफ द डे...!, 1 हजार झाडांचा अनोखा वाढदिवस साजरा

अकोला: अकोला जिल्ह्यातील खैरखेड गावात आज एक अनोखा वाढदिवस साजरा झाला. हा वाढदिवस तुमच्या-आमच्या दररोजच्या वाढदिवसासारखा नक्कीच नव्हता. कारण, त्यात निसर्गसंवर्धन आणि सामाजिक बांधिलकीचा संदेश देणारा एक 'विचार' अन कृतीशीलते'चा परिपाठही होता. खैरखेड गावात गेल्या वर्षी 20 ऑक्टोबरला एकाच दिवशी 1 हजार झाडे लावण्यात आली. गावकरी फक्त वृक्षारोपण करुनच थांबले नाहीत. तर गावातील प्रत्येकाने ते झाड जगविण्यासाठी कंबर कसली. हजारावर लोकसंख्या असलेल्या या गावात प्रत्येक व्यक्तीला एका झाडाच्या संगोपनाची जबाबदारी देण्यात आली. प्रत्येकाने वर्षभर या झाडाला पाणी आणि खते देऊन वाढविले. आज ही झाडं एक वर्षांची झाल्याने हा आनंद साजरा करण्यासाठी संपूर्ण गावकऱ्यांनी जंगी कार्यक्रमाचे आयोजन केले होते. या झाडांसाठी आजच्या वाढदिवसासाठी एक 'खास केक'ही बनविण्यात आला होता. हा केक अडीच क्विंटल गांडूळ खताचा होता. हा केक अकोल्याचे जिल्हाधिकारी जी. श्रीकांत यांच्या हस्ते कापण्यात आला. या कार्यक्रमासाठी सारी प्रशासकीय यंत्रणाच आज खैरखेडमध्ये उपस्थित होती. वर्षभरापूर्वी आपल्या हाताने लावलेली झाडे मोठी झाल्याचे पाहून, जिल्हाधिकारीही आनंदित होते. त्यांनी गांडूळ खताचा केक झाडांना टाकून त्यांना वाढदिवसाच्या अनोख्या शुभेच्छा दिल्या. पाहा व्हिडिओ