Nitesh Rane : नितेश राणे कोर्टासमोर हजर; जामीनावर सोमवारी होणार पुढील सुनावणी

Nitesh Rane : भाजप आमदार नितेश राणे यांनी अखेर सिंधुदुर्ग कोर्टात हजेरी लावली. राणे यांनी नियमित जामीनासाठी अर्ज केला आहे.

Nitesh Rane : नितेश राणे कोर्टासमोर हजर; जामीनावर सोमवारी होणार पुढील सुनावणी

Nitesh Rane : सुप्रीम कोर्टाच्या आदेशानंतर आज भाजप आमदार नितेश राणे सिंधुदुर्ग कोर्टासमोर हजर झाले. नितेश राणे यांनी जिल्हा सत्र न्यायालयात नियमित जामिनासाठी अर्ज दाखल केला आहे. कोर्टाने जामीन अर्जावरील सुनावणी सोमवारपर्यंत पुढे ढकलली आहे. 

शिवसैनिक संतोष परब यांच्यावर झालेल्या प्राणघातक हल्ल्याप्रकरणी नितेश राणे आरोपी आहेत. कणकवली पोलिसांकडून याचा तपास सुरू आहे. या प्रकरणातील अटक टाळण्यासाठी नितेश राणे यांनी अटकपूर्व जामीनासाठी अर्ज केला होता. मात्र, सत्र न्यायालयाने अटकपूर्व जामीन अर्ज फेटाळून लावला. त्यानंतर राणे यांनी मुंबई उच्च न्यायलयात धाव घेतली. मात्र, उच्च न्यायलयानेही अटकपूर्व जामीन अर्ज फेटाळून लावला. हायकोर्टाच्या आदेशाविरोधात राणे यांनी सुप्रीम कोर्टात धाव घेतली होती. मात्र, सुप्रीम कोर्टाने राणे यांना 10 दिवसात जिल्हा न्यायलयात शरण जाण्याचे निर्देश दिले. सुप्रीम कोर्टाने राणे यांना 10 दिवस अटकेपासून संरक्षण दिले होते. 

सुप्रीम कोर्टाच्या आदेशानंतर आज नितेश राणे यांनी जिल्हा कोर्टात हजेरी लावली. यावेळी त्यांचे बंधू निलेश राणेदेखील उपस्थित होते. नितेश राणे यांच्या बाजूने अॅड. सतीश मानशिंदे आणि अॅड. संग्राम देसाई यांनी बाजू मांडली. तर, सरकारी वकील अॅड. प्रदीप घरत यांचे म्हणणे कोर्टाने मागवले. अॅड. भूषण साळवी यांनी ऑनलाइन सरकारी वकील म्हणून बाजू मांडली.  मात्र, कोर्टाने अॅड. घरत हजर नसल्याने पुढील सुनावणी ठेवली आहे.

काय आहे प्रकरण?  

सिंधुदुर्ग जिल्हा बँकेच्या निवडणूक रणधुमाळीत शिवसेना कार्यकर्ते संतोष परब यांच्यावर झालेल्या हल्ल्या प्रकरणी भाजप आमदार नितेश राणे वादाच्या भोवर्‍यात अडकले. 18 डिसेंबर 2021 रोजी संतोष परब यांच्यावर कणकवलीत हल्ला झाला होता. परब हे तत्कालीन जिल्हा बँक अध्यक्ष सतीश सावंत यांचे निकटवर्तीय असून करंजे गावचे माजी सरपंच आहेत. त्यांच्यावर इनोव्हा कारमधून आलेल्या दोघांनी धारदार चाकूने वार केले होते. या हल्ल्यात परब जखमी झाले होते. 

या प्रकरणाला सिंधुदुर्ग जिल्ह्यातील राजकिय शत्रुत्वाची पार्श्वभूमी असल्याच्या संशयावरून पोलिसांनी भाजपच्या गोटात चौकशीची सूत्रे हलवली. मुख्य संशयित आरोपी सचिन सातपुतेला सिंधुदुर्ग ग्रामीण पोलिसांनी दिल्लीतून अटक करण्यात यश मिळवले. सातपुते हा भाजप आमदार नितेश राणे यांच्या स्वाभिमानी संघटनेचा कार्यकर्ता आहे. त्यामुळे या प्रकरणात नितेश राणेंची चौकशी सुरू करण्यात आली आहे.

नितेश राणे यांनी अटकपूर्व जामीन अर्ज दाखल केल्यानंतर काही दिवस अज्ञातवासात होते. अखेर सरकारने अटकेची कारवाई करणार नसल्याचे कोर्टात सांगितल्यानंतर नितेश राणे अज्ञातवासातून बाहेर आले. मागील काही दिवसांपासून नितेश राणे कणकवली पोलीस ठाण्यात चौकशीसाठी हजर होत आहेत.