एक्स्प्लोर

नारायण राणेंकडून एकनाथ खडसेंची पाठराखण

By : एबीपी माझा वेब टीम | Updated at : 04 Jun 2016 07:01 AM (IST)

मुंबई : जमीन घोटाळ्याप्रकरणी एकनाथ खडसे यांचा राजीनामा घेतल्याप्रकरणी काँग्रेस नेते नारायण राणे यांनी मात्र खडसेंची पाठराखण केली आहे. मुख्यमंत्र्यांनी खडसेंचा बळी घेतल्याचा गंभीर आरोप राणेंनी केला आहे. इतके गंभीर आरोप झाल्यानंतर एकनाथ खडसे यांनी आधीच राजीनामा द्यायला हवा होता, असं नारायण राणे म्हणाले. खडसेंचा राजीनामा हा बहुजन समाजावर अन्याय आहे, असं म्हणत बहुजन नेतृत्वाला टार्गेट केलं जात असल्याचा दावाही नारायण राणे यांनी केला. त्याचवेळी मुख्यमंत्र्यांनी एकनाथ खडसेंचा बळी घेतल्याचा निशाणाही राणेंनी साधला. अनेक आरोपांच्या चक्रव्युहात अडकलेल्या एकनाथ खडसे यांची अखेर गच्छंती झाली आहे. आरोपांचं च्रकव्यूह भेदण्यात अयशस्वी ठरलेल्या खडसेंनी सर्व मंत्रिपदाचे राजीनामे दिले आहेत. खडसेंनी आपल्याकडे असलेल्या महसूल कृषी, पशुसंवर्धन, राज्य उत्पादन शुल्क, दुग्धविकास आणि मस्त्यपालन, अल्पसंख्यांक विकास आणि वक्फ मंत्री ही पदं सोडली आहेत. खडसेंची मंत्रिपदं कोणाला? दरम्यान, एकनाथ खडसे यांच्या जागी अर्थमंत्री सुधीर मुनगंटीवार यांची वर्णी लागण्याची शक्यता ‘एबीपी माझा’कडे विश्वसनीय सूत्रांनी व्यक्त केली आहे. खडसेंऐवजी विदर्भातील नेता आणि बहुजन चेहरा हे जाती-पातीचं, विभागाचं गणित सोडवण्याचा प्रश्न मुख्यमंत्री देवेंद्र फडणवीस आणि भाजपसमोर आहे. त्यामुळे विदर्भातील आणि बहुजन चेहरा म्हणून सुधीर मुनगंटीवार यांचं नाव समोर येत आहे. सुधीर मुनगंटीवार यांच्याकडे महसूलमंत्रीपद जाण्याची शक्यता आहे. तसंच त्यांचा शपथविधीही येत्या 15 जून रोजी होणार असल्याचीही माहिती एबीपी माझाच्या सूत्रांनी दिली आहे. मात्र खडसेंकडील उर्वरित मंत्रिपदं कोणाकडे जाणार,याबाबतची उत्सुकता कायम आहे. सध्या मुनगंटीवारांकडे कोणती खाती? सध्या सुधीर मुनगंटीवारांकडे अर्थ आणि नियोजन तसंच वनमंत्रीपद आहे.