Nitesh Rane: आमदार नितेश राणे यांच्या अर्जावर सोमवारी सुनावणी, वैद्यकीय उपचारासाठी कोल्हापूरला हलवण्यात येणार

आमदार नितेश राणे यांची तब्येत बिघडल्याची माहिती समोर आली आहे. दरम्यान छातीत दुखत असल्यानं त्यांना कोल्हापूर येथे हलवण्यात येणार असून जामिन अर्जावर सुनावणी सोमवारी होणार आहे.

Nitesh rane

Nitesh Rane : सिंधुदुर्ग जिल्हा बँक निवडणूकीदरम्यान शिवसेनेच्या संतोष परब यांच्यावर झालेल्या हल्ल्याप्रकरणी दोन दिवस पोलीस कोठडीत असणाऱ्या आमदार नितेश राणे यांना सध्या न्यायालयीन कोठडी सुनावण्यात आली आहे. आमदार नितेश राणे यांना 18 फेब्रुवारीपर्यंत न्यायालयीन कोठडी सुनावण्यात आली आहे. त्यानंतर आज त्यांच्या छातीत दुखत असल्यानं त्यांना कोल्हापूर येथे हलवण्यात येणार होतं. त्यामुळे आज सुनावणी होणार नव्हती मात्र अखेर सुनावणी सुरु झाली असून दोन्ही बाजूच्या वकिलांनी आपल्या बाजू मांडल्यानंतर आता जामिन अर्जावरील उर्वरीत सुनावणी ही सोमवारी होणार आहे. शिवाय सरकारी वकील प्रदीप घरत यांनी आमदार नितेश राणे यांची सुनावणी सिंधुदुर्ग सत्र न्यायाधीश रोटे यांच्या समोर न करता, शिवसैनिक संतोष परब हल्ला प्रकरणाची ज्या न्यायाधीशांसमोर सुनावणी सुरू आहे, त्यांच्या समोरच घ्यावी असा अर्ज केला असून त्यावरील सुनावणी देखील सोमवारी होणार आहे.

जिल्हा सत्र न्यायाधीश रोटे यांनी सुप्रीम कोर्टाच्या आदेशानुसार आमदार नितेश राणे हे शरण आल्यानंतर कस्टडी मध्ये घेतलं नाही, अशी तक्रार करत सरकारी वकील प्रदीप घरत यांनी आमदार नितेश राणे यांची सुनावणी सिंधुदुर्ग सत्र न्यायाधीश रोटे यांच्या समोर न करण्याचा अर्ज न्यायालयात दिला आहे. तर राणेंचे वकील सतीश माने शिंदे यांनी व्यायालयात नियमित जामिनासाठी अर्ज केला तेव्हापासून सरकारी वकील विविध गोष्टीतून वेळकाढूपणा करत असल्याचं सांगत, दुसऱ्या व्यायालयासमोर सुनावणी घेण्यासाठी केलेला अर्ज बरखास्त करा अशी मागणी करत आहेत. दरम्यान या साऱ्या प्रकरणांची सुनावणी आता सोमवारी होणार आहे.

काय आहे प्रकरण?  

सिंधुदुर्ग जिल्हा बँकेच्या निवडणूक रणधुमाळीत शिवसेना कार्यकर्ते संतोष परब यांच्यावर झालेल्या हल्ल्या प्रकरणी भाजप आमदार नितेश राणे वादाच्या भावर्‍यात आडकले आहेत. 18 डिसेंबर 2021 रोजी संतोष परब यांच्यावर कणकवलीत हल्ला झाला होता. परब हे जिल्हा बँक अध्यक्ष सतीश सावंत यांचे निकटवर्तीय असून करंजे गावचे माजी सरपंच आहेत. त्यांच्यावर इनोव्हा कारमधून आलेल्या दोघांनी धारदार चाकूने वार केले होते. या हल्ल्यात परब जखमी झाले होते. या प्रकरणाला सिंधुदुर्ग जिल्ह्यातील राजकिय शत्रुत्वाची पार्श्वभूमी असल्याच्या संशयावरून पोलिसांनी भाजपच्या गोटात चौकशीची सूत्रे हलवली आहेत. मुख्य संशयित आरोपी सचिन सातपुतेला सिंधुदुर्ग ग्रामीण पोलिसांनी दिल्लीतून अटक करण्यात यश मिळवले आहे. सातपुते हा भाजप आमदार नितेश राणे यांच्या स्वाभिमानी संघटनेचा कार्यकर्ता आहे. त्यामुळे या प्रकरणात नितेश राणेंची चौकशी सुरू करण्यात आली आहे.

हे देखील वाचा- 

LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोडी पाहा लाईव्ह - ABP Majha