परभणीच्या सोनपेठमध्ये अल्पवयीन तरुणीवर तिघांकडून अत्याचार, मुलीचा उपचारादरम्यान मृत्यू, दोन अल्पवयीन ताब्यात

परभणीच्या सोनपेठ तालुक्यातील एका तांड्यावरील येथे एका 16 वर्षीय अल्पवयीन तरुणीवर 12 सप्टेंबर रोजी तीन तरुणांनी अत्याचार केल्याची धक्कादायक घटना घडली आहे.

सोनपेठ_पोलिस_स्टेशन

परभणी :  परभणीच्या सोनपेठ (Parbhani Sonpeth Rape case) तालुक्यातील एका तांड्यावरील येथे एका 16 वर्षीय अल्पवयीन तरुणीवर 12 सप्टेंबर रोजी तीन तरुणांनी अत्याचार केल्याची धक्कादायक घटना घडली आहे. महत्वाचे म्हणजे या तीन आरोपींमधील दोघे जण अल्पवयीनच आहे. घटनेनंतर पीडित तरुणीने विषारी औषध प्राशन केले आहे. तिच्यावर लातूर येथील जिल्हा शासकीय रुग्णालयात उपचार सुरु होते. हॉस्पिटल प्रशासनाने काही वेळापूर्वी या पीडित तरुणीचा मृत्यू झाल्याचे घोषित केला आहे.

पोलिसांच्या माहितीनुसार, परभणीच्या सोनपेठ तालुक्यातील एका तांड्यावरील 16 वर्षीय तरुणीस 3 युवक मागच्या 2 वर्षापासून पाठलाग करणे, विनयभंग करणे आदी प्रकार करत होते.  12 सप्टेंबर रोजी या तीन तरुणांनी एका पडक्या शाळेत या तरुणीला बोलवले व तिच्यावर बलात्कार केला. ही घटना घडल्यानंतर पीडितेने रागाच्या भरात विषारी औषध घेतले. 

ही बाब घरच्यांना कळली त्यांनी तात्काळ तिला पहिल्यांदा अंबाजोगाई येथील रुग्णालयात नेण्यात आले. मात्र तिथून तिला लातूर येथे हलवण्यात आले. सध्या तिच्यावर लातूर येथील शासकीय रुग्णालयात उपचार सुरु असून प्रकृती गंभीर असल्याने तिची मृत्यूशी झुंज सुरू होती. मात्र ती झुंज आता संपली आहे.

दरम्यान घटना घडल्यानंतर आज पीडितेच्या वडिलांच्या फिर्यादीवरुन सोनपेठ पोलीस ठाण्यात  तीन तरुणांविरोधात कलम (ग)३७६(ड)३४ भादंवि सह कलम ४,६,८,१७ पॉस्को कायद्यांअंतर्गत गुन्हा दाखल करण्यात आला असून दोन अल्पवयीन तरुण पोलिसांच्या अटकेत आहे. या घटनेने सोनपेठ तालुक्यासह जिल्ह्यात एकच खळबळ उडाली आहे.