Raj Thackeray: मराठीला 'अभिजात भाषेचा' दर्जा मिळावा यासाठी मनसेला साथ द्या, राज ठाकरेंचं आवाहन

Raj Thackeray: आपण 'मराठी एकत्र' असू तर 'सर्वत्र मराठी' करायला क्षणाचाही विलंब लागणार नाही, असे देखील राज ठाकरे म्हणाले.

Raj Thackeray

Marathi Rajbhasha Din 2023 : आज मराठी भाषा गौरव दिन (Marathi Bhasha Gaurav Din).... तुमची आमची सर्वांची मायबोली मराठीचा सन्मान, गौरव करण्याचा दिवस... खरं तर मराठीचा गौरव आपण रोज करायला हवा... तरीही कुसुमाग्रज यांचा जन्मदिन मराठी भाषा गौरव दिन म्हणून साजरा केला जातो. या पार्श्वभूमीवर मनसे अध्यक्ष राज ठाकरे (Raj Thackeray) यांनी सोशल मीडियाच्या माध्यमातून सर्वांना मराठी भाषा गौरव दिनाच्या शुभेच्छा दिल्या आहेत. तसेच मराठी भाषेच्या अभिजात भाषेच्या दर्जासाठी आम्ही संघर्ष केला आणि पुढे देखील करु. पण त्यासाठी आमच्या संघर्षाला तुमची साथ द्या, असं आवाहन राज ठाकरे यांनी केले आहे.

...तर 'सर्वत्र मराठी' करायला क्षणाचाही विलंब लागणार नाही : राज ठाकरे 

लाडक्या मराठी भाषेच्या गौरव दिनानिमित्त शुभेच्छा देताना या भाषेसाठी आपल्याला सगळ्यांना उभं रहावं लागणार आहे हे भान सोडून चालणार नाही. व्यवहारात मराठी, प्रशासनात मराठी, दूरसंचार माध्यमांमध्ये मराठी, दूरदर्शनच्या समालोचनात मराठी इथपासून ते अभिजात भाषेच्या दर्जासाठी आम्ही संघर्ष केला, आणि पुढे देखील करु. पण त्यासाठी तुमची आमच्या संघर्षाला साथ हवी तरच हे शक्य आहे. मला माहिती आहे, मनसेकडूनच तुमच्या सगळ्या बाबतीत अपेक्षा असतात, पण ह्या अपेक्षा पूर्ण करण्यासाठी तुमच्या साथीची गरज आहे. आपण 'मराठी एकत्र' असू तर 'सर्वत्र मराठी' करायला क्षणाचाही विलंब लागणार नाही, असे आवाहन राज ठाकरे यांनी केले आहे.

मराठी ही जगाची ज्ञानभाषा आणि जगाला हेवा वाटेल असा महाराष्ट्र घडावा हे स्वप्न असायला हवं : राज ठाकरे

राज ठाकरे यांनी म्हटलं आहे की, कुसुमाग्रजांच्या सांस्कृतिक क्षेत्रातील अतुलनीय योगदानाला अभिवादन म्हणून तेव्हाच्या सरकारने, कुसुमाग्रजांचा जन्मदिवस, 27 फेब्रुवारी, 'मराठी भाषा गौरव दिन' म्हणून घोषित केला. पण नेहमीप्रमाणे सरकारी उदासीनतेत तो साजरा व्हायचा. कुठल्याही राजकीय पक्षाला देखील तो साजरा करायची इच्छा नव्हती. पण महाराष्ट्र नवनिर्माण सेनेने तो अत्यंत उत्साहात साजरा करायला सुरुवात केली. मराठी भाषेला 'अभिजात भाषेचा' दर्जा मिळावा म्हणून पत्रव्यवहार करणारा पक्ष पण आमचाच पहिला. हे सगळं सांगायचा उद्देश इतकाच की, आपल्या भाषेसाठी, आपल्या सणांसाठी, आपल्या संस्कृतीसाठी महाराष्ट्र नवनिर्माण सेना सोडून इतर एकही पक्ष हिरीरीने पुढे आलेला नाही. आणि सध्या जी एकूणच जी राजकीय दंगल सुरु आहे, त्यात कोणी येईल अशी शक्यता वाटत नाही.

मी माझ्या विकास आराखड्यात म्हणलं आहे तसं, मराठी जगाची ज्ञानभाषा व्हावी आणि जगाला हेवा वाटेल असा महाराष्ट्र घडावा हे आपलं स्वप्न असायला हवं. हे स्वप्न वास्तवात यावं, ह्याच आजच्या दिवसाच्या शुभेच्छा   असं ठाकरे यांनी म्हटलं आहे.