पुढील तीन दिवस राज्यात अवकाळीचा इशारा, कोणत्या जिल्ह्यात कधी पडेल पाऊस?
सध्या राज्यातील काही भागात अवकाळी पावसानं (Unseasonal rain) थैमान घातलं आहे. याचा मोठा फटका शेती पिकांना बसला आहे.
Maharashtra Weather : सध्या राज्यातील काही भागात अवकाळी पावसानं (Unseasonal rain) थैमान घातलं आहे. याचा मोठा फटका शेती पिकांना बसला आहे. दरम्यान, पुढील तीन दिवस विदर्भासह खान्देशात जोरदार पावसाची शक्यता ज्येष्ठ हवामान तज्ज्ञ माणिकराव खुळे (Manikrao Khule) यांनी वर्तवली आहे. पावसाच्या शक्यतेबाबत माणिकराव खुळे नेमकं काय म्हणालेत ते पाहुयात.
14 जिल्ह्यात मध्यम ते मुसळधार पावसाची शक्यता
संपूर्ण विदर्भातील 11 आणि खान्देशातील नंदुरबार, धुळे आणि जळगांव अशा तीन जिल्ह्यासहित एकूण 14 जिल्ह्यात मध्यम ते मुसळधार पावसाची शक्यता आहे. पुढील तीन दिवस म्हणजे 1 डिसेंबरपर्यंत कायम आहे. तर मुंबईसह कोकण आणि मराठवाड्यासहीत उर्वरित महाराष्ट्रातील 22 जिल्ह्यात मात्र शुक्रवार दिनांक 1 डिसेंबर पर्यंत ढगाळ वातावरणासहित अगदीच तूरळक ठिकाणीच किरकोळ पावसाची शक्यताही कायम आहे. दरम्यानच्या काळात गारपीटीची शक्यता मात्र महाराष्ट्रात कुठेच जाणवत नाही.
7 जिल्हे वगळता उर्वरित महाराष्ट्रात कमाल तापमानात घट होणार
माणिकराव खुळे यांनी दिलेल्या माहितीनुसार, सिंधुदुर्ग, रत्नागिरी, कोल्हापूर, पुणे, सातारा, सांगली आणि सोलापूर असे 7 जिल्हे वगळता महाराष्ट्रातील उर्वरित 29 जिल्ह्यात दुपारच्या कमाल तापमानात सरासरीपेक्षा 4 डिग्रीने कमालीची घसरण जाणवत आहे. तिथे दिवसाही चांगलाच गारवा जाणवू शकतो. विशेषतः विदर्भ मराठवाड्यात हा परिणाम अधिक जाणवेल अशी शक्यता माणिकराव खुळे यांनी व्यक्त केली आहे. दरम्यान, शनिवार दिनांक 2 डिसेंबरपासून वातावरण पूर्णपणे निवळेल असा अंदाज वर्तवण्यात आला आहे.
शेतकऱ्यांना अवकाळीचा मोठा फटका
अवकाळी पाऊस (Unseasonal Rain) आणि गारपिटीमुळे नागरिकांचं मोठं नुकसान झालं आहे. वर्षभर मेहनत करून तयार केलेली पीक अवकाळी पावसामुळे शेतातच कोलमडून पडली आहेत. त्यामुळे या शेतीवर उदरनिर्वाह करणाऱ्या शेतकऱ्यांनी आता उदरनिर्वाह करायचा कसा असा प्रश्न उपस्थित केला. अनेक ठिकाणी फळबागांना देखील फटका बसला आहे. त्यामुळं राज्यातील शेतकरी चिंतेत आहेत. पृथ्वीचं वाढतं तापमान हे अवकाळी पावसाला कारणीभूत असल्याचे डख म्हणाले. भविष्यात अवकाळी पावसाला, गारपीटीला सामोर जावं लागणार आहे. हवेचं कमी दाबाचं क्षेत्र निर्माण झाल्यामुळं अशी स्थिती निर्माण होत असल्याचे पंजाबराव डख म्हणाले. हा पाऊस 2 डिसेंबरपर्यंत राहणार असल्याचे डख म्हणाले. पूर्व विदर्भात हा पाऊस 1 डिसेंबरपर्यंत राहणार आहे. पश्चिम विदर्भात हा पाऊस 1 डिसेंबरपर्यंत पडणार आहे. हा पाऊस मुसळधार असणार आहे. ओढे नाले भरुन वाहतील असा अंदाज पंजाबराव डख यांनी व्यक्त केला आहे. मराठवाड्यात मात्र 2 डिसेंबरपर्यंत पाऊस पडणार आहे. तर पश्चिम महाराष्ट्र आणि उत्तर महाराष्ट्रात हा पाऊस 1 डिसेंबरपर्यंत राहणार आहे.
महत्त्वाच्या बातम्या:
राज्यात का पडतोय अवकाळी पाऊस? आणखी किती दिवस असणार 'हा' पाऊस
महत्त्वाच्या बातम्या
