Nashik : रेल्वेतून बॅग चोरली, 'ती' एसटीच्या कर्मचाऱ्यांना सापडली, तरुण आत्महत्या करणार होता, मात्र... काय घडलं नेमकं? 

Nashik News : विशेष म्हणजे राजरत्न कोकाटे इस्रोमध्ये निवड झाली असून याच कामी तो मुंबईला कागदपत्रे पडताळणीसाठी जात होता.

Nashik Stolen Bag

Nashik News : बुलढाण्याहून (Budlhana) मुंबईला रेल्वेने निघालेल्या एका प्रवाशाची बँग नाशिक (Nashik) ते इगतपुरीदरम्यान (Igatpuri) चोरट्यांनी रेल्वेतून चोरली. मात्र, ही चोरलेली बॅग कसारा-धुळे या बसमध्ये बेवारस स्थितीत एसटी कर्मचाऱ्यांना सापडली. सापडलेली बॅग ही बुलढाण्यातील संग्रामपूर येथील प्रवाशाची असल्याचे एसटी कर्मचाऱ्यांच्या निदर्शनास आल्यानंतर त्यांनी बॅग पोहचविण्यासाठी अनेक प्रयत्न केले आणि मालकाला बॅग परत केली.

हल्ली अनेकदा, रस्त्यावरून चालताना, कधी रिक्षात, तर कधी बसमध्ये अनेक नागरिकांच्या वस्तू हरविल्याची घटना निदर्शनास येतात. त्यामुळे अशा वस्तू सापडणे मुश्किल होऊन बसते. मात्र काही घटनांमध्ये आश्चर्यकारकरित्या अशा हरवलेल्या वस्तू परत मिळाल्याच्या दुर्मिळ घटना बघायला मिळतात. अशीच काहीशी घटना बुलढाणा येथील राजरत्न कोकाटे यांच्यासोबत घडली. राज्य परिवहन महामंडळाच्या एसटी कर्मचाऱ्यांना (Maharashtra ST) सापडलेल्या वस्तूबाबत केवळ प्रामाणिकपणा दाखविला नाही, तर मालकापर्यंत पोहोचण्याची तत्परता दाखवून आपल्या कर्तव्यदक्षेतेचा परिचयही दिला. इगतपुरी आगारात कार्यरत असलेले वाहक गोरख हिरामण शिंदे व चालक प्रकाश रामदास खाडे हे कसारा- धुळे मार्गावर (Kasara Dhule) कर्तव्य करीत असताना कसारा येथे त्यांना बसमध्ये बेवारस असलेली बॅग आढळून आली. 

दरम्यान बॅग मालकाची माहिती मिळावी यासाठी बॅगची तपासणी केली असता बुलढाणा येथील संग्रामपूर येथील एकलहरे गावातील राजरत्न प्रभाकर कोकाटे यांची बॅग असल्याचे समोर आले. या बॅगेत शैक्षणिक कागदपत्रे, तसेच 14 हजार रुपयांची रोकड देखील मिळून आली. तर दोन मोबाईल नंबर मिळून आले, मात्र या नंबरवर कॉल केला असता बंद असल्याचे समजले. यावर चालक वाहकांनी स्वतः या नंबरवर रिचार्ज करत नंबरवर संपर्क साधला. सुदैवाने ज्याची बॅग हरवली होती, त्यानेच फोन उचलला, त्यानंतर सगळी कहाणी उघड होऊन चालक वाहकांसह कोकाटे यांनी सुटकेचा निश्वास सोडला.

दरम्यान राजरत्न हा दिव्यांग असून हिंगोली येथे जिल्हा परिषदेत लिपिक म्हणून कार्यरत आहे. विशेष म्हणजे त्यांची इस्रोमध्ये निवड झाली असून याच कामी तो मुंबईला कागदपत्रे पडताळणीसाठी जात होता. बॅगेतील पहिल्या कप्प्यात 1700 रुपये होते, ते चोरट्याने काढून घेत चोरट्याने बॅग एसटी बसमध्ये ठेवून दिली. सुदैवाने आतील कप्प्यात असलेली 14 हजार रुपयांची रोकड, कागदपत्रे सुरक्षित राहिली. 

राजरत्नच्या मनात आत्महत्येचे विचार

दरम्यान चोरीस गेलेल्या बॅगेत सर्व शैक्षणिक कागदपत्रे होती. इस्रोसारख्या संस्थेत निवड झाल्याने अनेक स्वप्ने त्याने पाहिली. परंतु प्रवासात बॅगच हरविल्याने त्याचे स्वप्न क्षणात धुळीस मिळाले. हरविलेली बॅग मिळावी म्हणून त्याने पोलिस ठाणे गाठले. तेथे चोरीची फिर्याद दाखल केली. परंतु बॅग मिळेल की नाही, याची शाश्वती त्याला नव्हती. त्यामुळे आत्महत्येचे विचार मनात घोळत होते, असे तो सांगत असताना सर्वांना धक्का बसला. एसटी कर्मचाऱ्यांनी बॅग परत केल्याने त्याला एक प्रकारे जीवदान मिळाल्याची भावना कर्मचाऱ्यांनी व्यक्त केली.

इतर संबंधित बातम्या :