Ind vs Pak : भारत-पाकिस्तान सामन्याचे लाईव्ह स्ट्रिमिंग दाखवणार नाही, ठाकरेंच्या शिवसेनेच्या दणक्यानंतर PVR ची माघार
India vs Pakistan PVR Live Streaming : भारत-पाकिस्तान सामना दाखवणे म्हणजे पहलगाममधील सिंदूर उजाडलेल्या महिलांचा अपमान आहे, तो देशद्रोह आहे अशी भूमिका ठाकरेंच्या शिवसेनेने घेतली आहे.
मुंबई : शिवसेना ठाकरे गटाच्या विरोधानंतर पीव्हीआर सिनेमाने (PVR Cinemas) एक पाऊल मागे घेतलं आहे. आशिया कपमध्ये होणाऱ्या भारत आणि पाकिस्तानमधील अंतिम सामन्याचे लाईव्ह स्ट्रिमिंग (India vs Pakistan Live Streaming) करणार नसल्याचं पीव्हीआरकडून स्पष्ट करण्यात आलं आहे. महाराष्ट्रातील पीव्हीआर सिनेमागृहात हा सामना दाखवण्यात येणार नाही.
पाकिस्तानच्या दहशतवाद्यांनी भारतावर हल्ला केला, पहलगाममध्ये निरपराध 26 जणांचा जीव घेतला. त्यामुळे पाकिस्तानसोबत सामना खेळणे, किंवा तो दाखवणे हा देशद्रोह आहे अशी भूमिका शिवसेना ठाकरे गटाने घेतली होती. पीव्हीआर सिनेमाला त्यांनी इशाराही दिला होता. त्यानंतर पीव्हीआरने या सामन्याचे लाईव्ह स्ट्रिमिंग होणार नसल्याचं स्पष्ट केलं.
Shiv Sena Opposed To Ind Vs Pak Match : ठाकरे गटाचा विरोध
शनिवारी एक ट्वीट करत पीव्हीआरने देशभरात भारत आणि पाकिस्तान सामन्याचे लाईव्ह स्ट्रिमिंग करणार असल्याचं सांगितलं होतं. त्यासाठी देशभरात 100 हून जास्त स्क्रिन्सचे नियोजन केल्याचंही सांगण्यात आलं होतं. पीव्हीआरच्या या निर्णयाला शिवसेना ठाकरे गटाने विरोध केला.
Sanjay Raut Tweet On PVR : देशद्रोहाचा गुन्हा दाखल करा, संजय राऊतांची मागणी
शिवसेना ठाकरे गटाचे खासदार संजय राऊत यांनी सोशल मीडियातून निशाणा साधला. देशद्रोहाच्या आरोपाखाली पीव्हीआरवाल्यांना अटक करा. भारत पाकिस्तान सामना खेळणे, खेळवणे, दाखवणे, पाहाणे, हा पहलगाममधील सिंदूर उजाडलेल्या महिलांचा अपमान आहे, देशद्रोह आहे. क्रिकेट आणि दहशतवाद एकत्र चालणार नाही. पीव्हीआर, तुमच्याकडे हिंदुतवादी जनतेचे लक्ष्य आहे अशा शब्दात संजय राऊत यांनी इशारा दिला होता.
हा तर नीच पणाचा कळस:
— Sanjay Raut (@rautsanjay61) September 28, 2025
PVR मधील” पी “ म्हणजे पाकिस्तान आहे काय?
हे पीव्हीआर वाले भारत पाकिस्तान क्रिकेट सामन्याचे थेट प्रक्षेपण सर्वत्र दाखवणार आहेत.
ह्यांच्यात एवढी हिम्मत आणि निर्ल्लजपणा येतो कोठून?
सोनम वांगचुक याना पाकिस्तानशी सहानुभूती ठेवल्याच्या आरोपाखाली देशद्रोही ठरवून अटक… pic.twitter.com/GY7343t8UK
शिवसेना ठाकरे गटाचा विरोध लक्षात घेता आता पीव्हीआरने आपला निर्णय बदलला आहे. भारत आणि पाकिस्तान सामन्याचे लाईव्ह स्ट्रिमिंग महाराष्ट्रात दाखवण्यात येणार नाही असं पीव्हीआरने स्पष्ट केलं. या संबंधी पीव्हीआरचे प्रोग्रामिंग आणि ऑपरेशन्सचे वरिष्ठ उपाध्यक्ष थॉमस डिसोझा यांनी शिवसेनेशी संपर्क साधत हा निर्णय कळवल्याची माहिती ठाकरेंच्या शिवसेनेचे नेते अखिल चित्रे यांनी माध्यमांना दिली.
#शिवसेनेचा_ठाकरी_दणका : महाराष्ट्रात PVR चित्रपटगृहातून 'भारत–पाकिस्तान क्रिकेट सामन्या'चं लाईव्ह प्रक्षेपण दाखवलं जाणार नाही... @AUThackeray @ShivSenaUBT_ @ShivsenaUBTComm @akhil1485 pic.twitter.com/HblXQEuA9T
— शिव संचार सेना - Shiv Sanchar Sena (@shivsancharsena) September 28, 2025
ही बातमी वाचा:
महत्त्वाच्या बातम्या
