शेकापचे ज्येष्ठ नेते 'विधानसभेचे विद्यापीठ' गणपतराव देशमुख यांचे निधन
शेकापचे ज्येष्ठ नेते गणपतराव देशमुख यांचे सोलापूर येथे उपचारादरम्यान निधन झाले.
सोलापूर : शेकापचे ज्येष्ठ नेते गणपतराव देशमुख यांचे रात्री साडेनऊ वाजता अश्विनी हॉस्पिटल सोलापूर येथे उपचार दरम्यान निधन झाले. वयाच्या 95 व्या वर्षी त्यांनी अखेरचा श्वास घेतला. विधानसभेचे विद्यापीठ अशी ओळख असलेले गणपतराव देशमुख 55 वर्षे आमदार होते. त्यांच्या मागे पत्नी, दोन मुले आणि एक मुलगी असा परिवार आहे.
गणपत देशमुखांना संपूर्ण राज्यभरात आबा नावाने त्यांना हाक मारली जात होती. गणपतराव देशमुखांचा जन्म 10 ऑगस्ट 1927 साली सोलापूर येथे झाला. 1962 ला त्यांनी सांगोल्यातून सर्वप्रथम निवडणूक लढली होती. सुरूवातीपासून गणपत देशमुख शेतकरी कामगार पक्षात होते. 1978 मध्ये शरद पवार यांनी पुलोद सरकार स्थापन केले होते. त्यावेळी त्यांचा मंत्रिमंडळात समावेश झाला.1999 मध्ये गणपतराव देशमुख यांचा मंत्रिमंडळात समावेश झाला. 2012 मध्ये आमदार म्हणून विधानसभेतील त्यांच्या सहभागास 50 वर्षे पूर्ण झाल्याने सभागृहासह सरकारनेही त्यांचा गौरव केला होता. 2019 ला राजकारणातून निवृत्ती घेतली. नातू डॉ. अनिकेत देशमुख याने या मतदारसंघात निवडणूक लढवली.
मात्र तब्बल 55 वर्षे एकहाती सत्ता गाजवलेल्या आबांच्या मतदारसंघात अनिकेत देशमुख यांचा पराभव झाला. कोणतेही अधिवेशन असलं तरी गणपतराव एसटीनेच प्रवास करायचे हे विशेष. कोरोनाच्या काळात देखील लोकांसाठी गणपतराव काम करत राहिले.
मार्च 1990, नोव्हेंबर 2004 आणि नोव्हेंबर 2009 मध्ये महाराष्ट्राच्या राज्यपालांकडून विधानसेभेचे हंगामी अध्यक्ष म्हणून नियुक्ती झाली. राज्यातील दुष्काळी भागाला मिळावे तसेच सांगोला तालुका पाणलोट विकास क्षेत्रामध्ये अग्रेसर करण्यासाठी त्यांनी प्रयत्न केले.
1962-67, 1967-72, 1974-78, 1978-80, 1980-85, 1990-95, 1999-2004, 2004-2009, ऑक्टोबर 2009, ऑक्टोबर 2014 मध्ये विभानसभेवर 11 व्या वेळेस फेर निवड झाली होती.
सांगोल्यातील सूत मिल परिसरात अंत्यसंस्कार होणार
सकाळी 6 वाजता सोलापूर शहरातील रुग्णालयातून पार्थिव गणपतराव देशमुख यांचे जन्मगाव असलेल्या पेनूर, मोहोळ येथे जाईल. त्यानंतर सकाळी 8.30 वाजता पेनूर, मोहोळ येथून त्यांचं सध्याचे राहते घर असलेल्या सांगोल्याला रवाना होतील. सकाळी 11 पर्यंत सांगोल्यातील घरात पार्थिव अंत्यदर्शनासाठी ठेवण्यात येणार आहे. त्यानंतर सांगोल्यातील सूत मिल परिसरात अंत्यसंस्कार होणार आहे.
महत्त्वाच्या बातम्या
