Ganesh Chaturthi 2024 Muhurat Live : आजपासून देशभरात गणेशोत्सवाचा उत्साह; घरोघरी बाप्पांचं आगमन
Ganesh Chaturthi 2024 Muhurat Live: राज्यभरात आज गणेशोत्सवाचा उत्साह दिसून आला आहे
LIVE
Background
Ganesh Chaturthi 2024 Muhurat Live : राज्यासह देशभरात आज गणेशोत्सवाचा जल्लोष पाहायला मिळतोय. सार्वजनिक मंडळांपासून ते घरोघरी लाडक्या गणरायाचं आगमन झालं आहे. या निमित्ताने सगळीकडेच गणेशोत्सवाची धामधूम आणि उत्साह पाहायला मिळतोय. सकाळपासून श्री गणेशाच्या प्राणप्रतिष्ठापनेपासून गणपतीची आरती मोठमोठ्या गणेश मंडळांत पार पडली. एकंदरीतच सर्वत्र आज आनंदाचं, उत्साहाचं वातावरण पाहायला मिळतंय.
अभिनेता गोविंदा यांच्या निवासस्थानी गणरायाची विधीपूर्वक स्थापना.
महाराष्ट्रात गणेशोत्सव मोठ्या उत्साहाने व आनंदाने दरवर्षी साजरा करण्यात येतो. राज्यातील सामान्य जनतेसोबतच राजकीय नेते तसेच अभिनेत्यांच्या घरी गणपतीबाप्पांचे आगमन झाले. हिंदी चित्रपट सृष्टीतील ज्येष्ठ अभिनेते गोविंदा यांच्या जुहू येथील निवासस्थानी गणरायाची विधिपूर्वक स्थापना करण्यात आली. ढोल ताशाच्या गजरात वाजत गाजत गोविंदा आणि त्यांच्या कुटुंबीयांनी बाप्पा घरी आणून स्थापना केली. गोविंदा आणि त्याच्या कुटुंबीयांनी मनोभावे गणरायाची आरती करून सर्वांच्या सुखसमृद्धी व भरभराटीसाठी कामना केली. अभिनेता गोविंदा यांच्या घरी दीड दिवसांसाठी बाप्पाचे आगमन झाले आहे.
केंद्रीय मंत्री प्रतापराव जाधव यांच्या निवासस्थानी गणरायाचे आगमन
केंद्रीय आयुष आरोग्य व कुटुंब कल्याण राज्यमंत्री प्रतापराव जाधव यांच्या निवासस्थानी आज गणेशोत्सवानिमित्त गणरायाचे आगमन झाले. सहकुटुंब विधिवत पूजन करून विघ्नहर्ताचे प्रतापराव जाधव यांच्या परिवाराने सहर्ष स्वागत केले. गणेश भक्ताच्या जीवनातील दुःख नाहीये होऊन देशातील जनता सुखी समृद्ध आणि निरोगी आयुष्य मिळू दे ....बळीराजाला चांगले दिवस येऊ दे असे साकडे केंद्रीयमंत्री प्रतापराव जाधव यांनी गणरायाच्या चरणी घातले. गणरायाची विधिवत पूजाअर्चा केली यावेळी त्यांच्यासोबत त्यांच्या पत्नी राजश्री जाधव मुलगा ऋषिकेश जाधव सून मयुरी नातू रणविर आणि पुतण्या धिरज जाधव असा आप्त परिवार होता.
जनतेच भल करणाऱ्या महायुतीला पुन्हा सत्तेत येऊ दे, आमदार भरत गोगावले यांचे बाप्पा चरणी साकडे
रायगडसह कोकणात गणेशोत्सव मोठ्या उत्साही वातावरणात साजरा होतोय. शिवसेना पक्षप्रतोद भरत गोगावले यांच्या महाड तालुक्यातील मूळ जन्मगाव असलेल्या पिंपळवाडी येथील निवास स्थानी आज गणरायाची प्रतिष्ठापना करण्यात आली. यावेळी आमदार भरत गोगावले यांनी गणरायाला साकडे घातले. बाप्पा आतापर्यंत जो कृपाशीर्वाद सर्वांवर ठेवला तोच कृपाशीर्वाद यापुढही राहूदे. राज्यातील मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार यांच्या नेतृत्वातील सरकार जनतेच्या हिताचे काम करतय. जनतेच भल करणाऱ्या महायुतीला पुन्हा सत्तेत येऊ दे,मला सुध्दा पुन्हा चौथ्यांदा विजयी कर असे साकडे आमदार भरत गोगावले यांनी बाप्पा चरणी घातले.
Lakshadweep Ganesh Chaturthi 2024 : लक्षद्वीप मध्ये पहिल्यांदाच गणेशोत्सवाची धूम
जगाच्या कोणत्याही कानाकोपऱ्यात मराठी माणूस जर गेला तर तो तिथे गणेश उत्सव नक्कीच साजरा करतो. लक्षदीप बेटावर पहिल्यांदाच गणेशोत्सवची धूम पहायला मिळते. लक्षद्वीप हा 36 बेटांचा समूह. यातील दहा बेटावरच मानवी वस्ती आहे. ती फक्त 80 हजार. 32 स्क्वेअर किलोमीटरचा हा परिसर. येथील लोकसंख्येत 95 टक्के मुस्लिम समाज आहे.
आज पर्यंत इथे गणेश उत्सव सार्वजनिक स्वरूपात साजरा झालाच नाही. पहिल्यांदाच असा गणेशोत्सव साजरा होतोय तो ही लक्षद्वीपची राजधानी कावरत्ती येथे. पुढाकार घेतलाय तेथील पोलीस अधीक्षक हरेश्वर स्वामी यांनी. मूळचे ते लातूर जिल्ह्यातील . लक्षदीप बेट समूहाचे ते एसपी म्हणून काम करत आहेत. इंडिया रिझर्व बटालियनच्या प्रांगणात गणेशाची प्राणप्रतिष्ठा करण्यात आली. गणपती बाप्पा मोरयाचा जयघोष लक्षद्वीप समूहात पहिल्यांदाच घुमलाय. मुंबई येथून खास गणपतीची मूर्ती मागवण्यात आली आहे. अकरा दिवस चालणाऱ्या या उत्सवात भारतभरातून नोकरीसाठी तिथे आलेल्या अनेकांनी सहभाग घेतला आहे. भजनसंध्याचा कार्यक्रम आयोजित करण्यात आला आहे.
Ganesh Chaturthi 2024 : बेळगावात मोठ्या जल्लोषात गणरायाचं आगमन
विघ्नहर्त्या गणरायाचे बेळगाव आणि परिसरात भक्तिभावाने आणि जल्लोषात स्वागत करण्यात आले. सकाळपासूनच मुर्तिकारांच्या चित्रशाळेकडे गणपतीची मूर्ती नेण्यासाठी गणेश भक्तांनी गर्दी केली होती. पारंपरिक वाद्यांच्या गजरात गणरायाचे स्वागत करण्यात आले. बहुतेक जणांनी बँड लावून , ढोल ताशाच्या गजरात श्री मूर्ती वाजत गाजत नेली. मूर्ती नेण्यासाठी गणेश भक्तांनी गर्दी केल्यामुळे अनेक ठिकाणी वाहतुकीची कोंडी झाली होती. यावर्षी पर्यावरण पूरक मूर्तीला अधिक मागणी होती. काही जणांनी श्री मूर्ती दुचाकीवरून नेली. मराठा लाईट इन्फट्री रेजिमेंटल सेंटरमध्ये देखील गणपतीची प्रतिष्ठापना करण्यात आली.
महत्त्वाच्या बातम्या
ट्रेंडिंग न्यूज
