NSE Scam Case : मुंबईचे माजी पोलीस आयुक्त संजय पांडेंच्या अडचणीत वाढ, सीबीआयला मिळाले महत्त्वाचे पुरावे

NSE Scam Case : मुंबईचे माजी पोलीस आयुक्त संजय पांडे ( Sanjay Pandey) यांच्या कंपनीने जवळपास आठ वर्षे नॅशनल स्टॉक एक्सचेंजच्या (NSE) कर्मचार्‍यांचे फोन बेकायदेशीरपणे टॅप केल्याची माहिती सीबीआयला (CBI) मिळाली आहे.

sanjay pandey

मुंबई : मुंबईचे माजी पोलीस आयुक्त संजय पांडे ( Sanjay Pandey) यांच्या अडचणीत आणखी वाढ झाली आहे. संजय पांडे यांच्या कंपनीने जवळपास आठ वर्षे नॅशनल स्टॉक एक्सचेंजच्या (NSE) कर्मचार्‍यांचे फोन बेकायदेशीरपणे टॅप केल्याची माहिती सीबीआयला (CBI) मिळाली आहे. संजय पांडे यांच्या iSEC सर्व्हिसेस प्रायव्हेट लिमिटेड या कंपनीने रेड सर्व्हर नावाच्या उपकरणांचा वापर करून हे फोन टॅप केल्याचे समोर आले असल्याचे सीबीआयचे म्हणणे आहे. 

शुक्रवारी जोगेश्वरी कार्यालयात केलेल्या झाडाझडतीदरम्यान सीबीआयच्या पथकाने असे एक उपकरण जप्त केले आहे. सूत्रांनी दिलेल्या माहितीनुसार, कंपनीने चार रेड सर्व्हरचा वापर केला आहे. प्रत्येकी एक एनएसई कर्मचाऱ्यांना सेवा देणार्‍या चार एमटीएनएल टेलिफोन लाईनशी संलग्न आहे. यातील प्रत्येक उपकरणात एकावेळी 120 कॉल टॅप करण्याची क्षमता आहे. 

कंपनी आपल्या जोगेश्वरी कार्यालयात टॅप केलेल्या टेलिफोनिक संभाषणाचे उतारे तयार करत असे आणि NSE च्या  वरिष्ठांना पुरवत असे. सीबीआयच्या पथकाने कार्यालयातून असाच एक उतारा जप्त केला असल्याची माहिती सूत्रांनी दिली आहे. 

सीबीआयच्या पथकाने जोगेश्वरी येथील कार्यालयातून  25 डेस्कटॉप, दोन लॅपटॉप, मोबाईल फोन आणि बेकायदेशीर फोन टॅपिंगशी संबंधित अनेक दस्तऐवजही जप्त केले होते.

सीबीआयच्या सूत्रांनी दिलेल्या माहितीनुसार, संजय पांडे यांच्या कंपनीने मुंबईतील एनएसई इमारतीच्या तळघरातून कथित बेकायदेशीर कृत्य केले. या कंपनीला येथे एक छोटी जागा देण्यात आली होती.

2009 ते 2017 दरम्यान बॉंम्बे स्टॉक एक्स्चेंजच्या कर्मचार्‍यांचे बेकायदेशीरपणे फोन टॅपिंग केल्याप्रकरणी सीबीआयने संजय पांडे, चित्रा रामकृष्ण आणि रवी नारायण यांच्या विरोधात एफआयआर नोंदवला आहे.   चित्रा रामकृष्ण या NSE च्या माजी एमडी आहेत, तर रवी नारायण हे NSE चे मीजी सीईओ आहेत. 

महत्वाच्या बातम्या