कळंब पंचायत समिती वाद, शिवसेना खासदार ओमराजे निंबाळकरांसह 11 जणांवर गुन्हे दाखल

भाजप आमदार राणा जगजीतसिंह यांच्यासह त्यांच्या सहकाऱ्यांवर खुनाच्या प्रयत्नासह काही गंभीर कलमानुसार गुन्हा दाखल करण्यात आला होता. त्यानंतर आज खासदार ओमराजे निंबाळकर यांच्यावरही गुन्हा दाखल करण्यात आला आहे.

सोलापूर : भाजप आमदार राणा जगजीत सिंह आणि शिवसेना खासदार ओमराजे निंबाळकर यांच्या गटातील कळंब पंचायत समिती पळवापळवी वादाला आता वेगळे वळण लागलं आहे. भाजप आमदार राणा जगजीतसिंह यांच्यानंतर आता शिवसेना खासदार ओमराजे निंबाळकर यांच्यावरही अकलूज पोलिस स्टेशनमध्ये गुन्हा दाखल आहे. त्यामुळे भाजप-शिवेसेनेमधील वाद आता पोलीस स्टेशनमध्ये पोहोचला आहे.

उस्मानाबाद जिल्ह्यातील कळंब पंचायत समिती निवडणूक आता रंगतदार अवस्थेत पोहोचली असून एकमेकांवर कुरघोडी करण्याच्या प्रयत्नात तुळजापूर भाजप आमदार राणा जगजीतसिंह यांच्यापाठोपाठ शिवसेना खासदार ओमराजे निंबाळकर यांच्यावरही गुन्हा दाखल करण्यात आला आहे . भाजप गटाचे तीन पंचायत समिती सदस्य शिवसेनेने अकलूज येथील बोरगावमध्ये आणल्याची माहिती मिळाली होती. माहितीच्या आधारावर भाजप आमदार राणा जगजीतसिंह यांच्यासह त्यांच्या सहकाऱ्यांवर खुनाच्या प्रयत्नासह काही गंभीर कलमानुसार गुन्हा दाखल करण्यात आला होता.

त्यावेळी आमदार जगजीतसिंह यांची गाडी आणि काही कार्यकर्त्यांना पोलिसांनी ताब्यात घेतलं होतं. अटक केलेल्या आरोपींपैकी जिल्हा बँकेचे संचालक सतिष दंडणाईक यांनी खासदार ओमराजे निंबाळकर यांच्यासह 11 जणांविरोधात अकलूज पोलिसात गुन्हा दाखल केला आहे. गुन्हा दाखल झाल्यानंतर ओमराजे निबांळकरांसह सर्व आरोपी फरार असून पोलीस त्यांचा शोध घेत आहेत.

राणा जगजितसिंह पाटील यांच्यासह 19 जणांविरोधात गुन्हा दाखल

कळंब पंचायत समितीमध्ये एकूण 16 सदस्य आहेत. यामध्ये राष्ट्रवादी काँग्रेस पक्षाचे 10, आणि सहा सदस्य शिवसेनेचे आहेत. यातील राणा जगजितसिंह पाटील यांच्या गटाचे कळंब इथले पंचायत समिती सदस्य शिवसेनेनी पळवले. पळवलेले सदस्य परत आणण्यासाठी गेलेल्या राणा जगजीतसिंह पाटील आणि अकलूज मधील शिवसेनेच्या कार्यकर्त्यांमध्ये बाचाबाची झाली. या बाचाबाचीचे पर्यवर्सन हाणामारीत झाले. यावेळी भाजप आमदार राणा जगजितसिंह पाटील यांनी अकलूजमध्ये कार्यकर्त्यांच्या डोक्याला रिव्हॉल्वर लावले. या प्रकरणी राणा जगजितसिंह पाटील यांच्यासह 19 जणांच्या विरोधात अकलूज पोलिस ठाण्यात गुन्हा दाखल झाला आहे. यापैकी राणा जगजितसिंह पाटील यांच्या चार समर्थकांची दोन दिवसांच्या पोलीस कोठडीत रवानगी करण्यात आली आहे.