शरद पवारांचा वारकरी संप्रदायाशी संबंध नाही, त्यांनी निर्धमी चळवळ चालवली, पवारांच्या वक्तव्यावर मुख्यमंत्र्यांची प्रतिक्रिया

वारकरी संप्रदायातील 60 टक्के महाराज हे प्रतिगामी विचारांचे असल्याचे वक्तव्य राष्ट्रवादी काँग्रेसचे ज्येष्ठ नेते आणि खासदार शरद पवार यांनी केलं आहे. यावर मुख्यमंत्री देवेंद्र फडणवीस यांनी प्रतिक्रिया दिली आहे.

Devendra Fadnavis on Sharad Pawar

Source : Getty Images

Devendra Fadnavis on Sharad Pawar :  वारकरी संप्रदायातील 60 टक्के महाराज हे प्रतिगामी विचारांचे असल्याचे वक्तव्य राष्ट्रवादी काँग्रेसचे ज्येष्ठ नेते आणि खासदार शरद पवार (Sharad Pawar) यांनी केलं आहे. यावरुन महाराष्ट्रात शरद पवार यांच्या विरोधात काही वारकरी संघटना आक्रमक झाल्या आहेत. अनेकांनी शरद पवार यांच्यावर टीका देखील केली आहे. अशातच राज्याचे मुख्यमंत्री देवेंद्र फडणवीस (Devendra Fadnavis )यांनी देखील शरद पवार यांच्या वक्तव्यावर प्रतिक्रिया दिली आहे. पवारसाहेबांनी विकासात योगदान दिलं असलं तरीही त्यांचा वारकरी संप्रदायाशी फार संबंध नाही. कारण त्यांनी निधर्मी चळवळ चालवल्याचे वक्तव्य मुख्यमंत्री फडणवीसांनी केलं. शरद पवार धर्म मानत नाहीत असेही ते म्हणाले होते.

शरद पवार धर्म मानत नाहीत

शरद पवार यांच्या सहकाऱ्यांनी निधर्मी चळवळ उभी केल्याचे वक्तव्य मुख्यमंत्री देवेंद्र फडणवीस यांनी केले. पवारसाहेबांनी विकासात योगदान दिलं असलं तरीही त्यांचा वारकरी संप्रदायाशी फार संबंध नाही. त्यांनी स्वतःही अनेक वेळा कबूल केले आहे की ते धर्म मानत नाहीत. त्यांचा सगळा पिंड निधर्मी राहिला आहे. त्यामुळे मला असे वाटते की वारकरी संप्रदायाच्या संदर्भात त्यांच्याजवळ कदाचित योग्य माहिती नसावी. किंबहुना मध्यंतरीच्या काळात हा प्रयत्न झाला की वारकरी संप्रदायांमध्ये काही लोक शिरून जो वारकरी विचार आहे त्याच्या बिलकुल विरोधात विचार मांडण्याचा प्रयत्न करत होते आणि अशा लोकांना वारकरी संप्रदायाने बाहेर काढल्याचे मत मुख्यमंत्री देवेंद्र फडणवीस यांनी व्यक्त केले. 

शरद पवारांनी केलेलं वक्तव्य एकदम बरोबर : अमोल मिटकरी

वारकरी संप्रदायातील 60 टक्के महाराज हे प्रतिगामी विचारांचे असल्याचे वक्तव्य ज्येष्ठ नेते शरद पवार यांनी केलं आहे. यावरुन महाराष्ट्रात शरद पवारांच्या विरोधात काही वारकरी संघटना आक्रमक झाल्या आहेत. मात्र, शरद पवारांच्या समर्थनार्थ आता अजित पवारांच्या राष्ट्रवादीचे माजी आमदार अमोल मिटकरी पुढे सरसावलेत. त्यांनी शरद पवारांनी केलेलं वक्तव्य एकदम बरोबर असल्यास म्हटलं आहे. पवार साहेबांनी मांडलेल्या 60 टक्के आकडेवारीपेक्षा ही संख्या अधिक असल्याचा आमदार मिटकरी म्हणालेत. 

दरम्यान, या वक्तव्यावरुन शरद पवारांवर टीका करणारे काही तथागतीत महाराजांनी जेव्हा अल्पवयीन मुलींवर अत्याचार केले तेव्हा का शांत होते असा सवाल केलाय. याबरोबरच शरद पवारांवर टीका करणाऱ्या भाजपच्या अध्यात्मिक आघाडीचे प्रमुख आचार्य तुषार भोसले यांच्यावरही त्यांनी टीका केली आहे.