Buldhana Crime News: बुलढाण्यात पीपल्स रिपब्लिकन पार्टीच्या जिल्हाध्यक्षांचं टोकाचं पाऊल, राजकीय वर्तुळात खळबळ
Buldhana Crime News: बुलढाण्यात पीपल्स रिपब्लिकन पार्टीचे जिल्हाध्यक्ष विजय गवई यांनी चिखली येथील राहत्या घरी स्वतःची जीवनयात्रा संपवल्याची धक्कादायक घटना उघडकीस आली आहे.
Buldhana Crime News: बुलढाणा जिल्ह्यातील राजकीय आणि सामाजिक वर्तुळातून एक धक्कादायक आणि दुर्दैवी घटना समोर आली आहे. सतत विविध आंदोलनांच्या माध्यमातून अन्यायाविरोधात आवाज उठवणारे पीपल्स रिपब्लिकन पार्टीचे (Peoples Republican Party) जिल्हाध्यक्ष विजय पंढरीनाथ गवई (वय 48) यांनी चिखली येथील राहत्या घरी गळफास लावून घेत स्वतःची जीवनयात्रा संपवली आहे. ही घटना आज पहाटेच्या सुमारास उघडकीस आली असून, यामुळे संपूर्ण बुलढाणा जिल्ह्यात प्रचंड खळबळ उडाली आहे.
Buldhana Crime News: राहत्या घरी उचलले टोकाचे पाऊल
याबाबत मिळालेल्या प्राथमिक माहितीनुसार, चिखली येथील आपल्या राहत्या घरात विजय गवई यांनी टोकाचे पाऊल उचलले. सकाळी ही घटना निदर्शनास आल्यानंतर कुटुंबीयांसह स्थानिक नागरिकांनी तातडीने पोलिसांना खबर दिली. घटनेची माहिती मिळताच चिखली पोलीस ठाण्याचे पथक घटनास्थळी दाखल झाले. पोलिसांनी पंचनामा करून मृतदेह ताब्यात घेतला असून तो शवविच्छेदनासाठी चिखली येथील ग्रामीण रुग्णालयात पाठवण्यात आला आहे.
Buldhana Crime News: टोकाचे पाऊल उचलण्याचे कारण अस्पष्ट
विजय गवई हे आक्रमक नेतृत्व आणि अन्यायाविरुद्ध सातत्याने लढा देणारे सामाजिक कार्यकर्ते म्हणून ओळखले जात होते. त्यांनी अचानक असे पाऊल का उचलले, यामागचे नेमके कारण अद्याप स्पष्ट होऊ शकलेले नाही. विजय गवई यांच्या अशा अकस्मात आणि दुर्दैवी जाण्याने पीपल्स रिपब्लिकन पार्टीसह संपूर्ण जिल्ह्यातील सामाजिक आणि राजकीय वर्तुळातून तीव्र शोक व्यक्त केला जात आहे. या घटनेमुळे चिखली शहरासह परिसरात शोककळा पसरली असून या प्रकरणी पोलीस पुढील तपास करीत आहेत.
Buldhana Crime News: 2 कोटींना गंडा घालणाऱ्या आंतरराज्यीय टोळीचा बुलढाणा पोलिसांकडून पर्दाफाश
दरम्यान, बुलढाणा सायबर पोलिसांनी एक मोठी आणि धडक कारवाई करत नांदुरा येथील एका ज्येष्ठ नागरिकाला तब्बल 2 कोटी रुपयांना गंडा घालणाऱ्या आंतरराज्यीय टोळीचा पर्दाफाश केला आहे. या प्रकरणात पोलिसांनी जोधपूर राजस्थान येथील शुभम नांगल, धनराज उर्फ रॉबीन विष्णोई आणि अहिल्यानगर येथील मुनाफ शेख या तीन आरोपींना मुंबईतील ठाणे परिसरात सिनेस्टाईल पाठलाग करत आरोपींना अटक केली आहे. आतापर्यंतच्या तपासात पोलिसांनी आरोपींकडून एकूण 52 लाख 77 हजार रुपयांचा मुद्देमाल गोठवला आहे. या तपासाचे मुख्य धागेदोरे राजस्थानमध्ये जुळल्याचे निष्पन्न होत असून, पीडित वृद्धाचे 2 कोटी रुपये परत मिळवून देण्यासाठी बुलढाणा सायबर पोलिसांचे पथक प्रयत्न करत आहेत.
राज्य आणि देश-विदेशातील महत्त्वाच्या बातम्या; पाहा व्हिडीओ
आणखी वाचा
महत्त्वाच्या बातम्या
