MSRTC : एसटीच्या ताफ्यात सामील होणार 1300 आधुनिक बस, नवीन वर्षात सरकारकडून गिफ्ट

MSRTC : एसटी महामंडळाने 1300 बस भाडेतत्त्वावर घेण्याचा निर्णय घेतला आहे. यामध्ये मुंबई-पुणे, नाशिक-संभाजीनगर, नागपूर-अमरावती यांसारख्या प्रमुख क्षेत्रांमध्ये प्रत्येकी 450 बस सुरू करण्यात येणार आहेत.

MSRTC News

Source : abp majha

मुंबई : राज्यातील नवीन फडणवीस सरकारने सत्तेवर येताच महाराष्ट्रासाठी 1 ट्रिलियन डॉलर्स अर्थव्यवस्थेचे लक्ष्य ठरवले आहे. मुख्यमंत्री देवेंद्र फडणवीस यांनी नुकत्याच झालेल्या वर्ल्ड हिंदू इकॉनॉमिक फोरमच्या मंचावरून महाराष्ट्रातील सागरी बंदरे, परिवहन, रस्ते आणि वाहतूक व्यवस्था मजबूत करण्यावर भर दिला. याच पार्श्वभूमीवर राज्यातील गावांना तालुका आणि शहरांशी जोडणाऱ्या एसटी महामंडळाच्या ताफ्यात नववर्षानिमित्त 1300 पेक्षा जास्त आधुनिक बस सामील करण्यात येणार असल्याची घोषणा त्यांनी केली.

आधुनिक बसांची गरज का?

राज्यातील एसटी महामंडळाच्या बसला ‘लालपरी’ या नावाने ओळखले जाते, जी गावागावांत लोकांना जोडण्याचे काम करते. मात्र, मागील काही वर्षांत बस कमी झाल्यामुळे दररोज प्रवास करणाऱ्या प्रवाशांच्या संख्येत 11 लाखांपर्यंत घट झाली आहे. कोविडपूर्व काळात एसटीच्या ताफ्यात जवळपास 18,500 बस होत्या. त्यापैकी 15,500 बस सेवा देत होत्या आणि दररोज 65 लाख प्रवासी एसटी बसचा वापर करत होते. 

कोविडनंतर ताफ्यातील 1,000 बस बंद पडल्या आणि सध्या 14,500 बसच सेवा देत आहेत. त्यामुळे प्रवाशांची संख्या 65 लाखांवरून 54 लाखांपर्यंत घटली आहे. बसांची कमतरता असल्याने आणि प्रवाशांची मागणी जास्त असल्याने, एसटी महामंडळाला अनेक वर्षे तोटा सहन करावा लागला. सध्या एसटी महामंडळाचा एकूण तोटा 11,000 कोटी रुपयांपर्यंत पोहोचला आहे. 

नव्या बस कुठे चालवण्यात येतील?

एसटी महामंडळाने दोन वर्षांपूर्वी उचललेल्या पावलांनंतर 1300 बस भाडेतत्त्वावर घेण्याचा निर्णय घेतला आहे. यामध्ये मुंबई-पुणे, नाशिक-संभाजीनगर, नागपूर-अमरावती यांसारख्या प्रमुख क्षेत्रांमध्ये प्रत्येकी सुमारे 450 बस सुरू करण्यात येणार आहेत. या नव्या बस नववर्षापासून सेवेत येतील, अशी शक्यता आहे. महामंडळाला अपेक्षा आहे की, राज्यातील लालपरी गेल्या काही वर्षांत झालेला तोटा भरून काढून नफा कमावेल. याशिवाय राज्यातील प्रवाशांना या सेवांचा लाभ मिळेल आणि महागाईचा परिणाम त्यांच्या खिशावर कमी होईल.

ही बातमी वाचा: