Rajiv Satav : काँग्रेस खासदार राजीव सातव यांचं निधन

Rajiv Satav : काँग्रेस खासदार राजीव सातव यांचं न्युमोनियाच्या संसर्गामुळे निधन झालं आहे. पुण्यातील रुग्णालयात उपचारा दरम्यान त्यांनी अखेरचा श्वास घेतला. काँग्रेसचे अभ्यासू नेते म्हणून राजीव सातव यांना ओळखलं जायचं.

Rajiv_Satav_1

पुणे : काँग्रेस खासदार राजीव सातव यांचं न्युमोनियाच्या संसर्गामुळे निधन झालं आहे. काँग्रेसचे प्रवक्ते रणदीप सुरजेवाला यांनी यासंदर्भात माहिती दिली आहे. पुण्यातील जहांगीर रुग्णालयात उपचारादरम्यान राजीव सातव यांचं निधन झालं आहे. काही दिवसांच्या उपचारानंतर सातव यांचा कोरोना अहवाल निगेटिव्ह आला, त्यानंतर मात्र त्यांना न्युमोनियाचा पुन्हा संसर्ग झाला होता. 

महाराष्ट्राच्या राजकारणातील एक उमदा नेता अशी राजीव सातव यांची ओळख होती. गेल्या 23 दिवसांपासून राजीव सातव यांची कोरोनाशी झुंज सुरु होती. राज्यभरातून सातव यांच्या प्रकृतीसाठी प्रार्थना केली जात होती. आज सकाळी काँग्रेसचे राष्ट्रीय प्रवक्ते रणदीप सुरजेवाला यांनी राजीव सातव यांच्या निधनाची दुःखद बातमी अधिकृतपणे ट्वीट करुन दिली.

काँग्रेसचे अभ्यासू नेते म्हणून राजीव सातव यांना ओळखलं जायचं. राजीव सातव यांचा जर प्रवास पाहिला तर सामान्य कार्यकर्त्यापासून पंचायत समिती, जिल्हा परिषद, आमदारकी त्यानंतर पक्षानं दिलेलं महाराष्ट्र युवक काँग्रेसचं अध्यक्षपद, दोन वेळा खासदारकी आणि काँग्रेस पक्षाची सर्वोच्च वर्किंग कमिटीचे ते सदस्य होते. काँग्रेस नेते राहुल गांधी यांच्या निकटवर्तींयांपैकी ते एक होते. महाराष्ट्र काँग्रेसच्या प्रदेशाध्यक्ष पदाच्या शर्यतीतही काही दिवसांपूर्वी त्यांचं नाव आघाडीवर होतं. काँग्रेसच्या जडणघडणीमध्ये तसेच गेल्या काही वर्षांच्या काँग्रेसच्या प्रवासात राजीव सातव यांनी पक्षाशी एकनिष्ठ राहून अनेक महत्त्वाच्या जबाबदाऱ्या पार पाडल्या होत्या.

राजीव सातव हे सध्या कॉंग्रेसचे राज्यसभेचे खासदार होते. त्यांच्याकडे सध्या अखिल भारतीय काँग्रेस कमिटीचं गुजरात प्रभारी पद होतं. तसेच काँग्रेसच्या कार्यकारी समितीचे ते निमंत्रक होते. राजीव सातव यांच्या मातोश्री रजनी सातव काँग्रेसच्या आमदार आणि राज्यसभेच्या खासदार होत्या. राजीव सातव यांनी 2014 च्या लोकसभा निवडणुकीदरम्यान मोदी लाटेतही विजय मिळवला होता. 

राहुल गांधी यांचे विश्वासू सहकारी म्हणून त्यांची ओळख होती. पुढे 2017 च्या गुजरात विधानसभा निवडणुकीदरम्यान सातव यांच्यावर गुजरात प्रभारीपदाची जबाबदारी देण्यात आली. त्या निवडणुकीत काँग्रेसने चांगलं यश मिळवलं होतं.

महत्त्वाच्या इतर बातम्या :