Breaking News LIVE : मुंबईत उद्या, रविवारी कुठल्याही लसीकरण केंद्रांमध्ये लसीकरण केले जाणार नाही : BMC

Breaking News LIVE Updates, 22 May 2021: दिवसभरातील ताज्या घडामोडी, महत्त्वाचे अपडेट्स या लाईव्ह ब्लॉगमध्ये आपल्याला मिळतील. देशभरासह राज्यातील कोरोना संबंधित, राजकीय, सामाजिक, आर्थिक, क्रीडा तसेच इतर महत्वाचे अपडेट लाईव्ह ब्लॉगमध्ये...

Background

राज्यात शुक्रवारी 44,493 रुग्णांना डिस्चार्ज तर 29,644 नवीन कोरोना रुग्णांचं निदान
राज्यात गेल्या काही दिवसांपासून कोरोना उतरणीला लागला आहे. दैनंदिन येणाऱ्या आकडेवारीत रोजच्या रुग्णवाढीपेक्षा बरे होऊन घरी जाणाऱ्या रुग्णांची संख्या जास्त होत आहे. यामुळे मोठा दिलासा मिळत आहे. शुक्रवारी (21 मे) 44493 रुग्ण बरे होऊन घरी गेले आहेत तर 29644 नवीन रुग्णांचे निदान झाले आहे. आतापर्यंत एकूण 5070801 कोरोनाबाधित रुग्ण बरे झाले आहेत. यामुळे राज्यातील रुग्ण बरे होण्याचे प्रमाण (Recovery Rate) 91.74% एवढे झाले आहे. राज्यात काल 555 कोरोनाबाधित रुग्णांच्या मृत्यूंची नोंद झाली.  सध्या राज्यातील मृत्यूदर 1.57% एवढा आहे. आजपर्यंत तपासण्यात आलेल्या 32441776 प्रयोगशाळा नमुन्यांपैकी 5527092 (17.4 टक्के) नमुने पॉझिटिव्ह आले आहेत. सध्या राज्यात 2794457 व्यक्ती होम क्वारंटाईनमध्ये आहेत तर 20946 व्यक्ती संस्थात्मक क्वारंटाईनमध्ये आहेत. राज्यात आज एकूण 367121 ॲक्टिव्ह रुग्ण आहेत.

ऑक्सिजनअभावी रुग्णाचा मृत्यू झाल्यास शासन जबाबदार : औरंगाबाद खंडपीठ
ऑक्सिजनचा पुरेसा पुरवठा झाला नाही अथवा ऑक्सिजन नसल्यामुळे रुग्णाचा मृत्यू झाल्यास शासनास जबाबदार धरण्यात येईल, अशी दुरुस्ती ऑर्डर मुंबई उच्च न्यायालयाच्या औरंगाबाद खंडपीठाचे न्यायमूर्ती रवींद्र घुगे आणि न्यायमूर्ती बी. यू. देबडवार यांनी केली आहे. खंडपीठाने 19 मेच्या आदेशात ऑक्सिजन न मिळाल्यामुळे रुग्णाचा मृत्यू झाल्यास अन्न व औषध विभागाचे सचिव सौरभ विजय आणि चार नोडल अधिकारी यांना वैयक्तिकरित्या जबाबदार धरण्यात येईल. ऑक्सिजनचा आवश्यक पुरवठा केला नाही तर हे अधिकारी वैयक्तिक कारवाईस पात्र ठरतील, असे म्हटले होते.

चक्रीवादळ, नुकसान आणि मुख्यमंत्र्यांचा कोकण दौरा... मदतीपासून कुणीही वंचित राहणार नसल्याची मुख्यमंत्र्यांची ग्वाही
तोक्ते चक्रीवादळानंतर झालेल्या नुकसानीचा आढावा घेण्यासाठी मुख्यमंत्री उद्धव ठाकरे यांनी शुक्रवारी (22 मे) कोकण दौरा करत नुकसानीची पाहणी केली.  सिंधुदुर्ग आणि रत्नागिरीला तोक्ते चक्रीवादळाचा सर्वाधिक तडाखा बसला आहे. तौक्ते चक्रीवादळाने नेमके किती नुकसान झाले याबाबतचे पंचनामे पूर्ण होऊ द्या, संपूर्ण आढावा घेऊन व्यवस्थित मदत केली जाईल, कुणीही वंचित राहणार नाही  असं मुख्यमंत्री ठाकरे यांनी आज म्हटलं आहे. 

गडचिरोलीत 13 नक्षल्यांना कंठस्नान, गृहमंत्री वळसे पाटलांचा गडचिरोली दौरा, पोलिसांचं केलं कौतुक
गडचिरोली जिल्ह्यातील एटापल्ली तालुक्यात झालेल्या पोलीस-नक्षल चकमकीत सहा पुरुष आणि सात महिलांसह 13 नक्षल्यांना कंठस्नान घालण्यात आलं. राज्याचे गृहमंत्री दिलीप वळसे-पाटील गडचिरोली जिल्ह्याच्या दौऱ्यावर होते. त्यांनी या संपूर्ण अभियानाचे कौतुक करत गडचिरोली पोलीस दलाला प्रोत्साहन दिले आहे. शुक्रवारी (21 मे) सकाळी पैडी भागात झालेल्या एका मोठ्या चकमकीत 60 ते 70 नक्षलवाद्यांनी पोलीस जवानांवर गोळीबार सुरु केला. पोलीस दलाने त्याचा जोरदार प्रतिकार केला. यात पोलीस दलाचा दबाव बघता नक्षलवादी घटनास्थळावरुन पसार झाले. घटनास्थळाची चकमकीनंतर पाहणी केल्यावर 13 मृतदेह ताब्यात घेण्यात आले. यात सहा पुरुष आणि सात महिलांचा समावेश आहे. या सर्वांची ओळख पटवणे सुरू आहे. घटनास्थळावरुन एके-47- एस एल आर रायफल -303  रायफल, कार्बाइन ,12 बोअर रायफल -मोठ्या प्रमाणात स्फोटके जप्त करण्यात आली आहेत. 

22:52 PM (IST)  •  22 May 2021

कोल्हापूर जिल्ह्यातील कडक लॉकडाऊन शिथिल होणार

कोल्हापूर जिल्ह्यातील कडक लॉकडाऊन शिथिल होणार,  कोल्हापूर जिल्ह्यात गेल्या रविवारपासून सुरू होता कडक लॉकडाऊन,   राज्य सरकारच्या लॉकडाऊनचे नियम मात्र कायम राहणार   

22:49 PM (IST)  •  22 May 2021

अपवादात्मक परिस्थिती वगळता सोलापुरातील ग्रामीण भागात होम आयसोलेशनला बंदी

सोलापूर- अपवादात्मक परिस्थिती वगळता सोलापुरातील ग्रामीण भागात होम आयसोलेशनला बंदी,

होम आयसोलेशनमध्ये असलेल्या लोकांची यादी करून त्यांना इन्स्टिट्यूशनल आयसोलेशन सेंटरमध्ये स्थलांतर करणार,

त्यासाठी प्रत्येक गावातच व्यवस्था तयार करण्याच्या जिल्हाधिकारी मिलिंद शंभरकर यांच्या सूचना,

आलसोलेशसाठी गावातील शाळा, मंदिर, मंगलकार्यालय अशा राहण्यायोग्य ठिकाणचा वापर करण्याच्या सूचना

22:47 PM (IST)  •  22 May 2021

सातारा जिल्ह्यात आणखी कडक लॉकडाऊनची अंमलबजावणी

सातारा जिल्ह्यात आणखी कडक लॉकडाऊनची अंमलबजावणी,

वाढत्या आकडेवारीमुळे सातारा जिल्हाधिकारी यांचा निर्णय,

किराणा, भाजी दुकानांसह जिल्ह्यातील सर्वच दुकाने बंद,

25 मे पासून ते 1 जून पर्यंत कडक निर्बंध लागू,

लग्न आणि अंत्यविधीला जाणासाठी आता कोरोना निगेटिव्ह रिपोर्ट असणे बंधनकारक,

तसेच लसीकरण झाल्याचे प्रमाणपत्रही बंधनकारक,

22:44 PM (IST)  •  22 May 2021

मुंबईत उद्या, रविवारी कुठल्याही लसीकरण केंद्रांमध्ये लसीकरण केले जाणार नाही : BMC

मुंबईकरांनो, उद्या (23मे, 2021 ) कुठल्याही लसीकरण केंद्रांमध्ये लसीकरण केले जाणार नाही. 24 मे, सोमवार च्या लसीकरणाची माहिती उद्या देण्यात येईल, असं बीएमसीकडून कळवण्यात आलं आहे.

22:42 PM (IST)  •  22 May 2021

ठाणे शहरातील सर्व केंद्रावरील लसीकरण उद्या रविवारी बंद

ठाणे शहरातील सर्व केंद्रावरील लसीकरण उद्या रविवार दिनांक 23 मे 2021 रोजी बंद राहणार असून नागरिकांनी याची नोंद घ्यावी, असं ठाणे मनपाकडून कळवण्यात आलं आहे.