Bharat Gogawale : गोगावलेंचाच व्हीप वैध, हा सत्याचा विजय, भरत गोगावलेंची पहिली प्रतिक्रिया
Bharat Gogawale : विधानसभा अध्यक्ष राहुल नार्वेकर यांनी भरत गोगावले यांचा व्हीप वैध असल्याचा निर्णय दिलाय. यावर भरत गोगावले यांनी एबीपी माझाला प्रतिक्रिया दिली.
मुंबई : भरत गोगावले (Bharat Gogawale) यांचा व्हीप विधानसभा अध्यक्ष राहुल नार्वेकर (Rahul Narvekar) यांनी वैध ठरवला आहे. यावर शिंदे गटाते प्रतोद भरत गोगावले यांनी एबीपी माझाला प्रतिक्रिया दिली. हा सत्याचा विजय असल्याची प्रचिती आपल्या सगळ्यांना आली असल्याचं भरत गोगावले यांनी यावेळी म्हटलं. लोकं आमच्यावर जी काही टीका करत होते, त्याचा निकाल आज लागल्याचं भरत गोगावले यांनी म्हटलं.
त्यांनी आमच्यावर काहीही आरोप करु देत, आम्ही त्यांना आमच्या कामांनी उत्तर देऊ, असं म्हणत भरत गोगावले यांनी प्रतिक्रिया दिली. आतापर्यंत मी काही प्रतिक्रिया दिली नव्हती. आम्ही जे काही केलं त्याचा आज विजय झालाय. ते जे काही करतील त्यामुळे त्यांच्याच अडचणी वाढतील, अशी प्रतिक्रिया गोगावले यांनी दिली.
नेमका निकाल काय?
महाराष्ट्रासह संपूर्ण देशाचं लक्ष लागून राहिलेल्या शिंदे गट आणि ठाकरे गटाबाबतचं निकालवाचन आज पार पडलं. आणि एकनाथ शिंदे यांचीच खरी शिवसेना असल्याचा निकाल विधानसभा अध्यक्ष राहुल नार्वेकर यांनी दिला. त्याचसोबत, शिंदे गटाच्या भरत गोगावले यांचा व्हिप अधिकृत ठरवत ठाकरे गटाच्या सुनील प्रभू यांचा व्हिप विधानसभा अध्यक्षांनी अवैध ठरवलाय. त्यामुळे या निकालात उद्धव ठाकरे गटाला मोठा धक्का बसला असून, एकनाथ शिंदे यांना मोठा दिलासा मिळालाय. उद्धव ठाकरेंच्या मनात आलं म्हणून ते एकनाथ शिंदेंची हकालपट्टी करू शकत नसल्याची टिप्पणी राहुल नार्वेकर यांनी केलीय. खरी शिवसेना शिंदेंचीच असल्यामुळे शिंदे गटाचे आमदार पात्र ठरवत, ठाकरे गटाची आमदार अपात्र करण्याबाबतची याचिका फेटाळण्यात आलीय. सोबतच ठाकरे गटाचेही सर्व आमदार पात्र करण्यात आलंय. महत्त्वाची गोष्ट म्हणजे, आमदार अपात्र करण्याबाबतच्या दोन्ही गटाच्या याचिका फेटाळत, दोन्ही गटांतील कोणतेही आमदार अपात्र केले नाहीत.
दरम्यान, या निकालानंतर आदित्य ठाकरे, जितेंद्र आव्हाड यांनी यापेक्षा वेगळा निकाल अपेक्षित नव्हता, तसेच न्यायाची अपेक्षा करणं चूक असल्याचं म्हटलंय. त्याचप्रमाणे यापुढची लढाई कायदेशीर मार्गाने लढणार असल्याची माहिती आदित्य ठाकरेंनी दिलीय. आणि निकालाबाबत बोलताना आदित्य ठाकरेंचे डोळे पाणावले. तसेच, निकालानंतर संजय राऊतांनी संताप व्यक्त करत एकनाथ शिंदे यांची औकात काय? असा सवाल केलाय. दरम्यान, निकालानंतर उद्धव ठाकरे गटाने काळे झेंडे दाखवत निषेध व्यक्त केलाय. तर शिंदे गटाने मोठा जल्लोष केला. एकूणच, या निकालामुळे शिंदे सरकारला कोणताही धोका नसल्याचं स्पष्ट झालंय.
हेही वाचा :
महत्त्वाच्या बातम्या
