अमरावतीत विनाकरण फिरणाऱ्या नागरिकांच्या भरचौकात चाचण्या
कोरोनाचा संसर्ग थांबविण्यासाठी आणि एखाद्या बाधिताकडून इतर कुणालाही कोरोनाची लागण होऊ नये, यासाठी संचारबंदीत विनाकारण फिरणाऱ्यांची रस्त्यावरच रॅपिड अँन्टीजन चाचणी करण्याचा उपक्रम प्रशासनाने हाती घेतला आहे.
अमरावती : कोरोनाचा संसर्ग रोखण्यासाठी विनाकारण घराबाहेर फिरणाऱ्या बेजबाबदार कोविडप्रसारकांचा शोध घेण्यासाठी चाचण्यांची धडक मोहिमच अमरावती जिल्हा प्रशासनाने आज जिल्ह्यात राबवली. अमरावती शहरातील राजकमल चौकात या धडक मोहिमेत जिल्हाधिकारी शैलेश नवाल यांनी सहभागी होत कारवाईला चालना दिली.महापालिका आयुक्त प्रशांत रोडे यांच्यासह विविध अधिकारी मोहिमेत सहभागी होते. शहरात विनाकारण फिरणाऱ्या नागरिकांची चक्क रस्त्यावरच चाचणी करण्यात आली.
कोरोनाचा संसर्ग थांबता थांबत नाही. हा संसर्ग थांबविण्यासाठी आणि एखाद्या बाधिताकडून इतर कुणालाही कोरोनाची लागण होऊ नये, यासाठी संचारबंदीत विनाकारण फिरणाऱ्यांची रस्त्यावरच रॅपिड अँन्टीजन चाचणी करण्याचा उपक्रम प्रशासनाने हाती घेतला आहे. अमरावती शहरात उपक्रमाची गुरुवारपासून अंमलबजावणी करण्यात आली. उपायुक्त रवि पवार यांनी रस्त्यावर उतरून पोलीस निरीक्षक यांच्या मदतीने विनाकारण फिरणा-यांची अँन्टीजन चाचणी केली.
राजकमल चौक आणि राजापेठ चौकात विनाकारण फिरणाऱ्यांची अँन्टीजन चाचणी करण्यात आली. 208 नागरिकांची अँन्टीजन चाचणी करण्यात आली. इतवारा बाजार येथे रॅपिड अँन्टीजन टेस्ट शिबिर घेण्यात आले होते. त्याठिकाणी 1 व्यक्ती पॉझिटिव्ह आढळली.
जिल्ह्यात ठिकठिकाणी ही मोहिम राबविण्याचे निर्देश जिल्हाधिकाऱ्यांनी दिले. चांदुर रेल्वेच्या जुन्या एस.टी. स्थानकावरही 40 जणांना तपासण्यात आले.
पॉझिटिव्ह आढळल्यास भरती
निष्कारण फिरणाऱ्यावर कारवाई करतानाच पॉझिटिव्ह आढळून येणाऱ्या व्यक्तींना तत्काळ कोविड केअर केंद्रात उपचारार्थ दाखल केले जाणार आहे.
राजकमल चौकातील तीन दुकाने सील
लॉकडाऊनमध्ये जीवनावश्यक वस्तू वगळता इतर सर्व दुकाने बंद ठेवण्याचे निर्देश असतांना राजकमल चौक येथे खुले असलेल्या दुग्धपुर्णा शितालय दुकान, विमल डिजिटल लॅब, श्री बालाजी दुकानावर मनपाच्या पथकाने कारवाई करुन दंड ठोठावला. संचारबंदी काळात अत्यावश्यक वस्तू न पुरविणारे दुकाने सुरु असतांना आढळली म्हणून दुग्धपुर्णा शितालय दुकान, विमल डिजिटल लॅब, श्री बालाजी दुकानाला यावेळी सील करण्यात आले.
महत्त्वाच्या बातम्या
