19 वर्षे मंत्री असताना काय केलं? जॅकेट घातले स्टाईल मारली? पुतण्याचा लग्नाला न जाता अजित पवारांची इंदापूरमध्ये फटकेबाजी
भरत शहा (Bharat Shah) हे इंदापूरचा (Indapur) विकास करु शकतात. त्यासाठी तुम्हाला निर्णय घ्यायचा आहे असे मत उपमुख्यमंत्री अजित पवार (Ajit Pawar) यांनी व्यक्त केले.
Ajit Pawar on Harshvardhan Patil : भरत शहा (Bharat Shah) हे इंदापूरचा (Indapur) विकास करु शकतात. त्यासाठी तुम्हाला निर्णय घ्यायचा आहे असे मत उपमुख्यमंत्री अजित पवार (Ajit Pawar) यांनी व्यक्त केले. शिरसोडीच्या पुलाचा निर्णय त्याच्याच घरात बसून सहज मंजूर झाला होता, 400 कोटी मंजूर केले होते. त्यांना का करता आले नाही 19 वर्षे मंत्री होते असे म्हणत अजित पवारांनी माजी मंत्री हर्षवर्धन पाटील यांना टोला लगावला. मंत्री असताना केलं काय? जॅकेट घातले स्टाईल मारली? कुठेही फोटो काढायचा म्हटले तरी ते लगेच मध्ये येतात असं म्हणत अजित पवार यांनी हर्षवर्धन पाटील यांच्यावर टीका केली. दरम्यान, आज अजित पवार यांचे पुतणे युगेंद्र पवार यांचा विवाह संपन्न होत आहे. हा विवाह सोडून अजित पवार प्रचारसभा करत आहेत.
काही निवडणुका 20 तारखेपर्यंत स्थगित करण्यात आल्या आहेत. त्यावर आज निर्णय होणार आहे. इंदापूर शहराची सूत्रे उद्याच्या पाच वर्षासाठी कोणाच्या हातात द्यायची याचा निर्णय आपल्याला घ्यायचा आहे. तुम्ही अनेकांचे काम पाहिले आहे. इंदापूरचे ग्रामदैवत इंद्रेश्वराच्या चरणी मी नतमस्तक होतो. इंदापूर हे सांस्कृतिक वैभव असलेल्या वीरश्री मालोजीराजे भोसले यांच्या गढीचा आराखडा आम्ही तयार केला आहे. जी जबाबदारी उचलायची असते ती आम्ही उचलली आहे. गढीचे संवर्धन करुन तिथले काम आता सुरु आहे. चांद शहावली बाबांच्या दर्गाहचे काम ही करत आहोत. इंदापूरचे महत्व आहे ते जपण्याचे काम आपण करतो असे अजित पवार म्हणाले.
आमच्या कुणाच्या बा ला जमले नाही ते भरत शहाने करुन दाखवले
1995 पासून तुम्ही मला खासदार केले तेव्हापासून मी काम करतो आहे सातत्याने करत आहे. नवीन बांधकाम करताना ते शेकडो वर्षाच्या वास्तुशी मिळते जुळते असले पाहिले. डॉक्टर मंडळींनो तुम्ही भाषण करत बसल्यावर आम्ही काय इंजेक्शन टोचत बसायचे का? तुम्ही का आमच्या पोटावर पाय देऊ नका असेही अजित पवार म्हणाले. 288 नगरपरिषदेत इंदापूरची खूप चर्चा आहे, आरोप होताहेत. नको ते लोक एकत्र आलेत, आरोप करत आहेत. फक्त भरत शहा नको बाकीचे सगळे चालतात. काय काय कोणाबद्दल बोलले आहे जरा आठवा, आमच्या कुणाच्या बा ला जमले नाही ते भरत शहाने करुन दाखवल्याचे अजित पवार म्हणाले. शहा परिवाराचे इंदापूर शहरात खूप मोठे योगदान आहे. मी जेव्हा खासदारकीला उभा होतो तेव्हा स्वर्गीय शंकररावजी पाटील आणि स्वर्गीय गोकुळदास शहा हे मला आशीर्वाद देत होते. प्रचंड मोठे योगदान शहा परिवाराने तालुक्यात दिले आहे. इंदापूर आणि शहा कुटुंबाची नाळ घट्ट जोडली आहे. असं असताना शहांना सोबत घेण्यास विरोध का? शहांना तिकीट देऊ नका अस म्हणायचं काम काय ? असा सवाल अजित पवार यांनी केला. शहा यांच्या अनेक पिढ्या इंदापूर शहराने पारदर्शक काम करताना पाहिल्या आहेत. त्यांच्यावर कुठला भ्रष्टाचाराचा शिंतोडा देखील नाही असं असताना मग भरत शहा का नको ? असा प्रश मला पडतो.
तुम्ही 19 वर्षात मंत्री होता, एकतरी काम सांगा, अजित पवारांचा हर्षवर्धन पाटलांना टोला
पत्रकार बांधव शोधत आहेत कुठे काय शब्दात सापडतोय का? पण अनुभवातून माणूस शहाणा होतो, याच इंदापूर मधून एक शब्द बोललो होतो, लगेच मीडियाने ते काढलं त्यात पण इंदापूरचे नेते होते. अगदी ते दिल्लीपर्यंत पाठवलं याला काय विकास म्हणतात का? असा टोला देखील अजित पवारांनी हर्षवर्धन पाटील यांना लगावला. दूधगंगा, अर्बन बँक कशी चालते? कर्मयोगी कारखाना चालवायला दिला काय तुमचं कर्तृत्व? तुम्ही 19 वर्षात मंत्री होता एकतरी काम आम्हाला सांगा ना की तुम्ही काय केले? असा सवाल अजित पवारांनी हर्षवर्धन पाटील यांना केला. तिघे तिघे हातात हात घालून चाललेत काय भाषण करत आहेत. एकट्या या माणसाची मान खाली घालण्यासाठी हे एकत्र आले आहेत. भरणे मामा साडेतीन वर्षे मंत्री आहे आणि ते 19 वर्षे मंत्री आहेत. मग तुमची नगरपरिषदेची, कोर्टाची प्रशासकीय भवन याची इमारत झाली का ? कोणी केली याचा काहीतरी विचार करा असे अजित पवार म्हणाले. लाथ मारेल तिथून पाणी काढेल अशी ताकद लागते, नुसत नट्टापट्टा करून चालत नाही, लाडक्या बहिणींनो तुम्हाला नाही, तुम्ही छान दिसता असेही अजित पवार म्हणाले.
कोणीतरी शिरसोडीच्या पुलावर देखील बोलला, की याचा काय फायदा तुम्हा कळत असेल तर समजेल ना उगाच एखादा जाऊन त्यावरुन आत्महत्या करणार असेल तर मी काय करणार? माझ्या मनात पण येत नाही असे अजित पवार म्हणाले. अगोदर म्हणाले भरत शहा भरणे मामांना पाहिजे पुन्हा म्हणाले आप्पासाहेब जगदाळे यांना पाहिजे आता त्यात त्यांचा काय संबंध. पुन्हा म्हणाले अडीच अडीच वर्षे करा. हा रडीचा डाव आहे. हाफ हाफ केले की भरत शहा चालतो पण फुल फुल केलं की चालत नाही असे म्हणत अजित पवारांनी प्रदीप गारटकर यांच्यावर टीका केली.
महत्त्वाच्या बातम्या
