Kolhapur Rain Update : कोल्हापूर जिल्हा पूरव्यवस्थापन नियोजनाचा पालक सचिव प्रवीण दराडेंकडून आढावा
पूरपरिस्थिती काळात व पूर परिस्थिती पश्चात कामाचे अत्यंत सूक्ष्म नियोजन करुन सर्व विभागांनी मिळून समन्वयाने परिस्थिती हाताळावी, अशा सूचना कोल्हापूर जिल्ह्याचे पालक सचिव प्रवीण दराडे यांनी केल्या.
Kolhapur Rain Update : संभाव्य पूर परिस्थिती लक्षात घेवून जिल्हा प्रशासनाने चांगले नियोजन केले आहे. आपत्कालीन परिस्थितीची शक्यता गृहीत धरुन पूरपरिस्थिती पूर्व, पूरपरिस्थिती काळात व पूर परिस्थिती पश्चात आवश्यक असणाऱ्या कामाचे अत्यंत सूक्ष्म नियोजन करुन सर्व विभागांनी मिळून समन्वयाने परिस्थिती हाताळावी, अशा सूचना कोल्हापूर जिल्ह्याचे पालक सचिव प्रवीण दराडे यांनी केल्या.
यावेळी जिल्हाधिकारी राहुल रेखावार यांनी जिल्हा प्रशासनाच्यावतीने पूर व्यवस्थापनाच्या नियोजनाबाबत सादरीकरणाद्वारे माहिती दिली. तसेच महानगरपालिका प्रशासक डॉ. कादंबरी बलकवडे, जिल्हा परिषदेचे मुख्य कार्यकारी अधिकारी संजयसिंह चव्हाण, जिल्हा पोलीस अधीक्षक शैलेश बलकवडे, पाटबंधारे विभागाचे अधीक्षक अभियंता महेश सुर्वे यांच्यासह विविध विभाग प्रमुखांनी केलेल्या नियोजनाबाबत माहिती दिली.
कोल्हापूर जिल्ह्यात सध्या मुसळधार पाऊस सुरु असून पंचगंगा नदीची पाणीपातळी इशारा पातळीकडे सरकत आहे. हवामान खात्यानेही 8 जुलै पर्यंत अतिवृष्टीचा इशारा दिला आहे. या पार्श्वभूमीवर मंगळवारी मुख्यमंत्री एकनाथ शिंदे यांनी जिल्हाधिकारी राहुल रेखावार यांच्याशी संवाद साधला होता. यानंतर आज पालक सचिव प्रवीण दराडे यांच्या अध्यक्षतेखाली कोल्हापूर जिल्ह्याच्या पूर परिस्थिती नियोजनाची आढावा बैठक जिल्हाधिकारी कार्यालयातील शाहूजी सभागृहात पार पडली, यावेळी त्यांनी या सूचना केल्या.
पालक सचिव प्रवीण दराडे म्हणाले की, अलमट्टी धरणातून सोडण्यात येणाऱ्या विसर्गाबाबत कर्नाटक राज्याच्या पाटबंधारे विभागाशी तसेच कोयना धरणातून सोडण्यात येणाऱ्या विसर्गाबाबतही पाटबंधारे विभागाने समन्वय ठेवावा. आपत्कालीन परिस्थितीत कोणतीही त्रुटी राहता कामा नये, यासाठी सर्व यंत्रणांनी सतर्क राहून काम करावे. कोणतीही घटना घडल्यास तात्काळ त्याठिकाणी पोहचण्यासाठी विभाग प्रमुखांनी मुख्यालय सोडू नये, अशा सूचना करुन आपत्कालीन परिस्थितीत जिल्हाधिकाऱ्यांनी 'टीम लीडर' म्हणून तर अन्य सर्व विभागांनी त्यांच्या मार्गदर्शनाने 'टीम वर्क' म्हणून काम करावे, असेही त्यांनी सांगितले.
दराडे म्हणाले, पूरबाधित नागरिकांचे व जनावरांचे वेळेत स्थलांतर करा. स्थलांतरीत नागरिकांच्या कँम्पमध्ये आवश्यक त्या सर्व सेवा सुविधा उपलब्ध करुन द्या. नेमुन दिलेल्या अधिकाऱ्यांनी त्या-त्या ठिकाणांची पाहणी केल्याचा अहवाल मागवून घ्या. पुराचे पाणी येणाऱ्या मार्गांवर व पुलांवर पोलीस कर्मचारी तैनात ठेवा.
पूरपरिस्थितीत अशुध्द पाण्यामुळे रोगराई पसरु नये, यासाठी पूर बाधित भागात व स्थलांतरीत कँम्पमध्ये नागरिकांना शुध्द पाण्याचा पुरवठा करा. याकाळात नागरिकांनी शुध्द अथवा उकळून पाणी पिण्याबाबत जनजागृती करा. अस्वच्छतेमुळे रोगराई पसरु नये, यासाठी जंतुनाशक फवारणी व अन्य आवश्यक ती खबरदारी घ्या. महामार्गांवर पडलेल्या खड्ड्यांमुळे आपघात घडू नये, यासाठी तातडीने रस्यांुरची दुरुस्ती करुन घ्यावी. पूरपरिस्थितीत नागरिकांची गैरसोय होवू नये, यासाठी आवश्यक ती खबरदारी सर्व यंत्रणांनी घ्यावी, असेही त्यांनी सांगितले.
इतर महत्त्वाच्या बातम्या
महत्त्वाच्या बातम्या
ट्रेंडिंग न्यूज
