Kolhapur News : प्रशांत कोरटकर धमकी प्रकरण; सीएम फडणवीसांसमोर कोल्हापुरात शिवप्रेमी आणि इंडिया आघाडी ठाम आंदोलन करण्यावर ठाम
Prashant Koratkar : जुना राजवाडा पोलीस ठाण्यामध्ये आंदोलकांसोबत पोलिसांनी बैठक केली. मात्र, प्रशांत कोरटकरबरोबर केशव वैद्यवर देखील कारवाई करा अशी आंदोलकांची मागणी आहे.
कोल्हापूर : प्रशांत कोरटकरने दिलेल्या धमकी प्रकरणी कोल्हापुरात देवेंद्र फडणवीस यांच्यासमोर आंदोलन करण्यावर शिवप्रेमी आणि इंडिया आघाडी ठाम आहे. उद्या ( 6 मार्च) देवेंद्र फडणवीस कोल्हापूर जिल्ह्याच्या दौऱ्यावर येत आहेत. प्रशांत कोरटकरला 11 तारखेपर्यंत अंतरिम जामीन मिळाला असल्याने आंदोलन स्थगित करा अशी पोलिसांची विनंती आहे. जुना राजवाडा पोलीस ठाण्यामध्ये आंदोलकांसोबत पोलिसांनी बैठक केली. मात्र, प्रशांत कोरटकरबरोबर केशव वैद्यवर देखील कारवाई करा अशी आंदोलकांची मागणी आहे.
पोलिसांना अजूनही कोरटकर सापडेना
दरम्यान, फरार असलेल्या प्रशांत कोरटकर व्हिडिओत म्हणतो की, छत्रपती शिवराय आणि छत्रपती संभाजी महाराज यांच्यामुळे महाराष्ट्राला जगभरात ओळखले जाते. त्यांच्या कथा ऐकून लहानाचे मोठा झालो आहे. त्यांच्या कथा अजूनही प्रेरणा देतात. छत्रपतीची राजधानी असलेला रायगडला अनेकदा भेट दिली व नतमस्तक झालो. त्यांना मी मानाचा मरदा मुजरा करतो असे कोरटकर म्हणताना दिसून येत आहे. दरम्यान, प्रशांत कोरटकर हा व्हिडिओ व्हायरल करून प्रतिक्रिया देत असताना पोलिसांना मात्र अजून का सापडत नाही? असा प्रश्न उपस्थित झाला आहे. दुसरीकडे प्रशांत कोरटकर मुद्यावरून आमदार रोहित पवार यांनी हल्लाबोल केला आहे. रोहित पवार यांनी प्रशांत कोरटकर मध्य प्रदेशात लपल्याचा आरोप केला आहे. यापूर्वी सुद्धा गुन्हा दाखल होताच प्रशांत कोरटकर बालाघाटला पळाल्याची माहिती समोर आली होती. पोलिसांकडून त्याचा शोध सुरु असला, तरी अजून सापडलेला नाही.
नागपूरमधील गुन्ह्याचा तपासही कोल्हापूर पोलिसांकडे
दरम्यान, प्रशांत कोरटकर विरोधात नागपूरच्या बेलतरोडी पोलीस स्टेशनमध्ये दाखल करण्यात आलेल्या गुन्ह्याचा तपासही आता कोल्हापूर पोलीस करणार आहेत. नागपूर पोलिसांनी दाखल केलेला गुन्हा रितसर कोल्हापूर पोलिसांकडे वर्ग करण्यात आला आहे. कोल्हापूर पोलीस आधीच या प्रकरणाचा तपास करत आहे. त्यामुळे तपासाच्या सोयीच्या दृष्टीकोनातून नागपुरातील गुन्हाही कोल्हापूर पोलिसांकडे वर्ग करत तपासाची सूत्र त्यांच्याकडे सोपवण्यात आल्याची माहिती आहे.
जिथं असाल तिथे येऊन ब्राह्मणांची ताकद दाखवू
दरम्यान, इतिहास अभ्यासक इंद्रजीत सावंत यांना प्रशांत कोरटकरनेच फोनवरून धमकी दिल्याचा उलगडा झाला आहे. कोल्हापूर पोलिसांनी सायबर पोलिसांच्या मदतीने सीडीआर मधून ही माहिती उघडकीस आणली आहे. त्यामुळे तो मी नव्हेच अशी भूमिका घेणारा प्रशांत कोरटकर तोंडघशी पडला आहे. प्रशांत कोरटकरने फोन करून थेट धमकी दिली, असे इंद्रजित सावंत यांनी ऑडिओ क्लीप समोर आणत सांगितले होते. सावंत यांनी एक कॉल रेकॉर्डिंग फेसबुकवर शेअर केली. ज्यामध्ये “जिथं असाल तिथे येऊन ब्राह्मणांची ताकद दाखवू, तुम्ही कितीही मराठे एकत्र करा, असे म्हणत या कोरटकर यांनी सावंतांना अर्वाच्य भाषेत शिवीगाळ आणि घरात येऊन मारण्याची दिली धमकी दिली आहे. तसेच कोरटकर याने राष्ट्रमाता जिजाऊ, छत्रपती शिवाजी महाराज आणि संभाजी महाराज यांच्याबद्दल वादग्रस्त वक्तव्य केले असे या ऑडिओ क्लीपमधून दिसून येते.
महत्त्वाच्या बातम्या
