Kolhapur News : गर्भवती महिलेवर उपचारासाठी जाताना आरोग्यसेविका एसटीखाली सापडून ठार; 15 दिवसांपूर्वीच केला होता नव्या घरात प्रवेश
स्वरुपा शिंदे या करंजफेण (ता.शाहुवाडी) अंतर्गत येणाऱ्या नांदगाव आरोग्य उपकेंद्रात कार्यरत होत्या. शुक्रवारी प्राथमिक आरोग्य केंद्रामध्ये करंजफेणमध्ये आरोग्य सेवक हैबती मगदूम यांच्या सोबत जात होत्या.
शाहूवाडी (कोल्हापूर) : आरोग्य केंद्रात दाखल झालेल्या गर्भवती महिलेवर उपचार करण्यासाठी जात असताना आरोग्यसेविका एसटीखाली सापडून ठार झाल्याची हृदयद्रावक घटना कोल्हापूर जिल्ह्यातील (Kolhapur News) शाहूवाडी तालुक्यातील करंजफेणजवळ घडली. स्वरूपा विजय शिदें (वय 30, रा. नणुंद्रे ता.पन्हाळा, जि. कोल्हापूर ) असे त्यांचे नाव आहे. स्वरुपा शिंदे या करंजफेण (ता.शाहुवाडी) अंतर्गत येणाऱ्या नांदगाव आरोग्य उपकेंद्रात कार्यरत होत्या. शुक्रवारी प्राथमिक आरोग्य केंद्रामध्ये करंजफेणमध्ये सावर्डेमधील सोनाली सुरेश कांबळेच्या प्रसुतीसाठी पुनाळमधील आरोग्य सेवक हैबती मगदूम यांच्या सोबत जात होत्या.
डोक्यावरून चाक गेल्याने त्याचा जागीच मृत्यू
यावेळी करंजफेण गावाजवळ करंजफेणहून नांदगाव- कोतोली मार्गे एसटी कोल्हापूरला जात होती. यावेळी समोरुन एसटी आल्याने दुचाकी बाजूला घेत असताना रस्त्याची साईटपटी खचली असल्याने पुढील चाक घसरले. त्यामुळे दुचाकीवरून तोल गेल्याने हैबती मगदूम व स्वरुपा शिंदें खाली कोसळल्या. यावेळी स्वरुपा शिंदे एसटीच्या मागील चाकाखाली सापडल्या. यावेळी डोक्यावरून चाक गेल्याने त्याचा जागीच मृत्यू झाला. जखमी हैबती मगदुम यांना उपचारासाठी मलकापूर रुग्णालयात उपचारासाठी दाखल करण्यात आलं आहे. एसटी चालक सागर पाटील याला पोलिसांनी ताब्यात घेतले आहे.
दोन महिन्यांपूर्वीच नव्या घरात
स्वरुपा शिंदे यांच्या नव्या घराची वास्तूशांती झाली आहे. अवघ्या 15 दिवसांपूर्वी त्या नव्या घरात राहण्यासाठी गेल्या होत्या. शिंदे यांच्या पश्चात मुलगा असून तो चौथीत आहे, तर मुलगी अंगणवाडीत शिकत आहे. त्यांचे पती विजय शिंदे प्राथमिक शिक्षक आहेत.गौरी गणपतीच्या सणात घडलेल्या अपघाताने नणुंद्रे गावावर शोककळा पसरली आहे.
अखेर गव्याच्या हल्ल्यातील जखमीचे निधन
दरम्यान, गडहिंग्लज-आजरा मार्गावर दोन दिवसांपूर्वी हॉटेल बिग बॉससमोर मुंगूसवाडीकडून हाजगोळीच्या दिशेने जाणाऱ्या गव्याने आजऱ्याच्या दिशेने जाणाऱ्या मोटरसायकलला जोराची धडक दिली होती. या धडकेत मोटरसायकलवरील उस्मान कानडीकर (वय 65) हे गंभीर जखमी झाले होते. त्यांचा उपचारादरम्यान रुग्णालयात मृत्यू झाला. रहमान लमतुरे (वय 45 रा. आजरा) जखमी झाले आहेत. दोघांनाही उपचारासाठी गडहिंग्लजमधील रुग्णालयात दाखल करण्यात आले होते. यापैकी कानडीकर यांचे उपचारदरम्यान निधन झाले.
उस्मान कानडीकर आणि रहमान लमतुरे दोघेही दुचाकीने गडहिंग्लजला गेले होते. बुधवारी सायंकाळी ते आजऱ्याकडे परतत होते. अण्णा भाऊ आजरा सूतगिरणीजवळ एक गवा अचानक समोर येऊन त्यांच्या मोटारसायकलला धडकला. त्यामुळे दोघेही मोटारसायकलसह रस्त्यावर पडल्याने ते जखमी झाले. कानडीकर यांना जबर दुखापत झाली होती. त्यांना उपचारासाठी गडहिंग्लज येथील खासगी रुग्णालयात हलवण्यात आले होते.
इतर महत्वाच्या बातम्या
महत्त्वाच्या बातम्या
ट्रेंडिंग न्यूज
