Kolhapur Municipal Corporation : सुवर्णमहोत्सवी वर्षात कोल्हापूर मनपाला 'सुवर्णपदका'ची संधी! क्षयरोग विभागास सुवर्णपदक नामांकन

Kolhapur Municipal Corporation : 2015 पासूनच्या क्षयरोग कामकाजाचा आढावा केंद्र स्तरावरुन घेण्यात आला आहे. यामध्ये भारतातील विविध राज्यातील 21 जिल्ह्यांना नामांकन देण्यात आलेले आहे.

Kolhapur Municipal Corporation

Kolhapur Municipal Corporation : कोल्हापूर महानगरपालिका सुवर्णमहोत्सवी वर्ष साजरे करत आहे. यानिमित्त गेल्या काही दिवसांपासून विविध कार्यक्रमांचे आयोजन मनपाकडून करण्यात आलं आहे. याच पार्श्वभूमीवर क्षयमुक्त भारत 2025 या मोहिमेचा एक भाग म्हणून केंद्र सरकार सब नॅशनल सर्टिफिकेशन उपक्रम राबवत आहे. यासाठी 2015 पासूनच्या क्षयरोग कामकाजाचा आढावा केंद्र सरकारकडून घेण्यात येत आहे. यामध्ये भारतातील विविध राज्यातील 21 जिल्ह्यांना नामांकन देण्यात आलेले आहे. त्यामध्ये कोल्हापूर जिल्हा आणि शहर क्षयरोग केंद्र यांना सुवर्णपदकासाठी नामांकन प्राप्त झालं आहे. त्यामुळे सुवर्णमहोत्सवी वर्षात सुवर्णपदकाला गवसणी घातल्यास तो पालिकेच्या आजवरच्या कार्याचा गौरव असेल. पालिकेच्या कारभारावरून सातत्याने टीका होत असली, तरी आरोग्याच्या दृष्टीने महापालिकेची रुग्णालये सर्वसामान्यांना दिलासा देणारी ठरली आहेत. ग्रामीण जनताही त्याचा लाभ घेत आहे.  

दरम्यान,केंद्र सरकारने सन 2025 पर्यंत भारत क्षयरोगमुक्त करण्याचे महत्वकांक्षी धोरण ठरविले आहे. महाराष्ट्रासह सर्व राज्यांनी 2025 पर्यंत राज्य क्षयरोगमुक्त करण्यासाठी आराखडा तयार केला आहे. मायक्रोबॅक्टीरियम ट्युबरक्युलॉसिस या जंतूने माणसाच्या शरीरात प्रवेश केल्याने क्षयरोग हा आजार होतो. क्षयरोग हा हवेव्दारे पसरणारा संसंर्गजन्य आजार आहे. केंद्राच्या मार्गदर्शक सूचनेनुसार विविध घटकांची पडताळणी करुन हे पदक बहाल करण्यात येणार आहे.

त्याचाच एक भाग म्हणून कोल्हापूर महानगरपालिका कार्यक्षेत्रामध्ये क्षयरोगाविषयी सर्वेक्षण सुरु आहे. या सर्व्हेक्षणाला शुक्रवारपासून सुरुवात करण्यात आली आहे. या सर्वेक्षण तपासणीमध्ये केंद्र सरकार, महाराष्ट्र सरकार, कोल्हापूर महानगरपालिका अधिकारी व कर्मचारी प्रत्यक्ष विविध भागामध्ये भेट देत आहेत. यासाठी महानगरपालिका क्षयरोग विभाग आपल्या शहरात क्षयरोग निर्मूलनासाठी शर्थीचे प्रयत्न करत आहे. 

एक जबाबदार नागरिक म्हणून सर्वांनी आपल्याकडे सर्वेक्षणासाठी आलेल्या सर्व्हेक्षण टीमला संपूर्ण खरी माहिती देऊन मोलाचे सहकार्य करुन क्षयमुक्त कोल्हापूर, भयमुक्त कोल्हापूर या उपक्रमाचे मानकरी व्हावे, असे आवाहन उप-आयुक्त रविकांत आडसुळ यांनी केले आहे. हे सुवर्णपदक प्राप्त करण्यासाठी महानगरपालिकेचे शहर क्षयरोग अधिकारी डॉ. प्रकाश पावरा, डॉ.रुपाली दळवी, आरोग्य विभाग, क्षयरोग विभाग सज्ज आहे. तरी खाजगी वैद्यकीय व्यावसायिक, ड्रग्ज डिस्ट्रीब्युटर, किरकोळ औषध विक्रेते यांनीही या पडताळणी कामी महानगरपालिकेस सहकार्य करावे, असे आवाहन क्षयरोग विभागाच्यावतीने करण्यात आले आहे.

इतर महत्वाच्या बातम्या