Kolhapur News: निवडणुकीच्या तोंडावर कोल्हापूर महापालिकेत सतेज पाटलांना धक्का; काँग्रेसचा गटनेता शिंदे सेनेच्या गळाला
काँग्रेस आमदार तथा कोल्हापूर काँग्रेस जिल्हाध्यक्ष सतेज पाटील यांचे प्रमुख शिलेदार माजी स्थायी समिती सभापती शारंगधर देशमुख शिंदेंच्या शिवसेनेत प्रवेश करणार आहेत.
कोल्हापूर : विधानसभा निवडणुकीनंतर महायुतीकडून महाविकास आघाडीच्या पदाधिकाऱ्यांना घेण्याचा कार्यक्रम सुरुच आहे. कोणत्याही परिस्थितीत स्थानिक स्वराज्य संस्थेच्या निवडणुकीत जिल्हा परिषद, महानगरपालिकांवर महायुतीचा झेंडा फडकण्यासाठी तिन्ही पक्ष कामाला लागले आहेत. विधानसभा निवडणुकीत काँग्रेसमध्ये झालेल्या घोळानंतर तसेच उमेदवारी डावलल्यानंतर काँग्रेसमध्ये अस्वस्थता समोर आली होती.
माजी स्थायी समिती सभापती शारंगधर देशमुख शिंदेंच्या शिवसेनेत
काँग्रेस आमदार तथा कोल्हापूर काँग्रेस जिल्हाध्यक्ष सतेज पाटील यांचे प्रमुख शिलेदार माजी स्थायी समिती सभापती शारंगधर देशमुख शिंदेंच्या शिवसेनेत प्रवेश करणार आहेत. आज (6 जून) ठाण्यात त्यांनी उपमुख्यमंत्री एकनाथ शिंदे यांची भेट घेतली. यावेळी कोल्हापूरचे पालकमंत्री प्रकाश आबिटकर, आमदार राजेश क्षीरसागर उपस्थित होते. पुढील काही दिवसात शारंगधर देशमुख आणि त्यांच्या सोबतचे काँग्रेसचे काही नगरसेवक शिंदे सेनेत प्रवेश करणार आहेत. त्यामुळे आगामी मनपा निवडणुकीच्या पार्श्वभूमीवर काँग्रेस गटनेता गळाला लागल्याने शिंदे गटाला फायदा होणार आहे.
35 नगरसेवक शिंदेसेनेत येणार, राजेश क्षीरसागरांचा दावा
दरम्यान, काही दिवसांपूर्वी बोलताना काँग्रेसचे दहा नव्हे, तर 35 नगरसेवक शिंदेसेनेत येणार असल्याचा दावा आमदार राजेश क्षीरसागर यांनी केला होता. टप्प्याटप्प्याने क्षेपणास्त्रे डागून विरोधकांचे तळ उद्ध्वस्त केले जातील, असेही क्षीरसागर यांनी म्हटले होते. क्षीरसागर म्हणाले की, आम्ही महापालिका महायुती म्हणून लढणार आहोत. यावेळी एकनाथ शिंदे यांच्यासारखा खंबीर नेता आमच्या पाठीशी असल्याने कोणत्याही परिस्थितीत शिवसेनेचा महापौर करून दाखवणार आहोत. त्यांनी म्हटले होते की, 35 माजी नगरसेवक शिवसेनेत येतील. काहीजणांचा प्रवेश जूनच्या पहिल्या आठवड्यात होईल. माझ्या नेतृत्वाखाली शिवसेनेने दोन महापालिका निवडणुका लढवल्या. आम्ही प्रामाणिकपणे प्रयत्न केले, पण अपेक्षित यश मिळाले नाही. आमचे 15 उमेदवार शंभरपेक्षा कमी मतांनी पडले. आमच्या 22 उमेदवारांनी दुसऱ्या क्रमांकाची मते घेतली. प्रत्येक वेळी एकच गोष्ट कमी पडत होती, पण आता काही कमी पडणार नाही. त्यामुळे या निवडणुकीत कोल्हापूरला शिवसेनेचा पहिला महापौर मिळेल.
इतर महत्वाच्या बातम्या
महत्त्वाच्या बातम्या
