जळगावात दोन गुलाबरावांच्या लढतीत कोणाला सर्वाधिक काटे टोचणार? देवकरांनी आव्हान देताच चर्चा रंगली

जळगाव ग्रामीण मतदारसंघ हा गेल्या अनेक वर्षांपासून शिवसेनेचा बालेकिल्ला राहिला आहे. मात्र शिवसेनेत दोन गट पडल्यानंतर मंत्री गुलाबराव पाटील हे शिंदे गटात गेल्याने उद्धव ठाकरे गटाकडे विरोधात लढण्यासाठी प्रबळ उमेदवार शोधण्याचे मोठे आव्हान राहिले आहे.

Gulabrao Patil - Gulabrao Deokar

Source : ABP

जळगाव :   जळगाव ग्रामीण मतदारसंघात (Jalgaon News)   उद्धव ठाकरे गटाकडे उमेदवार नसल्याने ते निवडणूक लढू शकत नसल्याच मंत्री गुलाबराव पाटील यांनी वक्तव्य केले होते.  त्याला माजी मंत्री गुलाबराव देवकर यांनी उत्तर दिले असून आपण त्यांच्या विरोधात लढणार असून दोन गुलाबात टक्कर होणार असल्याचे जाहीर केले आहे. दोन गुलाबरावमध्ये होणारी काट्याची टक्कर राजकीय क्षेत्रात चर्चेचा विषय राहणार आहे. 

जळगाव ग्रामीण मतदार संघ हा नेहमीच शिवसेनेचा बालेकिल्ला असल्याचं पाहायला मिळत आहे. या जागेवर  शिवसेना उद्धव ठाकरे गटाकडे उमेदवार नसल्याने त्यांनी तलवार म्यान केली आहे. संजय राऊत यांनी या बाबत आपला उमेदवार कोण  आहे,त्याचे नाव जाहीर करावे आणि निवडणूक लढवून दाखवावी असे खुले आव्हान ,मंत्री गुलाबराव पाटील यांनी संजय राऊत यांना दिले होते. या विषयावर अद्याप शिवसेना उद्धव ठाकरे गटाच्या वतीने प्रतिक्रिया आली नसली तरी महाविकास आघाडी नेते आणि माजी मंत्री गुलाबराव देवकर यांनी मात्र आपण या जागेवर उमेदवारी करणार असून मंत्री गुलाबराव पाटील यांच्या विरोधात लढणार असल्याचा दावा केल्याने राजकीय क्षेत्रात चर्चेचा विषय बनला आहे.

जळगाव ग्रामीण मतदारसंघ हा गेल्या अनेक वर्षांपासून शिवसेनेचा बालेकिल्ला राहिला आहे. मात्र शिवसेनेत दोन गट पडल्यानंतर मंत्री गुलाबराव पाटील हे शिंदे गटात गेल्याने उद्धव ठाकरे गटाकडे त्यांच्या विरोधात लढण्यासाठी प्रबळ उमेदवार शोधण्याचे मोठे आव्हान राहिले आहे. शिवसेना पक्षाची ही जागा असताना शिवसेना उद्धव ठाकरे गटाकडून आगामी विधानसभा निवडणुकीसाठी अद्याप कोणत्याही हालचाली सुरू नसल्याचे सांगत मंत्री गुलाबराव पाटील  यांनी उमेदवार जाहीर करण्याचे खुले आव्हान संजय राऊत यांना केले आहे. सेनेचा मतदार संघ असताना  उमेदवार नसल्याने शिवसेना उद्धव ठाकरे गटाने  आपली तलवार म्यान केली असल्याचं  म्हटल होते. 

मंत्री गुलाबराव पाटील यांच्या या आव्हानाला शिवसेना उद्धव ठाकरे गटाकडून ही  प्रतिक्रिया देण्यात आली  आहे.  मतदारसंघ सेनेकडेच राहिला आहे. त्यासाठी आम्ही ग्रामीण भागातील जनतेसाठी काम केले आहे. आमच्याकडे निवडणूक लढवण्यासाठी, गद्दार नाही तर  खुद्दार असे अनेक उमेदवार आहेत. आम्ही ही निवडणूक पक्षश्रेष्ठी निर्णय घेतील त्याप्रमाणे आपण काम करणार असल्याच सेनेचे जिल्हाध्यक्ष गुलाबराव वाघ यांनी म्हटले आहे.

गुलाब विरुद्ध गुलाब?

या  वेळी मंत्री गुलाबराव पाटील यांचे कट्टर राजकीय विरोधक आणि माजी मंत्री गुलाबराव देवकर यांनी मात्र ही जागा मेरिटप्रमाणे राष्ट्रवादी शरद पवार गटाकडे जाणार असल्याने, आपण या जागेवर उमेदवारी करणार आहे.  त्यासाठी आपण गेल्या अनेक महिन्यापासून तयारी करत आहोत. या निवडणुकीत मंत्री गुलाबराव पाटील यांच्या विरोधात आपण लढणार असून,गुलाबराव विरोधात गुलाबराव अशी लढत नक्की होणार असल्याचं म्हटल आहे.  मंत्री गुलाबराव पाटील आपल्या बाबत जनतेच्या मनात दिशाभूल करत आहेत. उमेदवार नाही अस त्यांचं बोलणे,म्हणजे ओव्हर कॉन्फिडन्स आहे. आमच्याकडे अनेक उमेदवार आहेत,एकाच रात्रीतून उमेदवार तयार होऊ शकतो असेही माजी मंत्री गुलाबराव देवकर यांनी म्हटले आहे.