Weather Udpate : तामिळनाडूत आज पावसाचा 'रेड' अलर्ट जारी, तर 'या' राज्यात पावसाचा अंदाज, वाचा आजची हवामानाची स्थिती

तामिळनाडूमध्ये सध्या जोरदार पाऊस कोसळत आहे. आजही तिथे पावसाचा रेड अलर्ट (Red alert) जारी करण्यात आला आहे.

Weather Udpate

Weather Udpate Today : सध्या देशात वातावरणात सातत्यानं बदल होत आहे. काही राज्यांमध्ये थंडीचा जोर वाढला आहे, तर काही राज्यांमध्ये पाऊस पडत आहे. देशाची राजधानी  दिल्लीत सध्या प्रदुषणामुळं लोकांचे हाल होत आहेत. दरम्यान, हवामान विभागानं (India Meteorological Department) दिलेल्या माहितीनुसार, दिल्ली आणि उत्तर प्रदेशसह अनेक राज्यांमध्ये आज (14 नोव्हेंबर) आणि उद्या (15 नोव्हेंबर) ढगाळ आकाश राहण्याचा अंदाज वर्तवला आहे. तर दुसरीकडं तामिळनाडूमध्ये सध्या जोरदार पाऊस कोसळत आहे. आजही तिथे पावसाचा रेड अलर्ट (Red alert) जारी करण्यात आला आहे. पुढच्या काही दिवसात तमिळनाडूसह केरळमध्ये मेघगर्जनेसह पाऊस पडण्याची शक्यता देखील हवामान विभागानं वर्तवली आहे. 

पंजाब हरियाणामध्ये हलक्या पावसाची शक्यता, दिल्लीत ढगाळ वातावरण

गेल्या काही दिवसांपासून अंदमान आणि निकोबार बेटांवर पाऊस सुरु आहे. मात्र, तिथे आज पावसापासून दिलासा मिळण्याची शक्यता आहे. मात्र, येत्या चार दिवसांत तिथे पुन्हा मेघगर्जनेसह पाऊस पडण्याची शक्यता आहे. याशिवाय पंजाबमध्ये आज हलका पाऊस पडू शकतो, त्यामुळं तापमानात काहीशी घट होऊन थंडी वाढण्याची शक्यता आहे. राष्ट्रीय राजधानी दिल्लीत आज ढगाळ वातावरणाचा अंदाज वर्तवला आहे. दिल्लीत आज कमाल तापमान 29 अंश सेल्सिअस , तर किमान तापमान 17 अंश सेल्सिअसपर्यंत राहील. हवामान तज्ज्ञांनी दिलेल्या माहितीनुसार, सक्रिय झालेल्या वेस्टर्न डिस्टर्बन्समुळे आज हरियाणाच्या अनेक भागात हलका पाऊस पडण्याची शक्यता आहे. त्यामुळं तापमानात घट होऊन थंडी वाढेल. 

हिमाचलमध्ये काही ठिकाणी पाऊस तर काही ठिकाणी बर्फवृष्टी  

हिमाचल प्रदेशात आज हवामान खराब राहण्याचा अंदाज वर्तवण्यात आला आहे. काही ठिकाणी उंच पर्वतीय भागात बर्फवृष्टीबाबत यलो अलर्ट जारी केला आहे. दुसरीकडे, हिमाचल, शिमला, सोलन, कुल्लू, चंबा, सिरमौर, उना, बिलासपूर, हमीरपूर आणि कांगडा या भागात पावसाची शक्यता आहे.

महाराष्ट्रासह राजस्थानात कसे असेल हवामान

राजस्थानच्या काही भागात आज धुके पडण्याची शक्यता हवामान खात्याने वर्तवली आहे. राजस्थानमध्ये आज कमाल तापमान 29 अंश सेल्सिअस आहे, तर किमान तापमान 16 अंश सेल्सिअसपर्यंत राहील. त्याचबरोबर मुंबईत आज कमाल तापमान 33 अंश सेल्सिअस राहील, तर किमान तापमान 24 अंश सेल्सिअसपर्यंत राहील. महाराष्ट्रात तापमानात घट झाली आहे. अनेक ठिकाणी थंडीचा जोर वाढला आहे.

उत्तर प्रदेश आणि मध्य प्रदेशातील हवामान

आज मध्य प्रदेशात ढगाळ वातावरण राहणार आहे. तसेच हलक्या रिमझिम पावसाची शक्यता देखील वर्तवण्यात आली आहे. त्यामुळं तापमानात घट होऊन थंडी वाढू शकते. त्याचवेळी उत्तर प्रदेशात हवामान स्वच्छ राहील. आज उत्तर प्रदेशमध्ये कमाल तापमान 28 अंश सेल्सिअस राहील, तर किमान तापमान 14 अंश सेल्सिअसपर्यंत राहणार आहे. 

दक्षिण भारतात पाऊस सुरूच राहणार 

हवामान खात्याने दिलेल्या माहितीनुसार, सोमवारी तामिळनाडू, केरळ, कर्नाटक, लक्षद्वीपमध्ये हलका ते मध्यम स्वरुपाचा पाऊस पडण्याची शक्यता आहे. त्याचबरोबर अंदमान आणि निकोबारमध्ये एक-दोन ठिकाणी मुसळधार पावसाची शक्यता आहे. तेलंगणातही आज पाऊस पडू शकतो. चेन्नई शहर आणि परिसरात पुढील 24 तासांत विजांच्या कडकडाटासह जोरदार ते मुसळधार पाऊस पडण्याची शक्यता आहे. हवामान खात्याने तामिळनाडूमध्ये पावसाचा रेड अलर्ट जारी केला आहे. त्यामुळं आज हवामान खात्यानं मच्छीमारांना समुद्रात न जाण्याचा इशारा दिला आहे.

महत्त्वाच्या बातम्या: