Corona third Wave : येत्या 6 ते 8 आठवड्यात कोरोनाची तिसरी लाट येण्याची शक्यता, एम्सच्या प्रमुखांचा दावा
अनलॉक होताच लोक ज्या पद्धतीने बेजबाबदारपणे वागत आहेत त्यातून लोक पहिल्या आणि दुसर्या लाटेतून काही शिकले नाहीत असंच दिसून येत आहे, डॉ. रणदीप गुलेरिया यांनी म्हटलं.
नवी दिल्ली : संपूर्ण देशात कोरोनाची दुसरी लाट निवळल्यानंतर लॉकडाऊनचे नियम शिथील करण्यात आले. अनेक राज्यांनी लॉकडाऊन पूर्णपणे हटवला आहे. दरम्यान देशातील सर्वात मोठी वैद्यकीय संस्था एम्सचे (AIIMS) संचालक डॉ. रणदीप गुलेरिया यांनी आज सांगितले की, येत्या 6 ते 8 आठवड्यांत देशात पुन्हा कोरोना साथीचा तिसरी लाट येण्याची शक्यता आहे आणि या लाटेला थांबवणे अशक्य आहे.
तिसऱ्या लाटेची भीती व्यक्त करण्याबरोबरच डॉ. रणदीप गुलेरिया यांनी म्हटलं की, देशातील मोठ्या लोकसंख्येचं लसीकरण करुन अधिकाधिक लोकांना कोरोनापासून सुरक्षित करणे हे देशातील मुख्य आव्हान आहे. तसेच कोविशिल्ड लसीच्या दोन डोसमधील अंतर वाढवणे योग्य निर्णय आहे, कारण त्यामुळे जास्तीत जास्त लोकांना वाचवले जाऊ शकते.
डॉ. रणदीप गुलेरिया यांनी पुढे म्हटलं की, देशातील अनेक राज्यांमध्ये लॉकडाऊन पूर्णपणे उठवण्यात आला आहे. परिस्थिती पुन्हा पूर्ववत करण्यात आली आहे. मात्र लोक अनेक ठिकाणी कोरोना नियमांचं उल्लंघन करताना दिसत आहेत. सार्वजनिक ठिकाणी गर्दी करत आहेत, मास्क वापरत नाहीयेत, सोशल डिस्टन्सिंगचे पालन करत नाहियेत. लोक ज्या पद्धतीने बेजबाबदारपणे वागत आहेत त्यातून लोक पहिल्या आणि दुसर्या लाटेतून काही शिकले नाहीत असंच दिसून येत आहे.
अनलॉक होताच पुन्हा गर्दी वाढत आहे आणि लोक नियमांचे पालन करत नाहीत. मात्र राष्ट्रीय स्तरावर कोरोना रुग्णांच्या संख्येत वाढ होण्यास थोडा वेळ लागेल. पुढील तिसरी लाट येत्या सहा ते आठ आठवड्यांत येऊ शकते किंवा त्यास थोडा जास्त वेळ लागू शकेल, असे डॉ. रणदीप गुलेरिया यांना सांगितलं.
एम्सच्या प्रमुखांनी पुढे सांगितले की, सामान्यत: नवीन लाटे यायला तीन महिने लागू शकतात. परंतु नवीन लाटेला तीनच महिने लागतील हे आवश्यक नसते, कारण वेगवेगळ्या घटकांवर अवलंबून खूप कमी वेळेतही हे घडू शकते. आपल्याला कोरोना प्रोटोकॉलशिवाय स्थितीवर काटेकोरपणे पाळत ठेवणे आवश्यक आहे. कारण आधीच्या लाटेत आम्हाला कोरोना व्हायरसचा एक नवीन प्रकार दिसला होता जो परदेशातून आपल्या देशात आला आणि येथे विकसित झाला. त्यामुळे काळजी घेणे आवश्यक आहे.
महत्त्वाच्या बातम्या
